فيديو: ترتيب أعداد مكوَّنة من ثلاثة أرقام ترتيبًا تنازليًّا

رتِّب ٤٦٧، ٦٤٧، ٤٧٦، ٧٦٤، ٦٧٤، ٧٤٦ ترتيبًا تنازليًّا.

٠٣:٥٦

‏نسخة الفيديو النصية

رتّب ربعمية سبعة وستين، وستمية سبعة وأربعين، وربعمية ستة وسبعين، وسبعمية أربعة وستين، وستمية أربعة وسبعين، وسبعمية ستة وأربعين؛ ترتيبًا تنازليًّا.

مطلوب منّنا في السؤال ترتيب الأعداد دي ترتيبًا تنازليًّا. يبقى أول حاجة تيجي في دماغنا شكل نزول السلم. وهنرتب الأعداد اللي عندنا ترتيب تنازلي من الكبير للصغير. يعني العدد الكبير هنخليه فوق عند أول سلّمة. والعدد الصغير هنخلّيه تحت عند آخر سلّمة.

دلوقتي عاوزين نرتّب الأعداد باستخدام القيمة المكانية من الكبير للصغير زي ما اتفقنا. وهنلاحظ إنه كل الأعداد اللي عندنا بتتكوّن من تلات أرقام. يعني كل عدد فيهم بيتكوّن من آحاد وعشرات ومئات. وعلشان نسهّل على نفسنا الحل، هنكتب الأعداد في الجدول ده. وعلشان نرتّب الأعداد دي ترتيبًا تنازليًّا من الكبير للصغير.

أول حاجة هنبُص عليها هي خانة المئات. وبعدين نقارن الأرقام اللي موجودين في خانة المئات مع بعض. ونشوف أنهي رقم الأكبر فيهم. هنلاقي هنا فيه أربعة، ستة، أربعة، سبعة، ستة، سبعة. السبعة أكبر من الستة وأكبر من الأربعة. يبقى هنختار العدد اللي المئات فيه بسبعة.

بس هنا فيه عددين المئات فيهم بسبعة. علشان العددين سبعمية أربعة وستين وسبعمية ستة وأربعين المئات فيهم بسبعة. يبقى هنروح لخانة العشرات في العددين دول، ونشوف أنهي عشرات فيهم أكبر الستة ولّا الأربعة. طبعًا الستة أكبر من الأربعة. علشان كده العدد الأكبر في الأعداد دي هيكون هو العدد ده سبعمية أربعة وستين. ويبقى العدد اللي أصغر منه على طول هو العدد سبعمية ستة وأربعين.

وممكن نكتب ترتيب الأعداد هنا على السلم؛ علشان ما ننساش. فأعلى سلّمة هنكتب العدد سبعمية أربعة وستين. وبعدين العدد الأصغر منه على طول سبعمية ستة وأربعين. وما ننساش نشطب على الأعداد اللي إحنا اخترناها من الجدول علشان ما تلخبطناش.

علشان نرتب بقية الأعداد هنكرّر اللي إحنا عملناه، وهنبُص على مئات الأعداد الباقية عندنا. ونقارن بين مئات الأعداد دي. هنلاقي عندنا إن فيه عددين المئات فيهم أربعة، وعددين المئات فيهم بستة. يبقى العددين اللي المئات فيهم بستة همّ الأكبر. طيب يا ترى العدد ستمية سبعة … طيب يا ترى العدد ستمية سبعة وأربعين أكبر، ولّا ستمية أربعة وسبعين أكبر؟ علشان نعرف أنهي أكبر، هنقارن بين العشرات في العددين. هنا فيه أربعة وهنا فيه سبعة. والسبعة أكبر من الأربعة. ده معناه إن العدد ستمية أربعة وسبعين أكبر من العدد ستمية سبعة وأربعين. وهنكمّل على ترتيب الأعداد وهنكتب العدد ستمية أربعة وسبعين، وبعدين العدد ستمية سبعة وأربعين. وهنشطب عليهم من الجدول.

وهيتبقّى لنا العددين دول: ربعمية سبعة وستين، وربعمية ستة وسبعين. المئات هنا زي المئات هنا أربعة وأربعة. يبقى هنقارن بين العددين عن طريق العشرات. العشرات هنا بستة، والعشرات هنا بسبعة. وعلشان السبعة أكبر من الستة. يبقي العدد ربعمية ستة وسبعين هيكون أكبر من العدد ربعمية سبعة وستين.

وبكده يبقى إحنا رتبنا الأعداد ترتيبًا تنازليًّا من الكبير للصغير. يعني إجابة السؤال هتكون: سبعمية أربعة وستين، وسبعمية ستة وأربعين، وستمية أربعة وسبعين، وستمية سبعة وأربعين، وربعمية ستة وسبعين، وربعمية سبعة وستين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.