تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الأعداد حتى ١٠٠

نهال عصمت

يتناول الفيديو كيفية المقارنة بين الأعداد حتى ١٠٠، والعلامات المستخدمة للتعبير عن ذلك.

٠٦:٤٣

‏نسخة الفيديو النصية

مقارنة الأعداد حتى مية.

هنتعلم إزاي نقارن بين الأعداد حتى مية؛ باستخدام علامة أكبر من، أو علامة أصغر من، أو علامة يساوي. أول حاجة عشان نقدر نقارن بين عددين، أول خانة بنبصّ عليها، هي أكبر خانة موجودة عندنا؛ وهي خانة العشرات. طب لو لقينا إن خانة العشرات متساوية في العددين، بنبدأ نبصّ على خانة الآحاد. هنبدأ نجيب صفحة جديدة. ونشوف أمثلة؛ إزاي نقدر نستخدم علامة أكبر من، أو أصغر من، أو يساوي في المقارنة بين الأعداد حتى مية.

معطى تلات نماذج مختلفة. عايزين نقارن بين كل نموذجين، ليهم نفس اللون، باستخدام علامة أكبر من، أو أصغر من، أو يساوي.

هنبدأ نبصّ على النموذج الأول. هنلاقي عندنا مجموعة من ست مكعبات. ومجموعتين كلّ مجموعة مكوّنة من عشر مكعبات. معنى كده إن النموذج يمثّل العدد ستة وعشرين. وهنلاقي إن النموذج التاني يمثل العدد خمستاشر. عايزين نقارن بين العددين ستة وعشرين، وخمستاشر.

أول حاجة، هنبدأ نبصّ على أكبر خانة، وهي خانة العشرات. في العدد الأول، عندنا اتنين في خانة العشرات. وفي العدد التاني، عندنا واحد في خانة العشرات. الاتنين أكبر من الواحد؛ يبقى نقدر نقول إن ستة وعشرين هتبقى أكبر من خمستاشر. أو نقدر نكتبها بطريقة تانية؛ وهي ستة وعشرين أكبر من خمستاشر.

هنبدأ نبص على النموذج اللي بعد كده. هنلاقي إن النموذج الأول يمثل العدد أربعة وتلاتين. والنموذج التاني يمثل العدد خمسة وتلاتين. عايزين نقارن بين العددين أربعة وتلاتين، وخمسة وتلاتين. هنبدأ نبصّ على أكبر خانة، وهي خانة العشرات. هنلاقي في العدد الأول، تلاتة في خانة العشرات. وفي العدد التاني، تلاتة في خانة العشرات. يبقى إحنا كده عندنا خانة العشرات في العددين متساوية. وبالتالي هنقدر نبصّ، عفوًا هنبدأ نبصّ على خانة الآحاد.

هنلاقي إن في العدد الأول، خانة الآحاد أربعة. وفي العدد التاني، خانة الآحاد خمسة. الأربعة أصغر من الخمسة. وبالتالي نقدر نقول إن أربعة وتلاتين هتبقى أصغر من خمسة وتلاتين. ونقدر نكتبها بطريقة تانية؛ وهي أربعة وتلاتين أصغر من خمسة وتلاتين.

هنبدأ نبصّ على آخر نموذج. هنلاقي إن النموذج الأول هو عبارة عن العدد تلاتة وتلاتين. والنموذج التاني هو عبارة عن العدد تلاتة وتلاتين. عشان نقدر نقارن بين العددين، هنبدأ نبصّ على أكبر خانة؛ وهي خانة العشرات. هنلاقي إن خانة العشرات في العدد الأول هي تلاتة، وفي العدد التاني هي كمان تلاتة. يبقى كده خانة العشرات في العددين متساوية.

هنبدأ نبص على الخانة الأصغر منها؛ وهي خانة الآحاد. هنلاحظ إن في العدد الأول، خانة الآحاد تلاتة. وفي العدد التاني، خانة الآحاد هي كمان تلاتة. يبقى كده خانة الآحاد هي كمان متساوية. يبقى كده نقدر نقول إن تلاتة وتلاتين هتساوي تلاتة وتلاتين. ونقدر نكتبها بطريقة تانية؛ وهي تلاتة وتلاتين تساوي تلاتة وتلاتين. يبقى كده عرفنا نقارن بين الأعداد باستخدام علامة أكبر من، أو أصغر من، أو يساوي. هنبدأ نجيب صفحة جديدة، ونشوف أمثلة أخرى.

مطلوب: قارن بين الأعداد الآتية باستخدام علامة أكبر من، أو أصغر من، أو يساوي.

أول عددين: واحد وأربعين، وواحد وتسعين. عايزين نقارن بينهم. هنبدأ نبصّ على أكبر خانة؛ وهي خانة العشرات. في العدد الأول، خانة العشرات أربعة. وفي العدد التاني، خانة العشرات تسعة. الأربعة أصغر من التسعة. يبقى نقدر نقول إن واحد وأربعين هتبقى أصغر من واحد وتسعين.

هنبدأ نبص عَ العددين اللي بعديهم. عايزين نقارن بين العددين: أربعة وتمانين، وأربعة وتمانين. نفس الكلام؛ هنبدأ نبصّ على أكبر خانة؛ وهي خانة العشرات. في العدد الأول، خانة العشرات تمنية. وفي العدد التاني، خانة العشرات تمنية. يبقى كده خانة العشرات متساوية في العددين.

وبالتالي هنبدأ نبصّ على الخانة اللي أصغر؛ وهي خانة الآحاد. هنلاقي إن في العدد الأول، خانة الآحاد أربعة. وفي العدد التاني، خانة الآحاد هي كمان أربعة. يبقى كده خانة الآحاد هي كمان متساوية في العددين. يبقى نقدر نقول إن أربعة وتمانين هتساوي أربعة وتمانين.

نبدأ نبصّ على آخر عددين، ونبدأ نقارن بينهم. عندنا العدد اتنين وتسعين، والعدد تسعة وعشرين. أول حاجة هنبدأ نبصّ على أكبر خانة؛ وهي خانة العشرات. هنلاقي في العدد الأول، خانة العشرات تسعة. وفي العدد التاني، خانة العشرات اتنين. التسعة أكبر من الاتنين. وبالتالي يبقى اتنين وتسعين هتبقى أكبر من تسعة وعشرين.

يبقى كده عرفنا إزاي نقارن بين الأعداد حتى مية، باستخدام علامة أكبر من، أو علامة أصغر من، أو علامة يساوي.