فيديو: تحويل الأطوال من سنتيمتر إلى متر

مع رانيا ٧١ قطعة من الدومينو طول كلِّ قطعة منها ٤ سنتيمترات. إذا رصَّتها طرفًا لطرف كما هو موضَّح بالشكل، فما هو طول صف الدومينو الناتج بالمتر؟

٠٣:٣٥

‏نسخة الفيديو النصية

مع رانيا واحد وسبعين قطعة من الدومينو، طول كل قطعة منها أربعة سنتيمترات، فلو رصّتها طرفًا إلى طرف كما هو موضّح بالشكل، فما هو طول صف الدومينو الناتج بالمتر؟

يعني إيه الكلام ده؟ عرفنا إن رانيا أخدت واحد وسبعين قطعة من لعبة الدومينو وحطتهم جنب بعض عشان تعمل صف زي الصف اللي موجود في الشكل ده، فلو عرفنا إن طول القطعة الواحدة هو أربعة سنتيمتر، فيا ترى طول الصف كله اللي كوّنته رانيا بالواحد وسبعين قطعة هيكون طوله قد إيه؟ عشان نعرف الطول الكلي لصف الدومينو، هنوجد حاصل الضرب واحد وسبعين في أربعة، واحد وسبعين هو عدد مكوّن من رقمين، مكون من الرقم واحد وموجود في خانة الآحاد، والرقم سبعة موجود في خانة العشرات، عايزين نضربه في العدد أربعة، واللي هو موجود في خانة الآحاد. فأول حاجة هنضرب الرقم الأول اللي هو واحد اللي موجود في الآحاد في أربعة، واللي بيساوي أربعة. تاني حاجة هنضرب الرقم سبعة برضو في أربعة، وحاصل الضرب سبعة في أربعة إذا رجعنا لجدول الضرب بتاع العدد أربعة هنلاقيه بيساوي تمنية وعشرين.

وإذا برضو حبّينا نمثّلهم بطريقة النماذج وعدّينا النماذج دي هنلاقيها بتساوي تمنية وعشرين نموذج؛ فحاصل ضرب أربع صفوف وسبع دوائر هيساوي تمنية وعشرين؛ فبالتالي حاصل الضرب واحد وسبعين في أربعة هو العدد ميتين أربعة وتمانين سنتيمتر.

ولكن المطلوب هو طول صف الدومينو كله بوحدة المتر مش بالسنتيمتر، وإذا عرفنا إن العلاقة بين وحدة المتر ووحدة السنتيمتر هي إنه الواحد متر يساوي مية سنتيمتر؛ لأن وحدة السنتيمتر هي الوحدة الأصغر من وحدة المتر، فعشان نحوّل الطول بالسنتيمترات للطول بوحدة المترات هنقسم الناتج اللي طلّعناه على مية؛ فهيكون الطول بالمتر هو الكسر ميتين أربعة وتمانين على مية. واللي نقدر نكتبه بطريقة تانية، وهي إننا هنشيل صفر من المية ونحط مكانها علامة عشرية بالشكل ده بعد أول رقم من اليمين اللي هو الأربعة، فهتكون ميتين أربعة وتمانين على عشرة عشان شِلنا أول صفر، عايزين نشيل الصفر التاني، فهنخلي العلامة العشرية بعد الرقم اللي بعده، وهنمسح العلامة العشرية الأولانية، وهنشيل الصفر التاني من المية، فهيكون الميتين أربعة وتمانين مقسومة على واحد بإننا بدّلنا الأصفار بتاعة المية بعلامة عشرية، حطيناها بعد أول رقمين من العدد ميتين أربعة وتمانين، فبقى اسمها اتنين متر وأربعة وتمانين من مية، وهو ده طول صف الدومينو الناتج بالمتر؛ اتنين وأربعة وتمانين من مية متر، أو ميتين أربعة وتمانين على مية متر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.