نسخة الفيديو النصية
مثلث متساوي الأضلاع. محيطه يساوي محيط مستطيل طوله خمسة سنتيمتر، وعرضه أربعة سنتيمتر. اوجد طول أحد أضلاع المثلث.
أول حاجة بما إن محيط المثلث متساوي الأضلاع ده بيساوي محيط المستطيل المذكور، لازم نوجد محيط المستطيل الأول. وده بيتمّ من خلال القانون التالي: محيط المستطيل يساوي الطول زائد العرض، مضروب مجموعهم في اتنين. بالتعويض عن طول وعرض المستطيل، يبقى خمسة زائد أربعة، مضروب في اتنين. يبقى خمسة زائد أربعة تسعة، في اتنين، يبقى الناتج هيساوي تمنتاشر سنتيمتر.
يبقى محيط المثلث أيضًا، لأنه بيساوي محيط المستطيل، هيساوي تمنتاشر سنتيمتر. وبما إن محيط المثلث متساوي الأضلاع يمكن حسابه مِ القانون التالي: محيط المثلث متساوي الأضلاع يساوي تلاتة في طول ضلعه. بالتعويض عن المحيط، يبقى تمنتاشر تساوي تلاتة في طول ضلعه. بعد كده هنقسم الطرفين على تلاتة، يبقى قسمة الطرفين على تلاتة عشان نقدر نوجد طول ضلعه. يبقى طول ضلعه هيساوي تمنتاشر على التلاتة، بيساوي ستة سنتيمتر. يبقى طول ضلع هذا المثلث متساوي الأضلاع يساوي ستة سنتيمتر.
