فيديو: الأجزاء المتطابقة

غادة عليوة

يوضح الفيديو مفهوم الأجزاء المتطابقة، وأمثلة للتعرُّف من خلالها على هذا المفهوم، تمهيدًا للتعبير عن الأجزاء من الكل باستخدام الكسور.

٠٤:٠٨

‏نسخة الفيديو النصية

الأجزاء المتطابقة.

هنتعرّف في الدرس ده إزاي نقدر نميّز الأجزاء المتطابقة في أيّ شكل قدّامنا. يعني لو بصّينا على الشكل اللي قدّامنا ده هنلاقيه متقسّم لأربع أجزاء متطابقة. يعني إيه متطابقة؟ يعني أجزاء ليها نفس الشكل والحجم؛ متساويين بالظبط.

لو بصّينا على الشكل التاني، اللي ظاهر قدّامنا ده دلوقتي، هنلاقيه بيتكوّن من عدد من أجزاء متطابقة. يا ترى هو فيه كام جزء متطابق بيكوّنه الشكل اللي عندنا ده؟ هنعدّهم مع بعض: ده جزء، ده الجزء التاني، وده الجزء التالت. يبقى الشكل ده بيتكوّن من تلات أجزاء متطابقة.

لو بصّينا على الشكل اللي ظهر عندنا دلوقتي، عايزين نشوف عدد الأجزاء المتطابقة اللي بيتكوّن منها. الأجزاء المتطابقة لازم يبقى ليها نفس الشكل والحجم.

هنعدّ مع بعض دلوقتي مجموعة الأجزاء المتطابقة اللي بتكوّن الشكل ده: واحد، اتنين، تلاتة، أربعة. يبقى الشكل ده بيتكوّن من أربع أجزاء متطابقة. هنجيب صفحة جديدة ونكمّل مع بعض أمثلة أخرى.

البيتزا اللي قدّامنا دي كل واحدة منها متقسّمة لمجموعة من الأجزاء. يا ترى أيّ واحدة منهم متقسّمة لأجزاء متطابقة؟

هنبصّ على شكل شكل من الأشكال اللي عندنا. أول واحدة عندنا، اللي هي رقم واحد، هنلاحظ إن الجزء ده هو أكبر جزء من الأجزاء اللي بتتقسّم ليها البيتزا. يبقى البيتزا رقم واحد ما بتتكوّنش من أجزاء متطابقة.

أمّا لو بصّينا لبيتزا رقم اتنين فهنلاحظ إن تقريبًا واحد، اتنين، تلاتة، أربعة. هنلاحظ إن تقريبًا الأربع أجزاء اللي بتتكوّن منهم البيتزا متطابقة.

لو بصّينا للبيتزا رقم تلاتة فهنلاحظ إن الجزء ده يُعتبر أصغر جزء من الأجزاء اللي بتتكوّن منها البيتزا. يبقى البيتزا رقم تلاتة مش متقسّمة لمجموعة أجزاء متطابقة. هنجيب صفحة جديدة، ونكمّل مع بعض بعض التدريبات.

لو بصّينا للتدريب اللي قدّامنا ده هنلاقي مجموعة من الصور. كل شكل في صورة من الصور دي مطلوب تقسيمه لعدد من الأجزاء المتطابقة.

فأول شكل مثلًا مطلوب تقسيمه لجزئين متطابقين، فنقدر نقسّمه بالشكل ده إلى جزئين متطابقين.

أمّا الشكل رقم اتنين فمطلوب تقسيمه لتلات أجزاء متطابقة، فنقدر نقسّمه بالشكل ده إلى تلات أجزاء متطابقة.

الشكل رقم تلاتة هو كمان مطلوب تقسيمه لتلات أجزاء متطابقة، اللي هو تقريبًا هيبقى بالشكل ده. كده تقريبًا هنبقى قسّمناه لتلات أجزاء متطابقة.

أمّا البيتزا الموجودة في الشكل رقم أربعة فمطلوب تقسيمها لأربع أجزاء متطابقة، فهيكون تقسيمها بالشكل ده. كده تقريبًا هنكون قسّمناها لأربع أجزاء متطابقة.

اتعرّفنا في الدرس ده على مفهوم الأجزاء المتطابقة، ويعني إيه أجزاء متطابقة. يعني أجزاء ليها نفس الشكل والحجم اللي بيتكوّن منها شكل واحد. يعني مثلًا قطعة البيتزا ممكن تتكوّن من أربع أجزاء متساوية زيّ اللي قدّامنا في الصورة دي. وممكن نقسّمها لعدد آخَر من الأجزاء المتساوية. المهم إن الأجزاء دي عشان تبقى متطابقة لازم تبقى ليها نفس الشكل والحجم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.