فيديو: حل المسائل الكلامية بجمع عددين صحيحين

زار ٢٩٩‎٤ طفلًا معرض الكتاب في الأسبوع الماضي، وزاره ٦٨٤‎٦ طفلًا في هذا الأسبوع. أوجد العدد الكلي للأطفال الذين زاروا المعرض.

٠٢:٣٨

‏نسخة الفيديو النصية

زار ألفين تسعمية أربعة وتسعين طفلًا معرض الكتاب في الأسبوع الماضي، وزاره ست آلاف تمنمية ستة وأربعين طفلًا في هذا الأسبوع. أوجد العدد الكلي للأطفال الذين زاروا المعرض.

إحنا مُعطى عندنا في السؤال عدد الأطفال اللي زاروا المعرض في الأسبوع الأول، وعدد الأطفال اللي زاروا المعرض في الأسبوع التاني، والمطلوب مننا نحدد العدد الكلي للأطفال اللي زاروا المعرض، اللي هو بكل بساطة هيبقى عبارة عن المجموع.

هنبدأ نحط العددين تحت بعض، وناخد بالنا كويس إن إحنا بنحط الأرقام اللي في خانة الآحاد تحت بعضها، والأرقام اللي في خانة العشرات تحت بعضها، وبالمثل الأرقام اللي في خانة المئات، والأرقام اللي في خانة الألوف.

بنبدأ دايمًا الجمع من خانة الآحاد. هنبتدي نجمع أربعة زائد ستة هيساوي عشرة. طيب العشرة دي ما ينفعش نكتبها كده. العشرة آحاد دي عبارة عن صفر في خانة الآحاد، وواحد في خانة العشرات. عشان كده هنخلّي في خانة الآحاد فيه صفر بس، بالشكل ده، والواحد اللي في خانة العشرات هنحتفظ بيه فوق الأرقام اللي موجودة في خانة العشرات.

هنبتدي نجمع. واحد زائد تسعة يبقى عشرة، زائد أربعة هيبقى أربعتاشر. أربعتاشر في خانة العشرات يعني أربعتاشر عشرة، اللي هي عبارة عن أربعة عشرات وواحد مئات. فبالتالي هنسيب الأربعة بس في خانة العشرات، والواحد هننقله فوق الأرقام اللي في خانة المئات.

ونبدأ نجمع بقى الأرقام اللي في خانة المئات. واحد زائد تسعة عشرة، زائد تمنية تمنتاشر. طب دي تمنتاشر في خانة المئات. دي عبارة عن تمن مئات، والواحد ده ألوف؛ لأن التمنتاشر مية دي عبارة عن تمنتاشر وجنبها صفرين؛ يعني تمنية في خانة المئات، وواحد في خانة الألوف. فبالتالي هنسيب التمنية هي اللي في خانة المئات، والواحد اللي موجود ده هننقله ونحتفظ بيه فوق خانة الألوف.

ونبتدي نجمع الواحد ده مع باقي الأرقام اللي في خانة الألوف. واحد زائد اتنين تلاتة، زائد ستة تسعة. يبقى هنكتب في الناتج تسعة في خانة الألوف. ويبقى ناتج عملية الجمع تسعة آلاف تمنمية وأربعين. ويبقى كده جِبنا المجموع، وهو ده اللي بيمثّل العدد الكلي للأطفال. ويبقى كده قدرنا نوجد عدد الأطفال الكلي اللي زار المعرض، وهو تسعة آلاف تمنمية وأربعين طفلًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.