فيديو: وحدات الطول

يوضح الفيديو وحدات قياس الطول في النظام المتري، وطريقة التحويل من وحدة إلى أخرى، مع أمثلة توضيحية.

٠٦:٢٧

‏نسخة الفيديو النصية

وحدات الطول.

هنتكلم عن وحدات قياس الطول في النظام المتري. وهنتعرف إيه هو النظام المتري.

النظام المتري هو نظام قياس عشري. وحدات القياس الشائعة فيه، اللي بتُستخدم لقياس الطول هي الملليلتر … عفوًا الملليمتر، والسنتيمتر، والمتر، والكيلومتر.

هنلاقي العلاقة بين الوحدات إن الواحد سنتيمتر بيساوي عشرة ملليمتر. والمتر الواحد فيه مية سنتيمتر، أو ألف ملليمتر. الكيلومتر الواحد فيه ألف متر.

في صفحة جديدة، هنرسم جدول ونحط فيه كل وحدات القياس المستخدَمة في النظام المتري لقياس الطول.

لو بصينا على الجدول اللي قدامنا، هنلاحظ إن كل قيمة مكانية في الجدول بتساوي عشر أضعاف القيمة المكانية الواقعة على يمينها. يعني مثلًا الآلاف عبارة عن عشر … عفوًا الكيلو عبارة عن … الكيلومتر يعني عشر أضعاف الهكتو. والهكتو عبارة عن عشر أضعاف الديكو، وهكذا.

لمّا بنيجي نحوّل بين الوحدات المترية المختلفة، عشان هو نظام قياس عشري، بنضرب أو بنقسم على عشرة، مية، أو ألف. بنستخدم … لمّا نيجي نحوّل من وحدات كبيرة لوحدات صغيرة بنستخدم الضرب. ولو العكس بنحوّل من وحدات صغيرة لوحدات كبيرة هنستخدم القسمة.

عايزين مثلًا نحوّل من الكيلو إلى المتر. دي وحدة كبيرة هنحوّلها لوحدة صغيرة. فهنا هنستخدم الضرب. هنضرب في ألف. عشان الكيلومتر عبارة عن ألف متر. لو جينا نحوّل العكس من المتر للكيلو يعني من وحدة صغيرة لوحدة أكبر، هنستخدم في الحالة دي القسمة؛ عشان نحوّل لكيلومتر.

في صفحة جديدة هنشوف مثال.

لو مُعطى عندنا إن منى لديها شريط طوله خمسة أمتار. فكم سنتيمتر يبلغ طول الشريط؟

هنا إحنا مطلوب مننا نحوّل من وحدة المتر إلى وحدة السنتيمتر. يعني بنحوّل من وحدة كبيرة لوحدة صغيرة. يعني هنستخدم عملية الضرب.

إحنا عندنا المتر الواحد بيساوي مية سنتيمتر. يبقى لمّا يبقى عندنا خمسة متر، عايزين نعرف بيساوي كام سنتيمتر؛ يبقى هنضرب في مية. يعني هيبقى خمسة في مية هتساوي خمسمية سنتيمتر. وده طول الشريط بالسنتيمتر. يعني احتَجْنا نضرب عشان بنحوّل من وحدة كبيرة لوحدة صغيرة.

لمّا بنيجي بنضرب في عشرة، أو مية، أو ألف، أو مضاعفاتهم، اللي بيحصل إن الضرب بنحط النتيجة وبنحط عدد الأصفار الموجودة، سواء في العشرة أو في المية أو في الألف، جنب النتيجة. يعني الخمسة في مية هتبقى عبارة عن الخمسة وعندنا فيه صفرين في المية، هنحط جنبها صفرين هتبقى خمسمية. لو كنا بنضرب في عشرة، هنحط صفر واحد، فهتبقى خمسين. لو في ألف هنحط تلات أصفار جنب الناتج، فهتبقى خمسة آلاف، وهكذا.

هنشوف في صفحة جديدة مثال آخر، هنحوّل فيه من وحدات صغيرة إلى وحدات أكبر.

سارة لديها خمسين قطعة من الدومينو، طول القطعة أربعة سنتيمتر. إذا رتّبت القطع جنبًا إلى جنب كم مترًا سيبلغ طول هذا الصف من القطع؟

دلوقتي أول خطوة هنعملها عشان نحل المثال ده، هنجيب الطول الكلي الأول بالسنتيمتر؛ عشان إحنا عندنا طول القطعة بالسنتيمتر. طب الطول الكلي بالسنتيمتر هنحسبه إزاي؟ هيبقى عدد القطع في طول القطعة الواحدة اللي هو مُعطى بالسنتيمتر.

مُعطى عندنا عدد القطع بخمسين قطعة. وطول القطعة الواحدة أربعة سنتيمتر. ده معناها إن حاصل الضرب هيبقى ميتين سنتيمتر. ده كده الطول الكلي بالسنتيمتر.

الخطوة الثانية بقى اللي مطلوب مننا نعرف طول هذا الصف بس بالأمتار. يعني عايزين نحوّل من السنتيمتر إلى المتر. دلوقتي لمّا نحوّل من وحدة صغيرة لوحدة كبيرة هنستخدم القسمة. إحنا عارفين إن الواحد متر بيساوي مية سنتيمتر. يبقى لمّا أجي أحوّل من السنتيمتر للمتر هقسم على مية. يعني الطول الكلي هيبقى بيساوي ميتين، اللي هو الطول بالسنتيمتر. هنقسم على مية؛ عشان تطلع لنا النتيجة بالمتر.

لمّا بنيجي نقسم أي عدد على مية، بنشيل أو بنحذف عدد الأصفار من المقسوم والمقسوم عليه. بنحذف نفس عدد الأصفار. يعني هنيجي نحذف دلوقتي صفرين من المقسوم، وصفرين من المقسوم عليه. فهتبقى النتيجة في الحالة دي اتنين. اتنين متر. يعني الطول الكلي بالمترات هو اتنين متر. فيبقى كده طول الصف المكوّن من خمسين قطعة من الدومينو هو اتنين متر. وهي دي النتيجة المطلوبة.

كده يبقى اتعرفنا في الدرس ده على وحدات قياس الطول في النظام المتري، وإزاي بنقدر نحوّل من وحدة إلى أخرى.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.