فيديو: جمع كسور مُعطاة ذات مقامات غير مُتشابهة

أوجد ناتج −١٠٠/٣١ + ١٠/٣ في أبسط صورة.

٠٢:٣٥

‏نسخة الفيديو النصية

أوجد ناتج: سالب واحد وتلاتين على مية، زائد تلاتة على عشرة. في أبسط صورة.

عاوزين نجمع الكسرين دول: سالب واحد وتلاتين على مية، وتلاتة على عشرة. علشان نجمعهم، محتاجين نوحّد المقامات. طيّب هو أول كسر عندنا هو إيه؟ سالب واحد وتلاتين على مية. اللي عايزين نجمعه على تاني كسر، اللي هو تلاتة على عشرة. يعني إيه نوحّد المقامات؟ يعني نخلّي المقامات زيّ بعض. إحنا عندنا المقام الأول هنا مية، والمقام التاني عشرة. فهنخلّي العشرة دي مية. إزاي؟ إننا نضربها في عشرة.

طيّب إحنا ضربنا المقام في عشرة، يبقى لازم كمان نضرب البسط في عشرة. يبقى نضرب التلاتة كمان في عشرة. يبقى هتساوي … ننزّل السالب واحد وتلاتين على مية زيّ ما هي، والزائد، شرطة الكسر. فوق تلاتة في عشرة بتساوي تلاتين، وتحت عشرة في عشرة بمية. يبقى كده المقامات اتوحّدت، وبقت مية.

بعدين نكتب يساوي، وشرطة كسر. تحت مية، اللي هو المقام اللي إحنا وحّدناه. بعدين نبدأ نجمع. أول حاجة هنعملها هنقسم مية على مية. مية على مية فيها الواحد. الواحد ده نضربه في سالب واحد وتلاتين، هيدّينا سالب واحد وتلاتين. بعدين نقسم مية على الـمية دي، فيها الواحد برضو. بعدين نضرب الواحد في تلاتين، الواحد في تلاتين يساوي تلاتين. وطبعًا الإشارة زائد؛ لأننا بنجمع، ولأن التلاتين موجبة.

يبقى إحنا كده نتج عندنا كسر واحد. البسط فيه سالب واحد وتلاتين زائد تلاتين. لمّا نيجي نحلّها، مين العدد الكبير؟ هو الواحد وتلاتين. إشارته سالبة، يبقى النتيجة هتبقى بالسالب. ونطرح، واحد وتلاتين ناقص تلاتين، هيتبقّى لنا واحد. يبقى سالب واحد وتلاتين زائد تلاتين بتساوي سالب واحد. والمقام بتاعنا فيه مية، تنزل زيّ ما هي. يبقى كده ناتج الجمع بيساوي سالب واحد على مية. وهي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.