فيديو: استخدام القيمة المكانية لجمع الأعداد الطبيعية الصغيرة

أكمل التالي: ١ + ١ + ٤ = _، ١٠ + ١٠ + ٤٠ = _، ١٠٠ + ١٠٠ + ٤٠٠ = _.

٠٣:٣٠

‏نسخة الفيديو النصية

أكمل التالي: واحد زائد واحد زائد أربعة يساوي نقط. عشرة زائد عشرة زائد أربعين يساوي نقط. مية زائد مية زائد ربعمية يساوي نقط.

هنبتدي نمثّل أول عملية جمع عندنا باستخدام مكعبات القيم المكانية. فهنبدأ نجمع واحد زائد واحد زائد أربعة. عندنا مكعب واحد يمثّل العدد واحد. ومكعب آخَر، كمان واحد، يمثّل العدد واحد التاني اللي هنجمعه عليه. وبعدين أربع مكعبات بيمثّلوا العدد أربعة اللي بيتمّ جمعه على العددين السابقين.

عشان نقدر نوجد ناتج عملية الجمع اللي عندنا دي، هنبدأ نعدّ المكعبات اللي موجودة كلها على بعض؛ هيبقى عددها كام؟ واحد، اتنين، تلاتة، أربعة، خمسة، ستة. يعني لمّا نضمّ مجموعة المكعبات اللي مثّلنا بيها عملية الجمع اللي عندنا. لمّا نحطّهم كلهم على بعض، ونيجي نعدّهم؛ هيطلع عددهم يساوي ستة. وده معناه إن ناتج جمع واحد زائد واحد زائد أربعة يساوي ستة.

تاني عملية جمع عندنا هي: عشرة زائد عشرة زائد أربعين. عايزين نوجد ناتج عملية الجمع دي.

أول حاجة لمّا بنيجي نمثّل العدد عشرة بنستخدم له عمود العشرة؛ اللي عبارة عن عمود بيتكوّن من عشر مكعبات. وبعدين عايزين نجمع عشرة أخرى، فهنستخدم عمود آخَر بيتكوّن من عشر مكعبات؛ واللي بنسمّيه نموذج العشرة. وبعد كده عايزين نجمع أربعين. يعني هنستخدم أربع نماذج من نماذج العشرة، يعني أربع عشرات؛ اللي بيمثّلهم أربع أعمدة من نموذج العشرة.

ولو حبّينا نشوف مجموع المكعبات اللي استخدمناها. هنلاقي إن كلهم على بعض عبارة عن ست أعمدة من نموذج العشرة، أو ست عشرات؛ يعني عبارة عن ستين. لأن كل عمود من الأعمدة بيمثّل عشرة، فست أعمدة معناهم ست عشرات أو ستين. وكده يبقى قدِرنا نعرف إن ناتج جمع عشرة زائد عشرة زائد أربعين يساوي ستين.

يبقى بعد ما خلّصنا أول عمليتين جمع عندنا، هنشوف آخِر عملية جمع مطلوبة منّنا؛ وهي: مية زائد مية زائد ربعمية يساوي نقط.

فكده هنستخدم واحد من نماذج المائة اللي بيتكوّن من مائة مكعب. الوحدة الواحدة منه عبارة عن مائة مكعب. وبعدين هنستخدم واحد كمان؛ عشان نعبّر عن المية التانية اللي عايزين نجمعها. أمّا الربعمية فهنستخدم عشان نمثّلها أربعة من نموذج المائة.

لو جينا نشوف عدد نماذج المائة اللي احتجنا نستخدمها عشان نمثّل عملية الجمع اللي عندنا دول. هنعدّهم هنلاقي إن هم ست نماذج من نماذج المائة، واللي قيمتهم بتساوي ستمية. يبقى قدِرنا نستنتج إن مية زائد مية زائد ربعمية تساوي ستمية.

وبكده يبقى قدِرنا نوجد ناتج جمع التلات عمليات حسابية اللي عندنا باستخدام مكعبات القيم المكانية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.