فيديو: إيجاد الكسور المتكافئة

يوضح الفيديو ما الكسور المتكافئة، ويوضح كيفية إيجادها باستخدام نماذج الكسور والصور، وأمثلة على ذلك.

٠٢:٥٥

‏نسخة الفيديو النصية

إيجاد الكسور المتكافئة.

في الفيديو ده هنعرف إيه هي الكسور المتكافئة، وإزّاي نوجدها. كل كسرين مختلفين أو أكتر، بيعبّروا عن نفس الكمية، بنسميهم كسور متكافئة. يعني مثلًا مصطفى عنده مكتبة من تلات رفوف. فيه رف واحد منهم فيه كتب. فقال لصديقه إن واحد على تلاتة من الرفوف، أو ثُلث الرفوف، فيه كتب. فهل فيه كسر تاني معبّر عن الكتب اللي في المكتبة؟

فيه أكتر من طريقة لإيجاد الكسور المتكافئة. واحد: باستخدام نماذج الكسور. هيظهر قدامنا تلات أشكال. الشكل الأول بيوضّح مستطيل كامل. الشكل التاني بيوضّح مستطيل بنفس المساحة، متقسّم لتلات أجزاء متساوية. واحد منهم متلوّن، وبيعبّر عن واحد على تلاتة من المستطيل. الشكل التالت بيوضّح مستطيل بنفس المساحة، متقسّم لستّ أجزاء متساوية. كل واحد منهم معبّر عن واحد على ستة من المستطيل. فكم جزء من الشكل التالت، هيساوي جزء من الشكل التاني؟

هنلاقي إن جزئين من الشكل التالت، بيساوي جزء من الشكل التاني. وبما إن الجزء في الشكل التالت معبّر عن واحد على ستة، يبقى جزئين معبّرين عن اتنين على ستة. يبقى الجزء الملوّن في الشكل التاني معبّر عن واحد على تلاتة. والجزء الملوّن في الشكل التالت معبّر عن اتنين على ستة. وبكده نقدر نقول إن واحد على تلاتة، بيساوي اتنين على ستة.

نقسم الصفحة. الطريقة التانية: باستخدام الصور. هتظهر قدامنا دائرة متقسّمة لتلات أجزاء متساوية. هنلاقي إن جزء منهم ملوّن، وهو بيعبّر عن واحد على تلاتة من الدائرة. فلو عاوزين نقسّم الدائرة لستّ أجزاء متساوية، فكام جزء هيكون ملوّن؟ هتظهر نفس الدائرة متقسّمة لستّ أجزاء متساوية. هنلاقي إن الجزء الملوّن في الشكل الأول، بيساوي جزئين ملوّنين في الشكل التاني. والجزء الملوّن في الشكل الأول، بيعبّر عن واحد على تلاتة. والجزء الملوّن في الشكل التاني، بيعبّر عن اتنين على ستة. يبقى واحد على تلاتة، واتنين على ستة، كسرين متكافئين.

وبكده نبقى خلّصنا الفيديو ده. اللي اتعرّفنا فيه على الكسور المتكافئة، وإزّاي بنوجدها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.