فيديو: حل معادلات الضرب عقليًّا

أحمد مدحت

يوضح الفيديو كيفية حل معادلات الضرب عقليًّا، مع أمثلة توضيحية.

٠٣:٥٢

‏نسخة الفيديو النصية

هنتكلّم عن حل معادلات الضرب عقليًّا. هدفنا من الفيديو ده، إن إحنا نعرف نحل معادلات الضرب عقليًّا. يعني من غير استخدام الآلة الحاسبة. وده هيكون من خلال أمثلة. هنبدأ بالمثال الأول. في المثال الأول، عايزين نحل المعادلة: اتنين ن يساوي ستة.

بالنسبة للمعادلة اللي عندنا دي، هي معادلة ضرب. وده لأن الطرف الأيمن من المعادلة، واللي هو اتنين ن، معناه اتنين في ن. وإحنا عايزين نحل المعادلة عقليًّا، يعني عايزين نوجد قيمة ن، من غير استخدام الآلة الحاسبة. فهنكتب المعادلة اللي عندنا مرة كمان. والمعادلة هي: اتنين ن يساوي ستة.

وبما إن اتنين ن معناها اتنين في ن. فعلشان نوجد قيمة ن. هنشوف من جدول الضرب للعدد اتنين. إيه العدد اللي لمّا نضربه في اتنين. يكون حاصل الضرب هو ستة. فمن جدول الضرب بتاع العدد اتنين، هنلاقي اتنين في تلاتة، يساوي ستة. معنى كده إن ن تساوي تلاتة. وبكده يبقى إحنا أوجدنا قيمة ن، يعني حلّينا المعادلة.

بعد كده هنشوف المثال التاني. في المثال التاني عايزين نحل المعادلة: عشرين يساوي خمسة ع. بالنسبة للمعادلة اللي عندنا، هي معادلة ضرب. وده لأن خمسة ع، معناها خمسة في ع. وعلشان نحل المعادلة دي عقليًّا، فإحنا هنوجد قيمة ع من غير استخدام الآلة الحاسبة. فهنكتب المعادلة اللي عندنا مرة كمان. المعادلة هي: عشرين يساوي خمسة ع.

وبما إن خمسة ع معناها خمسة في ع. فهنشوف من جدول الضرب للعدد خمسة. إيه العدد اللي لمّا نضربه في خمسة. يكون حاصل الضرب هو عشرين. فمن جدول الضرب للعدد خمسة، هنلاقي إن عشرين تساوي خمسة في أربعة. معنى كده إن ع تساوي أربعة. وبكده بعد ما أوجدنا قيمة ع، هيبقى حل المعادلة هو ع تساوي أربعة.

بعد كده هنشوف المثال التالت. في المثال التالت عايزين نحل المعادلة: أربعة ب يساوي ستاشر. أول حاجة هنكتب المعادلة اللي عندنا مرة كمان. والمعادلة هي: أربعة ب يساوي ستاشر. وعلشان نحلّها، يعني علشان نوجد قيمة ب …

فبالنسبة لأربعة ب، معناها أربعة في ب. بالتالي هنشوف من جدول الضرب للعدد أربعة. إيه العدد اللي لمّا نضربه في أربعة. هيكون حاصل الضرب هو ستاشر. فهنلاقي أربعة في أربعة يساوي ستاشر. معنى كده إن ب تساوي أربعة. وكده يبقى إحنا جِبنا قيمة ب، يعني حلّينا المعادلة.

بعد كده هنشوف المثال الرابع. في المثال الرابع عايزين نحلّ المعادلة: واحد وعشرين يساوي سبعة س. هنكتب المعادلة مرة كمان. المعادلة هي: واحد وعشرين يساوي سبعة س. بعد كده علشان نوجد قيمة س، هنلاقي سبعة س معناها سبعة في س.

معنى كده علشان نوجد قيمة س. هنشوف من جدول الضرب للعدد سبعة. إيه هو العدد اللي لمّا نضربه في سبعة. هيكون حاصل الضرب هو واحد وعشرين. فهنلاقي واحد وعشرين يساوي سبعة في تلاتة. معنى كده إن س تساوي تلاتة. وهو ده حل المعادلة.

بعد كده هنشوف مثال كمان. في المثال الخامس عايزين نحلّ المعادلة: اتنين وسبعين يساوي تسعة أ. هنكتب المعادلة مرة كمان. والمعادلة هي: اتنين وسبعين يساوي تسعة أ. بالنسبة للمعادلة دي، هي معادلة ضرب. وده لأن تسعة أ، معناها تسعة في أ.

فبالتالي علشان نوجد قيمة أ ونحلّ المعادلة. فهنشوف من جدول الضرب بتاع العدد تسعة. إيه العدد اللي لمّا نضربه في تسعة. يكون حاصل الضرب هو اتنين وسبعين. هنلاقي اتنين وسبعين يساوي تسعة في تمنية. معنى كده إن أ تساوي تمنية. كده يبقى إحنا جِبنا قيمة أ، يعني حلّينا المعادلة.

بكده يبقى إحنا من خلال الفيديو ده، عرفنا إزّاي نحل معادلات الضرب، من غير استخدام الآلة الحاسبة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.