فيديو: إيجاد المسافة بين ألواح موصلة

ما المسافة بين لوحين موصلين بينهما مجال كهربي شدتة ‎7.25 × 10^3V/m، إذا كان فرق الجهد بينهما 150kV؟

٠١:٢١

‏نسخة الفيديو النصية

ما المسافة بين لوحَين موصّلَين، بينهما مجال كهربي شدته سبعة وخمسة وعشرين من المية، في عشرة أُس تلاتة فولت على متر، إذا كان فرق الجهد بينهما مية وخمسين كيلوفولت؟

فلو عندنا لوحين موصّلين كبار، فرق الجهد ما بينهم بيساوي مية وخمسين كيلوفولت. هنلاقي اتكوّن ما بين اللوحين دول، مجال كهربي منتظم. وشدة المجال الكهربي ده، بتساوي سبعة وخمسة وعشرين من المية، في عشرة أُس تلاتة فولت على متر. والمطلوب منّنا إن إحنا نعرف المسافة ما بين اللوحين دول بتساوي كام.

فالمجال الكهربي المنتظم، اللي بيتكوّن ما بين منطقتين، بيساوي فرق الجهد ما بين المنطقتين دول، مقسوم على المسافة بين النقطتين دول. فإحنا كده ممكن من القانون ده، نجيب المسافة، عن طريق إن إحنا نضرب طرفين المعادلة، في 𝑑 على 𝐸. فده هيدّينا إن المسافة بتساوي فرق الجهد، مقسوم على المجال الكهربي المنتظم.

فلمَّا نعوّض بالقيم، هنلاقي إن الـ 𝑑 بتساوي مية وخمسين كيلوفولت، اللي هي قيمة فرق الجهد. مقسومة على شدة المجال الكهربي، اللي هي سبعة وخمسة وعشرين من المية، في عشرة أُس تلاتة فولت على متر. وممكن نعوّض مكان الكيلوفولت، بعشرة أُس تلاتة فولت. فنقدر كده نختصر الفولت مع الفولت، والعشرة أُس تلاتة مع العشرة أُس تلاتة. وده هيطلّع لنا إن الـ 𝑑 بتساوي اتنين وسبعة من المية متر.

وبكده نبقى عرفنا المسافة ما بين لوحين موصّلين، بمعرفة فرق الجهد والمجال الكهربي، اللي موجودين ما بينهم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.