فيديو: القسمة على ٨ وعلى ٩

يوضِّح الفيديو طريقة القسمة على ٨ وعلى ٩ باستعمال النماذج وطرق أخرى.

٠٤:٣٥

‏نسخة الفيديو النصية

هنتكلم عن القسمة على تمنية، وعلى تسعة. هنستعمل النماذج، وطرق أخرى؛ عشان نجيب ناتج القسمة على تمنية، وعلى تسعة. هبتدي الشرح بالمثال التالي. لوحة الرموز المجاورة، تبيِّن عدد الطلاب، وعدد الزيارات للمتحف. إذا كان عدد الطلاب الذين قاموا بزيارة المتحف مرتين أو أكتر، اتنين وتلاتين طالب. فكم إيد هنستعملها؛ عشان نمثّل الفصل ده؟

عشان نجيب عدد الرموز اللي هنستعملها، لتمثيل الفصل المكوّن من اتنين وتلاتين طالب. هنجيب ناتج قسمة اتنين وتلاتين على تمنية؛ لأن كل إيد بتمثّل تمن طلاب. هنلاحظ إن ممكن نستعمل حقائق الضرب المترابطة؛ عشان نجيب ناتج القسمة. هنحلّ بطريقتين.

الطريقة الأولى: هنستعمل الضرب. عشان أجيب اتنين وتلاتين على تمنية يساوي كام، هفكّر: تمنية في كام هيساوي اتنين وتلاتين؟ يعني إيه العدد اللي هضربه في تمنية؛ عشان يكون ناتج الضرب اتنين وتلاتين؟ هلاحظ إنه تمنية في أربعة هيساوي اتنين وتلاتين. وبكده أقدر أقول إنه اتنين وتلاتين على تمنية، هيساوي أربعة. يعني هحتاج أربع رموز عشان أعبّر عن الفصل المكوّن من اتنين وتلاتين طالب.

الطريقة التانية هنستعمل القسمة. هنفكّر إزاي؟ برضو هقول: اتنين وتلاتين على تمنية، هيساوي كام؟ هفكّر: اتنين وتلاتين على كام هيساوي تمنية؟ هلاحظ إنه اتنين وتلاتين على أربعة، هيساوي تمنية. وبكده أقدر أقول إنه اتنين وتلاتين على تمنية، هيساوي أربعة. يعني برضو حصلت على أربعة. يعني هحتاج أربع رموز عشان أعبّر عن الفصل المكوّن من اتنين وتلاتين طالب.

هنكمل في الصفحة اللي جاية. مثال: صنعت علياء وتمنية من أصدقائها سبعة وعشرين نجمة ملوّنة. إذا وُزِّعت بينهم بالتساوي، فكم نجمة هتحصل عليها كل واحدة؟

عشان أجيب عدد النجوم اللي هتحصل عليها كل واحدة، هجيب ناتج قسمة سبعة وعشرين على تسعة. لأنه علياء وتمنية أصدقاء، يعني تسع أشخاص. أو هستعمل الرمز التاني للقسمة؛ سبعة وعشرين على تسعة. هنستعمل الطرح المتكرر. هبتدي بالعدد سبعة وعشرين، وكل مرة هطرح تسعة؛ لحدّ ما أوصل لصفر.

سبعة وعشرين ناقص تسعة، هيساوي تمنتاشر. تمنتاشر ناقص تسعة، هيساوي تسعة. وأخيرًا تسعة ناقص تسعة، هيساوي صفر. هلاحظ إني طرحت العدد تسعة، تلات مرات، لحدّ ما وصلت لصفر. وبكده أقدر أقول إنه ناتج قسمة سبعة وعشرين على تسعة، هيساوي تلاتة. أو باستعمال رمز القسمة التاني، سبعة وعشرين على تسعة، هيساوي برضو تلاتة. يعني كل واحدة هتاخد تلات نجوم ورقية ملوّنة.

هنكمّل في الصفحة اللي جاية. تدريبات: استعمِل الحقائق المترابطة، أو الطرح المتكرر، لإيجاد ناتج القسمة. رقم واحد: تمنتاشر على تسعة. عشان أجيب ناتج قسمة تمنتاشر على تسعة، هستعمل الحقائق المترابطة. هفكّر: تمنتاشر على تسعة هيساوي كام؟ إذن تسعة في كام هيساوي تمنتاشر؟ هفكّر إيه العدد اللي هضربه في تسعة، عشان يكون الناتج تمنتاشر. هلاحظ إنه حاصل ضرب تسعة في اتنين، هيساوي تمنتاشر. وبالتالي ناتج القسمة هيساوي اتنين.

سؤال رقم اتنين: تمنية وأربعين على تمنية. عشان أجيب ناتج القسمة، هستعمل الطرح المتكرر. هبتدي بالعدد تمنية وأربعين، وكل مرة هطرح تمنية، لحدّ ما أوصل لصفر. تمنية وأربعين ناقص تمنية، هيساوي أربعين. أربعين ناقص تمنية، هيساوي اتنين وتلاتين. اتنين وتلاتين ناقص تمنية، هيساوي أربعة وعشرين. أربعة وعشرين ناقص تمنية، هيساوي ستاشر. ستاشر ناقص تمنية، هيساوي تمنية. وأخيرًا تمنية ناقص تمنية، هيساوي صفر. إذن هلاحظ إني طرحت العدد تمنية، ست مرات، لحدّ ما وصلت لصفر. وبكده أقدر أقول إن ناتج قسمة تمنية وأربعين على تمنية، هيساوي ستة.

وبكده هنكون اتعلّمنا إزاي نستعمل حقائق الضرب المترابطة، والطرح المتكرر. عشان نجيب ناتج القسمة على العدد تمنية والعدد تسعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.