فيديو: ترتيب الأعداد الصحيحة ضمن الملايين

يوضح الفيديو كيفية ترتيب الأعداد الصحيحة ضمن الملايين باستخدام خطّ الأعداد والقيم المكانية.

١١:٢٨

‏نسخة الفيديو النصية

ترتيب الأعداد الصحيحة ضمن الملايين.

في الفيديو ده، هنعرف إزاي نرتِّب الأعداد الصحيحة الكبيرة المكوَّنة من خمس أرقام أو أكتر، أو اللي بتوصل للملايين. عندنا طرق لترتيب الأعداد الصحيحة. أول طريقة هي الترتيب باستخدام خطّ الأعداد. وتاني طريقة هي طريقة القيم المكانية.

وأول حاجة هنعرفها هي طريقة خطّ الأعداد. خطّ الأعداد عبارة عن خطّ متقسّم لأجزاء متساوية أو لفترات متساوية. وكل نقطة بيكون ليها عدد. مثلًا لو خطّ الأعداد ده بادئ من واحد لتسعة، هيكون بالشكل ده. طيب دلوقتي إحنا عاوزين نستخدم خطّ الأعداد ده؛ علشان نرتِّب أعداد كبيرة، زيّ ما قلنا، الأعداد اللي بتوصل لحدّ الملايين. هنعمل إيه؟ هناخد الأول مثال صغيّر على أعداد صغيّرة.

مثلًا لو عندنا أعداد زيّ التلاتة، والواحد، والتسعة، والسبعة. وعاوزين نرتِّبهم من الصغيّر للكبير، أو ترتيب تصاعدي.

بنيجي على خطّ الأعداد بتاعنا، وبنمثّلهم كلهم. أول عدد هو التلاتة، بنمثّله كده. بعديه الواحد. بعديه التسعة. وبعديها السبعة. كل امّا الأعداد تقرَّب جهة اليمين كل أمّا قيمتها تزيد وتكبر. وكل امّا تقرَّب لجهة اليسار أو الشِّمال كل امّا تصغر وقيمتها تقلّ. فمن تمثيلنا للأعداد دي على خطّ الأعداد، هنعرف بسهولة إن أصغرهم هو الواحد. ويليه، أو الأكبر منه، التلاتة. والأكبر منها السبعة. وأكبر عدد فيهم هي التسعة. يبقى بمجرد النظر، وباستخدام خطّ الأعداد، قدرنا نرتِّب الأعداد دي ترتيب تصاعدي من الصغيّر للكبير، من الشِّمال لليمين.

ودلوقتي هناخد مثال فيه أعداد كبيرة هنرتِّبها باستخدام خطّ الأعداد: مزرعة للأرانب عدّوا الأرانب اللي عندهم، ومثّلوها في الجدول ده. ففي شهر يوليو كان عندهم سبعة وأربعين ألف ميتين تمنية وتلاتين أرنب. وفي شهر يناير كان عندهم اتنين وأربعين ألف خمسمية اتنين وتسعين أرنب. وفي شهر إبريل كان عندهم خمسة وأربعين ألف تمنمية تمنية وستين أرنب. عاوزين نرتِّب التلات شهور دول ترتيب تنازلي، ونعرف أعلى شهر في عدد الأرانب كان شهر إيه. واللي بعده شهر إيه. وأقلّ شهر كان شهر إيه.

فهنستخدم خطّ الأعداد. أول حاجة في خطوات الحل، هي إننا نرسم خطّ الأعداد. بعدين نقسّمه لأجزاء متساوية. وبعد كده نحطّ الأعداد. فممكن نحطّ الأعداد من أول أربعين ألف لحدّ تمنية وأربعين ألف؛ علشان يكون محصور ما بينهم كل أعداد الأرانب اللي في الجدول. هنبدأ بأول عدد واحد وأربعين ألف. وكلّ مرة نزوّد ألف لحدّ ما نوصل لتمنية وأربعين ألف. بعدين نبدأ نمثّل.

أول عدد: سبعة وأربعين ألف ميتين تمنية وتلاتين. سبعة وأربعين ألف هنا. ميتين تمنية وتلاتين، يعني هيكون بعد السبعة وأربعين بجزء صغيّر أو بمسافة صغيّرة. فممكن نقول: إن الدايرة دي هي سبعة وأربعين ألف ميتين تمنية وتلاتين. العدد التاني: اتنين وأربعين ألف خمسمية اتنين وتسعين. اتنين وأربعين ألف هنا. خمسمية اتنين وتسعين، يعني بعد النصّ بشوية. فممكن نحطّها هنا، ونسمّيها اتنين وأربعين ألف خمسمية اتنين وتسعين. أمَّا العدد التالت: خمسة وأربعين ألف تمنمية تمنية وستين. خمسة وأربعين ألف هنا، وعليهم تمنمية تمنية وستين. يعني تقريبًا هنا. قرَّبت من الستة وأربعين ألف. ونكتب فوقيها خمسة وأربعين ألف تمنمية تمنية وستين. وبكده نكون مثّلنا التلات أعداد على خطّ الأعداد.

وإحنا قلنا: إن الأعداد اللي جهة اليمين بتكون كبيرة، والأعداد اللي جهة الشمال بتكون صغيّرة. فبالتالي أكبر عدد فيهم هو سبعة وأربعين ألف ميتين تمنية وتلاتين. وأصغر عدد فيهم هو اتنين وأربعين ألف خمسمية اتنين وتسعين. والعدد اللي في الوسط هو خمسة وأربعين ألف تمنمية تمنية وستين. يبقى ترتيب الأعداد هو: سبعة وأربعين ألف ميتين تمنية وتلاتين. بعديها الوسطاني: خمسة وأربعين ألف تمنمية تمنية وستين. بعديها أصغر واحد: اتنين وأربعين ألف خمسمية اتنين وتسعين.

ومن هنا نقول: إن أكبر شهر في الإنتاجية هو الشهر اللي فيه سبعة وأربعين ألف ميتين تمنية وتلاتين أرنب. وهو شهر يوليو. واللي بعده شهر إبريل. وأصغر شهر أو الأخير هو شهر يناير. وبكده نكون رتّبنا التلات أعداد دول ترتيب تنازلي باستخدام خطّ الأعداد.

تاني طريقة هي طريقة القيم المكانية. دي برضو طريقة سهلة جدًّا. وبتساعدنا في ترتيب الأعداد بسهولة وبسرعة، مهما كانت الأعداد دي كبيرة، وحتى لو وصلت للملايين. وعلشان نرتّب مجموعة أعداد باستخدام القيم المكانية، بنكتب الأعداد تحت بعضها بشكل رأسي. بعدين بنمسك أول خانة، ونقارن بين العددين اللي فيهم. هنلاقي اللي فوق فيها واحد، واللي تحت فيها ستة. إذن الستة أكبر من الواحد. يبقى العدد ده هو الكبير.

وهناخد مثال؛ علشان نفهم الطريقة دي بشكل أفضل. عندنا جدول بيوضّح عدد براميل البترول اللي بتستخدمها شوية دول في اليوم. فمثلًا دولة البرازيل بتستخدم اتنين مليون مية تسعة وتسعين ألف برميل في اليوم. أمَّا كندا، بتستخدم اتنين مليون ميتين ألف برميل في اليوم. والهند بتستخدم اتنين مليون مية وتلاتين ألف برميل في اليوم. وأمريكا بتستخدم تسعتاشر مليون ستمية وخمسين ألف برميل في اليوم. عاوزين نعرف مين أكتر دولة بتستخدم براميل في اليوم. ومين أقلّ دولة بتستهلك أو بتستخدم براميل في اليوم. وترتيب الدول دي ترتيب تنازلي.

هنعمل ده باستخدام القيم المكانية. الخطوة الأولى: وهي إننا نرصّ الأعداد تحت بعضها بترتيب ونظام. بنحطّ الآحاد تحت الآحاد، والعشرات تحت العشرات، وهكذا. علشان نحطّهم تحت بعض بالشكل ده، هنعدّ كل عدد فيه كام رقم. فالبرازيل فيها واحد، اتنين، تلاتة، أربعة، خمسة، ستة، سبعة. وكندا: واحد، اتنين، تلاتة، أربعة، خمسة، ستة، سبعة. وزيّهم الهند: واحد، اتنين، تلاتة، أربعة، خمسة، ستة، سبعة. أمَّا أمريكا، واحد، اتنين، تلاتة، أربعة، خمسة، ستة، سبعة، تمنية. يبقى أمريكا هي أكبر عدد؛ لأنها مكوَّنة من أرقام كتير. أمريكا فيها تمن أرقام. أمَّا البرازيل، وكندا، والهند، ففيهم سبع أرقام.

فلمّا نيجي نرتِّبهم تحت بعض، هنبدأ بالكبير، اللي هو أمريكا. وتحتها نحطّ أعداد باقي الدول. وناخد بالنا، وإحنا بنحطّ الأعداد بنبدأ من عند الآحاد. يعني مثلًا هنحطّ كندا مع بعض. نبدأ من هنا: صفر، وصفر، وصفر تحت التلات أصفار اللي فوقيها. بعدين صفرين تحت التسعتين. بعدين اتنين تحت الواحد. واتنين تحت الاتنين. وزيّها هنعمل الهند.

بعد ما رصّيناهم، هنمسك أول خانة من الشمال، ونقارن الأعداد اللي فيها. هنلاقي فيها تسعتاشر، واتنين، واتنين، واتنين. فالتسعتاشر أكبر عدد. خلاص كده عرفنا مين الكبير. هنشيله، ونقارن ما بين التلات أعداد التانيين. ودي الخطوة رقم اتنين. وهنشوف تاني خانة، فيها واحد، واتنين، وواحد. يبقى الاتنين هو أكبر عدد فيهم. يبقى العدد اللي في النصّ هو تاني أكبر عدد. وممكن نرسم على جنب سلّم، ونحطّ عليه الأعداد اللي بنخلّصها. أول عدد كبير كان تسعتاشر مليون ستمية وخمسين ألف، اللي هو ده. وطلَّعنا بعده العدد ده؛ اتنين مليون وميتين ألف.

ودلوقتي هندخل على الخطوة رقم تلاتة. واللي هنقارن فيها العددين الباقيين. وهنقارن ما بينهم في تالت خانة. هنلاقي فيها تسعة وتلاتة. التسعة هي الكبيرة. يبقى العدد ده هو الكبير. ونكتبه عَ الدرجة التالتة من السلم. والعدد الباقي والأخير هو ده. وده أصغر عدد موجود.

يبقى ترتيب الأعداد من الكبير للصغيّر كان بالشكل ده. وأول عدد أو أكبر عدد بيدلّ على أكبر دولة بتستهلك البترول، وهي أمريكا. وبييجي بعدها كندا. وبعدهم البرازيل. وآخر دولة هي الهند. يبقى أعلى دولة في استهلاك البنزين هي أمريكا. وأقلّ دولة هي الهند. وترتيب الدول زيّ ما موجود على السلّم.

وبكده نكون عرفنا إزاي نرتِّب الأعداد المكوَّنة من خمس أرقام أو أكتر، باستخدام خطّ الأعداد، وباستخدام القيم المكانية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.