تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تقدير النسبة المئوية

سوزان فائق

يوضح الفيديو كيفية تقدير النسبة المئوية بطريقتين مختلفتين، وكيفية تقديرها لنسب مئوية أكبر من ۱۰۰ وأقل من ۱.

٠٩:٣٢

‏نسخة الفيديو النصية

هنتكلم في الفيديو ده عن تقدير النسبة المئوية. هنستخدم طريقتين؛ واحدة باستخدام الكسور، والتانية بإيجاد عشرة في المية من العدد. وهنعرف كمان إزاي نقدّر نسبة مئوية لعدد، إذا كانت النسبة المئوية أكبر من مية أو أقل من واحد. أحيانًا بلا [لا] نحتاج إلى إجابة دقيقة عند استخدام النسبة المئوية، وإحدى الطرق المستخدمة لتقدير النسبة المئوية هي استخدام الكسور. أول طريقة هي استخدام الكسور، ودي مثلًا لو مُعطى اتنين وتلاتين في المية من عدد كلي مثلًا خمسين؛ فـ الاتنين وتلاتين في المية دي هنحولها لكسر، وقبل ما نحولها لكسر هنقرَّبها لـ تلاتين في المية من الخمسين. التلاتين في المية دي عبارة عن تلاتين على مية، يعني بتساوي تلاتة على العشرة، يعني الاتنين وتلاتين في المية من الخمسين هتساوي تقريبًا تلاتة على العشرة في الخمسين؛ يعني تقريبًا خمستاشر.

يبقي كده استخدمنا الكسور بعد ما قرّبنا النسبة لـ تلاتين في المية، أخدنا التلاتين في المية، حولناها لكسر وضربناها في العدد الكلي.

ناخد مثال: سجّل لاعب كرة سلة اتنين وستين في المية من رمياته أهداف، إذا رمى خمسمية وعشرين مرة، فكم هدفًا سجل تقريبًا؟ هنكتب اتنين وستين في المية من العدد الكلي بالشكل ده، وبعدين نقرّب الاتنين وستين في المية إلى أقرب عشرة؛ يعني هتبقى ستين في المية من الخمسمية وعشرين، الستين في المية هنحولها لكسر، ستين في المية هتساوي ستة على عشرة، بالتبسيط هتبقى تلاتة على خمسة؛ يبقى الاتنين وستين في المية من الخمسمية وعشرين، هتساوي تقريبًا تلاتة على الخمسة في الخمسمية وعشرين، اللي هي هتساوي تقريبًا تلتمية واتناشر هدف؛ إذن سجل اللاعب تلتمية واتناشر هدفًا تقريبًا من خمسمية وعشرين رمية.

هناخد طريقة كمان لتقدير النسبة المئوية، وهي إن إحنا نِوجد عشرة في المية من العدد، وبعدين نضرب؛ يعني مثلًا السبعين في المية بتساوي سبعة في عشرة في المية. هنِوجد العشرة في المية من العدد الكلي بتساوي كام، وبعدين نضربها في السبعة. العشرة في المية دي اللي هي واحد من عشرة من العدد الكلي، واللي هيطلع هنضربه في السبعة، يعني لو مثلًا عندي تلاتين في المية من عدد خمسين، هشوف العشرة في المية من العدد ده تساوي كام؛ يعني هنبقى هنا تلاتة في العشرة في المية، هنِوجد العشرة في المية من العدد؛ يعني الخمسين هنضربها في واحد من عشرة. هتساوي خمسة، هناخد الخمسة دي نضربها في التلاتة دي، يبقى التلاتين في المية من العدد خمسين هتساوي خمستاشر،

هناخد مثال، المثال: تقطع سيارة منى أربعتاشر وخمسة وسبعين من مية كيلومتر لكل لتر، بينما تقطع سيارة ندى مسافة تزيد عشرين في المية عما تقطعه سيارة منى، اوجد المسافة التقريبية الزائدة التي تقطعها سيارة ندى عن سيارة منى. هنستخدم الطريقة الأولى اللي هي استخدام الكسر، يبقى العشرين في المية الزيادة هتساوي اتنين على عشرة اللي هي واحد على خمسة، هنحسب العشرين في المية من الأربعتاشر وخمسة وسبعين من مية تقريبًا، هنقرب الأربعتاشر خمسة وسبعين من مية هتبقى خمستاشر، وهنحط الكسر المقابل للـ عشرين في المية، اللي هو واحد على خمسة في الخمستاشر، اللي هي تقريب الأربعتاشر وخمسة وسبعين من مية. يبقى تقريبًا الزيادة هتبقى تلاتة كيلومتر، ده باستخدام الكسور.

هنستخدم طريقة العشرة في المية، هنشوف العشرة في المية قد إيه من العدد، الأول هنقرب الأربعتاشر وخمسة وسبعين من مية إلى خمستاشر، ونِوجد الواحد من عشرة من الخمستاشر تساوي كام، يبقى الواحد من عشرة في الخمستاشر هتساوي واحد وخمسة من عشرة كيلومتر، وبعد كده العدد اللي هو الواحد ونص ده اللي بيمثل العشرة في المية، هنضربه في اتنين، لأن العشرين في المية بتساوي اتنين في عشرة في المية؛ يبقى هنضرب الواحد ونص في الاتنين، يبقى العشرين في المية من الخمستاشر هتساوي اتنين في واحد ونص يعني تلاتة كيلومتر. يبقى تقريبًا الزيادة تلاتة كيلومتر،

في بعض الأحيان بيبقى النسبة المئوية أكبر من مية أو أقل من الواحد. لما بيكون النسبة المئوية أكبر من مية بيبقى العدد الناتج أكبر من العدد الأصلي.

هنشوف إزاي من خلال مثال، في المثال قدّر مية اتنين وعشرين في المية من خمسين. المية اتنين وعشرين في المية دي تساوي تقريبًا مية وعشرين في المية. يبقى المية وعشرين في المية من الخمسين هتبقى عبارة عن المية زائد العشرين في المية. اللي هي نقدر نكتبها بالصورة دي مية في المية من الخمسين زائد العشرين في المية من الخمسين، المية في المية من الخمسين يعني الخمسين كلهم يعني واحد في الخمسين زائد العشرين في المية اللي بتمثل واحد على خمسة يبقى واحد على الخمسة في الخمسين، يبقى هنساوي خمسين زائد عشرة يساوي ستين، يبقى المية اتنين وعشرين في المية من الخمسين تقريبًا هتساوي الستين، وهي دي النتيجة اللي هو طلبها.

هناخد مثال كمان قدّر الربع في المية من خمسمية تسعة وتمانين. الربع في المية دي اللي هي ربع الواحد في المية، والعدد خمسمية تسعة وتمانين ده، هنقربه للـ ستمية يبقى هنضرب الواحد في المية في الستمية، علشان نعرف الواحد فى المية من الستمية بتساوي كام، وبعد كده نجيب ربع العدد اللي هيطلع؛ يعني واحد في المية من الستمية هتساوي الواحد من مية في الستمية هتساوي ستة وبعد كده نِوجد ربع العدد ستة، هيساوي واحد ونص. يبقى الربع في المية من الخمسمية تسعة وتمانين، هيساوي تقريبًا واحد ونص.

ناخد مثال من حياتنا العملية، في إحصائية بلغ عدد الذين يستخدمون الهاتف المحمول حوالي عشرة ملايين شخص، إذا كان خمسة من عشرة في المية منهم تقريبًا يستخدمونه في الاستماع إلى الأغاني، فقدّر عددهم. يعني عايزين نحسب النص في المية دي قد إيه من العشر ملايين. الخمسة من عشرة دي اللي هي النص في المية بتساوي نص الواحد في المية. يبقى هنشوف الواحد في المية قد إيه مِ العشر ملايين، وبعد كده نحسب نصهم. الواحد فى المية هي الواحد من المية في العشر ملايين، هيساوي ميت ألف، هنحسب نصهم؛ يبقى تقريبًا نص الميت ألف هتساوي خمسين ألف؛ إذن حوالي خمسين ألف شخص يستخدمون هواتفهم المحمولة لسماع الأغاني.

اتكلمنا في الفيديو ده عن تقدير النسبة المئوية، وعرفنا طريقتين اللي هي استخدام الكسور أو إيجاد عشرة في المية من العدد الكلي، وبعد كده نضرب في عدد لإيجاد النسبة المطلوبة. وعرفنا كمان إزاي نقدّر النسبة المئوية لعدد إذا كانت النسبة المئوية أكبر من مية أو أقل من واحد.