فيديو: جمع العدد ونفسه

يوضح الفيديو كيفية الحصول على ناتج جمع العدد إلى نفسه، وكيفية الحصول على ناتج جمع العدد إلى نفسه مضافًا إليه واحد.

٠٧:٠٠

‏نسخة الفيديو النصية

هنتكلّم عن جمع العدد ونفسه. هنتعلّم إزّاي نجمع العدد ونفسه. وإزّاي نجمع العدد ونفسه، مضاف إليه واحد. لمّا بيتساوا العددان المضافان في جملة الجمع، ده بنسميه حقيقة جمع العدد ونفسه. يعني مثلًا لو عندي خمس مربعات، هضيف إليها خمس مربعات، فهيبقى عندي عشر مربعات. يعني خمسة زائد خمسة، هيساوي عشرة. خمسة هو عدد مضاف، وخمسة عدد مضاف، وعشرة هو ناتج الجمع. وهنلاحظ بكده إنه عشرة هي ضعف الخمسة. وبكده هنقدر نستعمل حقايق جمع العدد ونفسه، عشان نجيب الناتج.

هناخد مثال في الصفحة اللي جاية. أكمل جملة الجمع في كلٍّ مما يلي. رقم واحد: هلاحظ إن عندي تلات مربعات، وتلات مربعات. إذن الأعداد المضافة هي تلاتة زائد تلاتة. لمّا هنعدّ المربعات كلها، هنلاقي ناتج الجمع هو ستة. وبكده ستة هي ضعف التلاتة. رقم اتنين: هلاقي عندي ست مربعات، مضاف إليهم ست مربعات. إذن الأعداد المضافة هي ستة زائد ستة. لمّا هنعدّ المربعات كلها، هنلاقيهم اتناشر. إذن أقدر أقول إن اتناشر هي ضعف الستة.

هنكمّل في الصفحة اللي جاية. مثال: اوجد ناتج الجمع، وارسم دايرة حول حقيقة جمع العدد ونفسه. رقم واحد: أربعة زائد أربعة. أربع مربعات، مضاف إليهم أربع مربعات. إذن ناتج الجمع هيساوي تمنية. ودي تُعتبر حقيقة جمع العدد ونفسه. إذن هرسم حواليها دايرة. رقم اتنين: أربعة زائد ستة. هبتدي بأربع مربعات، مضاف إليها ست مربعات. ناتج الجمع هيساوي عشرة. ودي لا تُعتبر حقيقة جمع العدد ونفسه.

رقم تلاتة: سبعة زائد أربعة. هبتدي بسبع مربعات، مضاف إليها أربع مربعات. هيكون ناتج الجمع حداشر. ودي لا تُعتبر حقيقة جمع العدد ونفسه. رقم أربعة: تلاتة زائد تلاتة. هبتدي بتلات مربعات، مضاف إليها تلات مربعات. ناتج الجمع هيساوي ستة. وبما إنه جمعت العدد ونفسه، اللي هو تلاتة زائد تلاتة، إذن ده يُعتبر حقيقة جمع العدد ونفسه.

هنكمّل في الصفحة اللي جاية. هنستعمل حقايق جمع العدد ونفسه، عشان نجيب ناتج جمع العدد ونفسه، مضافًا إليه واحد. يعني مثلًا لو عندي أربع مربعات، مضافًا إليها أربع مربعات، ناتج الجمع هيساوي تمنية. ولو عملت تغيير بسيط، وفِضِل عندي في الأول أربع مربعات. وبدل ما أضيف أو أجمع أربع مربعات، هجمع خمس مربعات. إذن ناتج الجمع في الحالة دي، هيزيد واحد. يعني تمنية هتبقى تسعة. وبكده أكون استفدت من حقيقة جمع العدد ونفسه، عشان أجيب ناتج جمع العدد ونفسه، مضافًا إليه واحد.

هنكمّل في الصفحة اللي جاية. مثال: اكتب جملة الجمع. هلاحظ إن عندي تلات مربعات، مضافًا إليها تلات مربعات. هعدّ المربعات كلها، هيساوي ستة. ودي حقيقة جمع العدد ونفسه؛ لأن الستة هي ضعف التلاتة. وبكده لمّا هغيّر جملة الجمع، هتبقى تلاتة زائد أربعة، فإن ناتج الجمع هضيف إليه واحد. إذن ناتج الجمع هيبقى سبعة. وبكده أقدر أقول إن تلاتة زائد أربعة، هيساوي سبعة.

هنكمّل في الصفحة اللي جاية. تدريبات: أوجد ناتج جمع كلٍّ مما يلي: خمسة زائد خمسة. يعني لو عندي خمس مربعات، مضافًا إليها خمس مربعات، فإن ناتج الجمع هيساوي عشرة. ودي حقيقة جمع العدد ونفسه. وممكن أستفاد بيها، عشان أجيب جمع العدد ونفسه، مضافًا إليه واحد. يعني بدل ما هجمع خمسة زائد خمسة، هجمع خمسة زائد ستة. إذن هضيف واحد على ناتج جمع اللي فات. وبكده أقدر أقول إن خمسة زائد ستة، هيساوي حداشر. وبما إنه خمسة زائد ستة، هيساوي حداشر. إذن ستة زائد خمسة، برضو هيساوي حداشر. لأنه تغيير ترتيب الأعداد المضافة، ما بيغيرش ناتج الجمع.

رقم اتنين: واحد زائد واحد. يعني لو عندي مربع، مضافًا إليه مربع. إذن ناتج الجمع هيساوي اتنين. ولو غيّرت جملة الجمع، وأضفت واحد. يعني استخدمت حقيقة جمع العدد ونفسه، مضافًا إليه واحد. فبدل واحد زائد واحد، هتبقى واحد زائد اتنين. إذن هضيف واحد على ناتج الجمع. وواحد زائد اتنين، هتساوي تلاتة. وبما إن واحد زائد اتنين، هتساوي تلاتة. إذن اتنين زائد واحد، برضو هتساوي تلاتة. باستعمال خاصية الإبدال.

هنكمّل في الصفحة اللي جاية. رقم أربعة: أربعة زائد خمسة هيساوي نقط، وأربعة زائد أربعة هيساوي نقط. في البداية هستعمل حقيقة جمع العدد ونفسه، عشان أجيب ناتج جمع أربعة زائد خمسة. أربعة زائد أربعة، هيساوي تمنية. إذن أربعة زائد خمسة، هيساوي تمنية زائد واحد. يعني هيساوي تسعة. لأني أضفت واحد إلى حقيقة جمع العدد ونفسه. وبالتالي هضيف واحد إلى ناتج الجمع. فتمنية هتبقى تسعة.

رقم خمسة: تلاتة زائد اتنين. هستعمل حقيقة جمع العدد ونفسه. اللي هي اتنين زائد اتنين، هتساوي أربعة. وبكده هضيف واحد إلى الأربعة، عشان أجيب ناتج جمع تلاتة زائد اتنين. وبالتالي تلاتة زائد اتنين، هيساوي خمسة.

وبكده هنكون اتعلّمنا إزّاي نجيب ناتج جمع العدد ونفسه. وإزّاي نجمع العدد ونفسه، مضافًا إليه واحد. وناتج جمع العدد ونفسه بيسمى ضعف العدد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.