فيديو: إيجاد قياس الزاوية الخارجية لمثلث بمعلومية قياس الزاوية المكملة لها

أوجد ق∠ﺱﺃﺟ.

٠٢:٥٠

‏نسخة الفيديو النصية

أوجد قياس الزاوية س أ ج.

لو بصّينا على الرسم عشان نحدّد الزاوية س أ ج، هنلاقي إن هي الزاوية دي. الأول هنشوف المعطيات الموجودة على الرسم. هنلاقي إنه قياس الزاوية أ ب ص يساوي مية واحد وتلاتين درجة. وهنلاقي إنه الزاوية أ ب ج، اللي هي دي، بتكوّن معاها زاوية مستقيمة، واللي بتساوي مية وتمانين درجة.

معنى كده إننا علشان نعرف قياس الزاوية أ ب ج هنطرح مية وتمانين ناقص قياس الزاوية أ ب ص، اللي هو مية واحد وتلاتين. هنلاقي إنه قياس الزاوية أ ب ج بتساوي تسعة وأربعين درجة. وده لأن الزاوية أ ب ص، والزاوية أ ب ج زاويتان متكاملتان مجموع قياسهم يساوي مية وتمانين درجة.

والمعطى التاني اللي على الرسمة عندنا هو إن قياس الزاوية أ ج ع بيساوي مية واحد وعشرين درجة. وهنلاقي إنها بتكوّن زاوية مستقيمة مع الزاوية أ ج ب، اللي هي دي. معنى كده إن مجموع قياس الزاويتين دول بيساوي مية وتمانين درجة. فعلشان نعرف قياس الزاوية أ ج ب هنطرح مية وتمانين ناقص مية واحد وعشرين.

وبكده قياس الزاوية أ ج ب بتساوي تسعة وخمسين درجة. فنقدر نقول إنه الزاوية أ ج ع، والزاوية أ ج ب زاويتين متكاملتين مجموع قياسهم بيساوي مية وتمانين درجة.

بعد ما عرفنا قياس زاويتين من الزوايا الداخلة في المثلث أ ب ج. هنلاقي إنه الزاوية التالتة هي الزاوية المكمّلة للزاوية اللي عايزين نعرف قياسها اللي هي س أ ج.

لأن مجموع قياسات الزوايا الداخلة للمثلث بتساوي مية وتمانين درجة. فنقدر نجيب قياس الزاوية ب أ ج بطرح مية وتمانين ناقص مجموع الزاويتين التانيين؛ اللي هو تسعة وأربعين، وتسعة وخمسين. وبكده قياس الزاوية ب أ ج بتساوي اتنين وسبعين درجة.

ولأن الزاوية ب أ ج، والزاوية س أ ج اللي عايزين نجيبها زاويتين متكاملتين، ومجموع قياساتهم بتساوي مية وتمانين درجة. فنقدر نجيب دلوقتي قياس الزاوية س أ ج بطرح مية وتمانين ناقص اتنين وسبعين. وبكده استنتجنا إنه قياس الزاوية س أ ج بتساوي مية وتمنية درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.