فيديو: تعريف ووصف وتكملة الأنماط

يوضح الفيديو كيفية تعريف ووصف وإكمال الأنماط العددية والأنماط غير العددية، وأمثلةً عليها.

٠٥:٤٢

‏نسخة الفيديو النصية

هنتكلّم عن تعريف، ووصف، وتكملة الأنماط. هنتعلّم إزاي نعرّف، ونوصف، ونكمّل نمط عددي، وغير عددي. هبتدي الشرح بالمثال التالي.

تبيع سلمى تلات أقلام بخمستاشر جنيه، وأربع أقلام بعشرين جنيه. فكم ستبيع سلمى الست أقلام؟

هنلاحظ إنه فيه نمط في تكلفة الأقلام. إيه هو النمط؟ النمط هو تسلسل أو تتابع لأعداد، أو أشكال، أو رموز بتتّبع قاعدة معينة؛ وبالتالي يمكن إكمال أيّ نمط. عشان أعرف بكم ستبيع سلمى الست أقلام، هنحدّد النمط بقسمة التكلفة الكلية على عدد الأقلام كل مرة.

لمّا باعت سلمى التلات أقلام بخمستاشر جنيه كانت تكلفة القلم الواحد كالتالي؛ هنقسم خمستاشر على تلاتة هيساوي خمسة جنيه. ولمّا باعت سلمى الأربع أقلام بعشرين جنيه، عشان نجيب تكلفة القلم الواحد هقسم عشرين على أربعة هيساوي برضو خمسة جنيه.

وبكده هلاحظ إنه تكلفة القلم الواحد هي: خمسة جنيه. وبكده أقدر أقول إن القاعدة هي: اضرب عدد الأقلام في خمسة.

هنوضّح أكتر النمط في الجدول التالي. هرسم جدول فيه علاقة بين عدد الأقلام، والتكلفة. هنلاحظ إنه لمّا كان عدد الأقلام واحد كانت التكلفة خمسة، ولمّا بقى عدد الأقلام اتنين بقت التكلفة عشرة؛ يعني جمعنا خمسة. ولمّا بقت عدد الأقلام تلاتة أصبحت التكلفة خمستاشر؛ يعني جمعنا خمسة. ولمّا بقى عدد الأقلام أربعة بقت التكلفة عشرين؛ يعني برضو جمعنا خمسة.

وبكده أقدر أقول إنه لمّا يبقى عدد الأقلام خمسة فالتكلفة هتبقى خمسة وعشرين. هنجمع خمسة زائد عشرين؛ يعني هيبقى خمسة وعشرين. ولمّا يبقى عدد الأقلام ستة هتصبح التكلفة تلاتين؛ لأن هنجمع على خمسة وعشرين خمسة. يعني خمسة وعشرين زائد خمسة هيساوي تلاتين. وبكده أقدر أقول إنه تكلفة الست أقلام هي: تلاتين جنيه. هنكمّل في الصفحة اللي جايّة.

مثال: بتتّبع الأجزاء في كتاب مصطفى نمط معيّن. حدّد النمط والقاعدة، وأكمل النمط لإيجاد آخِر صفحة في الجزء السادس من الكتاب.

يعني مطلوب في السؤال إن أجيب آخِر صفحة في الجزء السادس من الكتاب.

هنلاحظ إنه يمكن تحديد النمط بالنظر إلى العلاقة بين الأعداد في النمط. هنلاحظ كمان إنه لمّا نبصّ على الجدول الأجزاء الفردية بتتضمّن ستاشر صفحة. والأجزاء الزوجية بتتضمّن اتناشر صفحة. الجزء الأولاني كانت آخِر صفحة فيه ستاشر. والجزء التاني بقت آخِر صفحة فيه تمنية وعشرين؛ يعني جمعنا اتناشر.

وبكده الجزء الأولاني، أو لمّا كان رقم الجزء فردي، كان عدد الصفحات ستاشر. ولمّا بقى الجزء زوجي بقى عدد الصفحات اتناشر. هنكمّل، الجزء التالت آخِر صفحة كانت أربعة وأربعين؛ يعني جمعنا ستاشر. الجزء الرابع آخِر صفحة كانت ستة وخمسين؛ يعني جمعنا اتناشر. الجزء الخامس آخِر صفحة كانت اتنين وسبعين؛ يعني جمعنا ستاشر.

وبكده عشان أجيب آخِر صفحة في الجزء السادس، هجمع اتناشر؛ لأن الجزء السادس زوجي، وبيتضمّن اتناشر صفحة. وبكده هلاحظ إنه اتنين وسبعين، آخِر صفحة في الجزء الخامس. زائد عدد صفحات الجزء السادس، وهم اتناشر. يعني اتنين وسبعين زائد اتناشر هيساوي أربعة وتمانين. وبكده أقدر أقول إنه آخِر صفحة في الجزء السادس هي: أربعة وتمانين. هنكمّل في الصفحة اللي جايّة.

مثال: ترسم فريدة أشكال كما هو موضّح، بتتّبع الأشكال نمط معيّن. إذا أكملت فريدة النمط فأيّ شكل من الأشكال التالية سيكون الشكل التالي؟

يعني مطلوب في السؤال إني أشوف شكل أ، ولّا ب، ولّا ج، ولّا د هيكون الشكل التالي اللي هترسمه فريدة.

لمّا هنبصّ على الأشكال اللي فريدة رسمتها هنلاحظ إن كل الأشكال بتتكوّن من أربع أضلاع. الشكل الأولاني أربع أضلاع. الشكل التاني أربع أضلاع. الشكل التالت أربع أضلاع. والشكل الرابع كمان أربع أضلاع زيّ ما هو موضّح قدّامي. وبالتالي الشكل اللي هترسمه فريدة بعد كده هيكون لازم مكوّن من أربع أضلاع.

لمّا هنبصّ على الأشكال أ، وَ ب، وَ ج، وَ د هنلاحظ إنه شكل ج هو الشكل الوحيد اللي مكوّن من أربع أضلاع. وبكده الشكل التالي هيكون هو: شكل ج.

وبكده هنكون اتعلّمنا إن النمط هو تسلسل أو تتابع لأعداد، أو أشكال، أو رموز بتتّبع قاعدة معينة، ويمكن إكمال أيّ نمط. واتعلّمنا إزاي نعرف نوصف ونكمّل النمط؛ سواء كان عددي، أو غير عددي. واتعلّمنا كمان إنه يمكن تحديد النمط بالنظر إلى العلاقة بين الأعداد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.