فيديو: تحديد وضع نقطة بعد الانعكاس في مستقيم معطًى بمعلومية إحداثيات النقطة

ما إحداثيات الانعكاس في الخط س = ٢، للنقطة (−٥، ٩)؟

٠٢:٥٧

‏نسخة الفيديو النصية

ما إحداثيات الانعكاس في الخط س تساوي اتنين، للنقطة سالب خمسة وتسعة؟

عندنا النقطة سالب خمسة وتسعة، ومطلوب إننا نجيب إحداثيات الانعكاس للنقطة دي، في الخط س تساوي اتنين. في البداية، إيه هو الانعكاس؟ الانعكاس نوع من أنواع التحويلات الهندسية. ويعني إيه التحويل الهندسي؟ التحويل الهندسي هو عملية نقل شكل إلى آخَر. الانعكاس هو صورة المرآة التي تتكوّن بقلب الشكل فوق مستقيم، ويسمى المستقيم محور الانعكاس. أمّا الصورة، فهي حالة الشكل بعد إجراء التحويل عليها.

يعني عشان أجيب إحداثيات الانعكاس للنقطة سالب خمسة وتسعة في الخط س تساوي اتنين، هرسم محورَي الإحداثيات س وَ ص. وهحدّد مكان النقطة سالب خمسة وتسعة. النقطة سالب خمسة وتسعة، الإحداثي السيني ليها سالب خمسة، والإحداثي الصادي ليها تسعة. يعني هتحرّك على محور السينات لحدّ سالب خمسة، وأطلع على محور الصادات لحدّ تسعة. وبكده هنكون جِبنا مكان النقطة سالب خمسة وتسعة.

بعد كده هنحدّد محور الانعكاس، وهو الخط س تساوي اتنين. يعني عند محور السينات هحدّد النقطة اللي عندها س تساوي اتنين، وهرسم خط رأسي. عند س تساوي اتنين هرسم خط رأسي، وهو ده هيكون محور الانعكاس. عشان نجيب إحداثيات نقطة الانعكاس، هنعدّ عدد الوحدات بين النقطة ومحور الانعكاس. واحد، اتنين، تلاتة، أربعة، خمسة، ستة، سبعة. وبعد كده هنعيّن نقطة في الجهة الأخرى من محور الانعكاس على نفس البُعد. يعني على بُعد سبع وحدات من محور الانعكاس.

هنعدّ سبعة وحدات: واحد، اتنين، تلاتة، أربعة، خمسة، ستة، سبعة. وبكده هنكون جِبنا صورة النقطة سالب خمسة وتسعة، بالانعكاس حول محور الانعكاس س تساوي اتنين. لمّا هنجيب الإحداثي السيني للنقطة، هنلاقيه تسعة، والإحداثي الصادي للنقطة ما اتغيّرش. وبكده إحداثيات نقطة الانعكاس هي تسعة وتسعة. وهي دي صورة النقطة سالب خمسة وتسعة، بعد الانعكاس حوْل محور الانعكاس س تساوي اتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.