فيديو: تبسيط كثيرات الحدود عن طريق القسمة للتعبير عن طول مستطيل

ما طول مستطيل مساحته ١٠ﺱ^(٦)ﺹ سم^٢ وعرضه ٥ﺱﺹ سم؟

٠٢:٢١

‏نسخة الفيديو النصية

ما طول مستطيل مساحته عشرة س أُس ستة ص سنتيمتر مربع، وعرضه خمسة س ص سنتيمتر؟

في الأول خلّينا نفتكر إن مساحة المستطيل بتساوي حاصل ضرب طوله في عرضه، ومعطى عندنا في السؤال مساحة المستطيل عشرة س أُس ستة ص، فهنعوّض عنها في مساحة المستطيل. ومعطى عندنا عرض المستطيل خمسة س ص، فهنعوّض عن العرض بخمسة س ص. فيبقى عندنا الطول، وهو اللي عايزين نوجده.

وعشان نوجد الطول، يبقى هنقسِم طرفَي المعادلة على خمسة س ص؛ ‏فهيبقى الطرف الأيمن للمعادلة عشرة س أُس ستة ص على خمسة س ص. ففي الأول هنختصر عشرة مع خمسة؛ فيبقى هنا اتنين وهنا واحد، فهيبقى عندنا اتنين. بعد كده هنقسم س أُس ستة على س.

وخلّينا نفتكر إننا لمّا بنقسِم أعداد مرفوعة لأسس وليها الأساس نفسه، فإحنا بنطرح الأسس، فبالتالي لمّا نقسِم س أُس ستة على س، هنطرح الأسس؛ يعني هنطرح ستة ناقص واحد؛ لأن س هنا معناها س أُس واحد، فهتبقى بتساوي س أُس ستة ناقص واحد. بعد كده هنقسم ص على ص، واللي هتساوي واحد. فيبقى عندنا الطرف الأيمن للمعادلة اتنين س أُس ستة ناقص واحد، وستة ناقص واحد بتساوي خمسة، فنقدر نكتبها اتنين س أُس خمسة.

وأما الطرف الأيسر للمعادلة، اللي هو الطول في خمسة س ص على خمسة س ص، فنقدر نختصر خمسة مع خمسة، ونختصر س مع س، ونختصر ص مع ص. فهيتبقى عندنا الطول في الطرف الأيسر للمعادلة.

فبالتالي هيبقى عندنا الطول بيساوي اتنين س أُس خمسة. وبما إننا بنحسب طول، فيبقى الوحدة بالسنتيمتر؛ فبالتالي هيبقى طول المستطيل هو اتنين س أُس خمسة سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.