فيديو: التعرُّف على التماثل في الأشكال

يوضح الفيديو مفهوم التماثل، ومحور التماثل، وكيفية التعرف على التماثل في الأشكال، وكيفية تحديدها وتحديد عدد محاور التماثل، وأمثلة توضيحية.

٠٥:٤٧

‏نسخة الفيديو النصية

في الفيديو ده هنتكلّم على التعرّف على التماثل في الأشكال. هنعرف يعني إيه تماثل، ويعني إيه محور التماثل، وإزّاي نعرف إذا كان الشكل له محور تماثل، ولّا ما فيش له محور تماثل.

بعض الأشكال بينطبق بعضها على بعض عند تنصيفها. يعني مثلًا القلب اللي قدّامنا ده لو عملنا له خط كده ينصّفه. وتنينا الجزئين اللي هو اليمين، واللي باليسار دول على بعض؛ هيبقوا منطبقين تمامًا على بعض.

يبقى كده بنقول إن الشكل ده متماثل. يعني إيه متماثل؟ يعني قدِرنا ننصّفه، وخلّينا كل جزء من اللي إحنا نصّفناه ده بينطبق على التاني بالظبط. يعني لو تنيناهم، زيّ الورقة كده، هيبقوا بالظبط منطبقين على بعض؛ وهو ده التماثل. والخط اللي بننصّف بيه الشكل ده بنقول عليه محور تماثل.

فيه بعض الأشكال بيبقى لها محور تماثل أو أكتر، وفيه بعض الأشكال مالهاش محاور تماثل خالص. الشكل اللي قدّامنا ده مالوش محاور تماثل؛ لأنه لو نصّفناه مش هنلاقيه أجزاؤه بتنطبق على بعض.

النجمة اللي قدّامنا دي لها أكتر من محور تماثل. ده ممكن يبقى محور تماثل. ده ممكن يبقى محور تماثل. وكمان ده ممكن يبقى محور تماثل. وكمان الأخضر، وكمان الأحمر ممكن يبقوا محاور تماثل. يبقى النجمة اللي قدّامنا دي لها خمس محاور تماثل. هناخد أمثلة كمان.

أيّ الأشكال التالية متماثلة، وكم عدد محاور التماثل؟

في الشكل الأول، اللي هو المثلث، ده شكل متماثل. ممكن أرسم محور تماثل بالشكل ده. وممكن نرسم كمان محور تماثل بالشكل ده. وواحد كمان بالشكل ده.

اللي لونه أحمر هيقسمه للشكلين دول؛ ده، وواحد زيّه بالظبط أهو. والأخضر هيقسم للشكل ده، والشكل ده. والمحور التالت هيقسمه للشكل ده، والشكل ده. يبقى المثلث ده شكل متماثل، وعدد المحاور: تلاتة. هنشوف الشكل التاني.

هنشوف الشكل التاني هنلاقيه متماثل، لكن محور تماثل واحد فقط؛ اللي هو ده.

هنشوف الشكل التالت هنلاقيه شكل مش متماثل؛ لأن مش هنعرف ننصّفه لأشكال تنطبق على بعضها. وبالتالي هيبقى شكل غير متماثل، وليس له محاور تماثل.

حدّد محاور التماثل في الأشكال التالية:

الشكل الأول هنلاقي إن أ ده ما بيقسموش لجزئين منطبقين على بعض. لأن هنا الخط ده مش زيّ الخط ده؛ ده مايل أكتر منه. الخط ب كمان مش محور تماثل. وَ ج كمان ما ينفعش يبقى محور تماثل؛ لأن لو نصّفنا الشكل مش هينطبق على بعضه.

الشكل اللي بعده؛ أ لو نصّفنا الشكل من عنده مش هينطبق الجزئين على بعض. الـ ب نفس الكلام. والـ ج كمان لو طبّقنا الشكل مش هينطبق النصفين على بعض. يبقى كمان لا يوجد محور تماثل.

الشكل التالت؛ الـ أ ما بينصّفش الشكل. الـ ب ما بينصّفش الشكل. لكن الـ ج هو الوحيد اللي بينصّف الشكل لجزئين ينطبقوا على بعض؛ يبقى الـ ج بيمثّل محور تماثل.

عايزين نعرف البيت اللي قدّامنا ده له محور تماثل ولا لأ.

لو بصّينا كويس عليه، هنلاقي إن ما ينفعش يبقى له محور تماثل. لأن النُّصين، لو قسمنا كده مثلًا، مش هينطبقوا على بعض بسبب المدخنة دي، وبسبب كمان إن الباب مش متماثل.

الشكل اللي قدّامنا ده متماثل، وله أربع محاور تماثل؛ اتنين بالشكل ده، وكمان اتنين بالشكل ده.

الفراشة اللي قدّامنا دي لها محور تماثل واحد.

الباب اللي قدّامنا ده له محور تماثل واحد؛ اللي هو ده.

وفيه أشكال كتير في حياتنا فيها تماثل، وأشكال ما فيهاش. وأشكال لها محاور تماثل كتيرة، وأشكال مالهاش محاور تماثل خالص أو واحد بس.

يبقى اتكلّمنا في الفيديو ده عن التماثل؛ إيه هو، وإيه هو محور التماثل، وإزّاي بنتعرّف عليه في الأشكال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.