فيديو: حل المسائل الكلامية التي تتضمَّن طرح الأعداد حتى ٩٩٩

كتاب مُكوَّن من ٧٣٠ صفحة. قرأ طالب ٥٧٤ صفحة بالأمس، وقرأ ١٤٥ صفحة منه اليوم. ما عدد الصفحات المُتبقِّية؟

٠٣:٠٥

‏نسخة الفيديو النصية

كتاب مكوَّن من سبعمية وتلاتين صفحة، قرأ طالب خمسمية أربعة وسبعين صفحة منه بالأمس، وقرأ مية خمسة وأربعين صفحة منه اليوم. ما عدد الصفحات المتبقية؟

يبقى عدد صفحات الكتاب كلها على بعض سبعمية وتلاتين صفحة. قرَا منهم بالأمس خمسمية أربعة وسبعين صفحة. واليوم قرَا مية خمسة وأربعين صفحة. يبقى مجموع الصفحات اللي قراها بالأمس، زائد الصفحات اللي قراها اليوم، هيبقى هو ده الصفحات اللي قراها لغاية دلوقتي.

طيب إحنا عايزين نعرف عدد الصفحات المتبقية. يبقى ببساطة هنجمع عدد الصفحات اللي قراها الأمس واليوم، وبعدين نطرح مجموع الصفحات اللي اتقرت دي من الصفحات الكلية للكتاب، وناتج الطرح هيبقى بيمثّل عدد الصفحات المتبقية.

خلّينا نبدأ بعملية الجمع الأول. هنحط عدد الصُّفَح اللي قراها بالأمس، ونجمع عليه عدد الصفح اللي قراها اليوم. نتأكد إن إحنا حاطين كل رقم من الأرقام اللي بيتكوِّن منها العددين في الخانة المكانية الصحيحة. وبنبتدي نجمع دايمًا من خانة الآحاد. هنجمع أربعة زائد خمسة يبقى المجموع تسعة. هنبدأ دلوقتي نجمع الأرقام اللي في خانة العشرات. سبعة زائد أربعة يبقى مجموعهم حداشر. هنحط واحد في خانة العشرات، والواحد اللي باقي هنحطه فوق خانة المئات. ونبدأ نجمع الأرقام اللي في خانة المئات. واحد زائد خمسة يبقى ستة، زائد واحد يبقى سبعة.

كده يبقى مجموع الصفحات اللي قراها لغاية دلوقتي هو سبعمية وتسعتاشر صفحة. هنطرح بقى عدد الصفحات اللي هو قراها من عدد الصفحات الكتاب الكلية؛ عشان نحصل على الصفحات المتبقية. الكتاب بيتكوِّن من سبعمية وتلاتين صفحة. قرا منهم لغاية دلوقتي سبعمية وتسعتاشر؛ يعني عايزين نطرح سبعمية وتسعتاشر من سبعمية وتلاتين.

بنتأكد إن العددين محطوطين بحيث إن كل رقم من الأرقام اللي بيتكوِّن منها العددين موجود في الخانة المكانية الصحيحة. وبنبدأ الطرح دايمًا من خانة الآحاد. صفر ناقص تسعة. مش هينفع نطرح التسعة من الصفر عشان التسعة أكبر. فهنبتدي نروح للخانة المكانية اللي قبلها اللي هي خانة العشرات. هنلاقي فيها الرقم تلاتة، هناخد منه واحد؛ فهيصبح فيها الرقم اتنين. والواحد اللي هناخده من خانة العشرات هيمثّل عشرة في خانة الآحاد. فكده خانة الآحاد هيبقى فيها عشرة.

دلوقتي نرجع نطرح الأرقام اللي في خانة الآحاد. عشرة ناقص تسعة يساوي واحد. وبعدين نطرح الأرقام اللي في خانة العشرات. اتنين ناقص واحد يساوي واحد. آخر حاجة الأرقام اللي في خانة المئات سبعة ناقص سبعة هيساوي صفر. يبقى ناتج عملية الطرح هيبقى حداشر. كده قدرنا نعرف عدد الصفحات المتبقية اللي هيكون حداشر صفحة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.