فيديو: جمع الأعداد العشرية

يوضح الفيديو كيفية جمع الأعداد العشرية باستخدام طريقتين (النماذج وترتيب العلامات العشرية بعضها فوق بعض).

٠٨:٥٣

‏نسخة الفيديو النصية

هنتكلّم في الفيديو ده عن جمع الأعداد العشرية.

هنتعرّف على طريقتين لجمع الأعداد العشرية، اللي همّ باستخدام النماذج، واستخدام ترتيب العلامات العشرية بعضها فوق بعض. وهنعرف كمان تطبيقات على جمع الأعداد العشرية.

في حياتنا، بنقابل حاجات كتير بنحتاج إن إحنا نجمع فيها الأعداد العشرية. زيّ مثلًا في المثال اللي قدامنا ده. قضى خالد واحد وخمسة من عشرة ساعة في المتحف يوم السبت، واتنين وتلاتة من عشرة ساعة يوم الأحد. ما الزمن الذي قضاه خالد في المتحف في اليومين معًا؟

علشان نعرف نحسب الزمن اللي قضاه خالد في المتحف في اليومين معًا، بنجمع العددين؛ اللي هو عدد الساعات يوم السبت، وعدد الساعات يوم الأحد. اللي هي واحد وخمسة من عشرة ساعة، واتنين وتلاتة من عشرة ساعة. يبقى المطلوب إن إحنا نجمع واحد وخمسة من عشرة، زائد اتنين وتلاتة من عشرة، ونشوف هتساوي كام. علشان نجمع الأعداد العشرية دي، هنستخدم طريقتين؛ طريقة النماذج، والطريقة التانية: ترتيب العلامات العشرية بعضها فوق بعض. هنعرف الأول طريقة النماذج، وبعدين نشوف طريقة العلامات العشرية بعضها فوق بعض.

لجمع واحد وخمسة من عشرة زائد اتنين وتلاتة من عشرة باستخدام النماذج، هنمثّل العدد الأول بالنماذج؛ الواحد والخمسة من عشرة، بالشكل ده. ده بيمثّل الواحد، ودي بتمثّل الخمسة من عشرة. وهنجمعهم على العدد التاني، اللي هو اتنين وتلاتة من عشرة، اللي بنمثّلهم بالشكل ده. ده الاتنين، ودي التلاتة من عشرة. النماذج … هنا الخمسة من عشرة عبارة عن … دي واحد من عشرة، ودي واحد من عشرة، ودي واحد من عشرة، وواحد من عشرة، وواحد من عشرة، كوّنوا لنا الخمسة من عشرة. وهنا التلاتة من عشرة عبارة عن واحد من عشرة، واحد من عشرة، واحد من عشرة كوّنوا لنا التلاتة من عشرة. والواحد عبارة عن واحد، اتنين، تلاتة، أربعة، خمسة، ستة، سبعة، تمنية، تسعة، عشرة، اللي بتكّون لنا الواحد الصحيح.

علشان نجمع النماذج، فهنجمع الواحد زائد الاتنين، يبقى تلاتة. وعندنا: واحد، اتنين، تلاتة، أربعة، خمسة، ستة، سبعة، تمنية. يبقى تلاتة وتمنية من عشرة هو ناتج جمع النماذج اللي قدامنا دي. يبقى واحد وخمسة من عشرة زائد اتنين وتلاتة من عشرة هيساوي التلاتة والتمنية من عشرة. كده عرفنا طريقة استخدام النماذج.

هنعرف طريقة استخدام ترتيب العلامات العشرية. ترتيب العلامات العشرية بعضها فوق بعض … بنرتّب الأعداد بالشكل ده. بنحطّ الواحد والخمسة من عشرة بالشكل ده. ونحطّ تحتها العدد التاني، بحيث إن العلامة العشرية بتاعة العدد التاني تحت العلامة العشرية بتاعة العدد الأولاني. وبعدين نكمّل العدد، يعني هنا العدد التاني … هتبقى الاتنين تحت الواحد، اللي هو الآحاد في العدد الأولاني. والتلاتة من عشرة تحت الخمسة من عشرة بالظبط. وبعدين نجمعهم رأسي كده. الخمسة زائد التلاتة تبقى تمنية. وبعدين ننزّل العلامة العشرية. والواحد زائد الاتنين هتبقى تلاتة. يبقى نتيجة الجمع تلاتة وتمنية من عشرة.

نشوف أمثلة كمان. احسب سبعين وخمسة وسبعين من مية زائد تمنية وسبعين وتسعة من عشرة.

هنستخدم طريقة ترتيب العلامات العشرية. يعني هنحطّ العدد سبعين وخمسة وسبعين، تحتيه العدد التاني. نحطّ الفاصلة العشرية الأول، اللي هي العلامة العشرية. وبعدين نرتّب الآحاد تحت الآحاد، والعشرات تحت العشرات، والأجزاء من العشرة، والأجزاء من المية. يعني العدد التاني هتبقى التمنية تحت الصفر. وبعدين السبعة تحت السبعة. وبعدين نحطّ تسعة تحت السبعة. الخمسة مش تحتها حاجة، هنكمّل بصفر على يمين العدد. وده ما بيبقاش له قيمة. وبعد كده هنجمع الخمسة زائد الصفر، هتبقى خمسة. والسبعة زائد التسعة ستاشر. وما فيش مكان للواحد، فهنحطّها هنا، ونجمعها على الصفر. يبقى واحد وصفر، واحد. زائد التمنية، تسعة. وننزّل العلامة العشرية في مكانها. والسبعة زائد السبعة، أربعتاشر. يبقى ناتج الجمع هو مية تسعة وأربعين وخمسة وستين من مية.

احسب سبعة وتلاتين زائد خمسة وسبعين من مية.

العدد سبعة وتلاتين ما فيهوش علامة عشرية، فبنزوّد له علامة عشرية، وبعدها أصفار على قدّ عدد الخانات اللي موجودة في العدد التاني. وبعدين نرتّبهم. سبعة وتلاتين، والصفرين بعد العلامة العشرية. والعدد اللي تحته هيبقى الخمسة وسبعين هتيجي تحت الصفرين. وبعدين العلامة العشرية، وبعدين نجمعهم. يبقى هنا صفر زائد الخمسة، هتبقى خمسة. صفر زائد السبعة، هتبقى سبعة. وبعدين نحطّ العلامة العشرية، والسبعة هتنزل زيّ ما هي؛ لأن ما فيش حاجة تتضاف عليها. والتلاتة ما فيش حاجة تتضاف عليها، هتنزل زيّ ما هي. يبقى الناتج هيساوي سبعة وتلاتين وخمسة وسبعين من مية.

تحتوي سلة على أربعة وعشرين وواحد من عشرة كيلوجرام من التفاح. وتحتوي سلة أخرى على واحد وعشرين وخمسة من عشرة كيلوجرام من التفاح. ما إجمالي وزن التفاح في السلّتين؟

هنا هنجمع الأربعة وعشرين وواحد من عشرة على الواحد وعشرين وخمسة من عشرة. أربعة وعشرين وواحد من عشرة هنرتّب تحتها الواحد وعشرين والخمسة من عشرة. العلامة العشرية هنحطّ بعدها الخمسة، وقبلها الواحد والاتنين. وبعدين نجمع العددين. هنجمع الواحد زائد الخمسة يبقى ستة. وبعدين العلامة العشرية تنزل معانا. والأربعة زائد الواحد يبقى الخمسة. والاتنين زائد الاتنين فيها الأربعة. يبقى إجمالي وزن التفاح في السلّتين خمسة وأربعين وستة من عشرة كيلوجرام.

احسب محيط الشكل. مثلث أطوال أضلاعه متساوية: سبعة وتسعة وتلاتين من مية سنتيمتر.

محيط الشكل بيساوي مجموع أطوال أضلاعه. يبقى هنجمع السبعة وتسعة وتلاتين من مية، زائد سبعة وتسعة وتلاتين من مية، وزائد سبعة وتسعة وتلاتين من مية؛ علشان نحسب محيط الشكل. هنجمع أول عددين على بعض، وبعد كده نجمع عليهم العدد التالت. هنرتّبهم؛ يبقى سبعة وتسعة وتلاتين من مية تحتها السبعة وتسعة وتلاتين من مية، ونجمعهم على بعض. يبقى التسعة زائد التسعة تمنتاشر. معانا الواحد. واحد وتلاتة، أربعة. وتلاتة، سبعة. العلامة العشرية تنزل معانا. وبعدين السبعة زائد السبعة، أربعتاشر.

وبعد كده هنجمع العدد التالت، اللي هو سبعة وتسعة وتلاتين من مية. التسعة زائد التمنية، سبعتاشر. معانا الواحد. واحد وسبعة، تمنية. وتلاتة، حداشر. واحد، ونحطّ العلامة العشرية. وهيتبقّى معانا واحد. أربعة زائد الواحد، الخمسة. وسبعة، اتناشر. اتنين، وهيتبقّى معانا الواحد. الواحد زائد الواحد يبقى اتنين. يبقى محيط الشكل يساوي اتنين وعشرين وسبعتاشر من مية سنتيمتر.

اتكلّمنا في الفيديو ده عن جمع الأعداد العشرية. عرفنا طريقتين؛ طريقة استخدام النماذج، وطريقة ترتيب العلامات العشرية بعضها فوق بعض. وكمان اتكلّمنا عن تطبيقات على جمع الأعداد العشرية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.