فيديو: تحليل التمثيل بالصور

يوضح الفيديو كيفية تحليل البيانات الممثَّلة بالصور، وأمثلة عليها.

٠٤:٠٢

‏نسخة الفيديو النصية

تحليل التمثيل بالصور.

في الفيديو ده هنتعلم إزاي بنحلل البيانات الممثّلة بالصور. البيانات هي مجموعة من المعلومات، اللي بنحتاجها عشان نقيس حاجة معينة. وفيه طرق كتيرة لعرضها؛ عشان نسهّل على نفسنا قراءتها، والتعامل معاها. ومن الطرق دي، التمثيل بالصور. التمثيل بالصور بيبقى زيّ التمثيل بالعمليات الإحصائية. بس بدل ما نستخدم العلامات، بنستخدم الصور المختلفة. سواءً كانت كل صورة بتعبّر عن علامة واحدة، أو أكتر. هنوضح إزاي بنحلّل البيانات الممثّلة بالصور، في المثال ده.

هيظهر قدامنا جدول دلوقتي، بيعبّر عن الخضروات المفضلة لأصدقاء خالد. والمطلوب من الجدول، نحلّ الأسئلة دي. واحد: كم نوع من الخضار ظاهر قدامنا؟ هنبصّ في أول عمود في الجدول. هنلاقي مكتوب الكوسة، والذرة، والبازلّاء، والبطاطس. يبقى فيه في الجدول أربع أنواع من الخضار.

اتنين: كام واحد من أصدقاء خالد اختار الكوسة، أو البطاطس؟ من الجدول، هنلاقي الكوسة قدامها ست صور. والبطاطس قدامها سبع صور. ومن المفتاح، كل صورة بتمثّل اختيار واحد. يبقى المجموع، بتاع أصدقاء خالد اللي اختاروا الكوسة أو البطاطس، بيساوي ستة زائد سبعة، بيساوي تلتاشر.

تلاتة: كم عدد أصدقاء خالد، اللي اختاروا الذرة، أكتر من اللي اختاروا البازلّاء؟ من الجدول، هنلاقي الذرة قدامها خمس صور. والبازلّاء قدامها تلات صور. وعشان نعرف عدد اللي اختاروا الذرة، أكتر من عدد اللي اختاروا البازلّاء، يبقى هنحسب الفرق ما بينهم. والفرق هيساوي خمسة ناقص تلاتة هيساوي اتنين.

أربعة: ما نوع الخضار اللي بيحبه أقلّ عدد من أصدقاء خالد؟ هنبصّ في الجدول، هنلاقي إن أقل نوع قدامه صور، هو البازلّاء. لأنه قدامه تلات صور بس.

خمسة: كم عدد أصدقاء خالد اللي سألهم؟ عشان نعرف عدد أصدقاء خالد اللي سألهم، يبقى هنجمع عدد الصور كلها. يبقى مجموع الأصدقاء هيساوي … ستة، اللي هو عدد اللي اختاروا الكوسة. زائد خمسة، اللي هو عدد اللي اختاروا الذرة. زائد تلاتة، اللي هو عدد اللي اختاروا البازلّاء. زائد سبعة، اللي هو عدد اللي اختاروا البطاطس. هيساوي واحد وعشرين.

ستة: لو حبّينا نضيف خضار جديد للجدول، هنغير الجدول إزاي؟ لو حبّينا نضيف نوع جديد من الخضار للجدول، يبقى هنضيف صفّ جديد تحت البطاطس. ونكتب فيه اسم الخضار، ونحطّ قدامه عدد صور ليه، بيساوي عدد اللي اختاروه.

وبكده نبقى خلّصنا الفيديو ده. اللي شرحنا فيه إزاي بنحلّل البيانات الممثّلة بالصور.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.