فيديو: مفاعلة ملف حث

مصطفى عبد السلام

وُصِّل ملف معامل حثه 100mH بقوة دافعة كهربية (ق.د.ك.) تُعطى بالعلاقة: 𝑉(𝑡) = (160 v) sin (120 𝜋𝑡)‎. ما مقدار المفاعلة الحثية للملف؟

٠٢:٢٧

‏نسخة الفيديو النصية

وصِّل ملف معامل حثه مية مللي هنري بقوة دافعة كهربية ق د ك تُعطى بالعلاقة 𝑉 𝑡 تساوي مية وستين فولت sin مية وعشرين 𝜋 𝑡. ما مقدار المفاعلة الحثية للملف؟

فإحنا عندنا ملف وعامل حثه مية مللي هنري. وصلناه بمصدر فولت متردد نقدر نعبر عنه بالعلاقة 𝑉 𝑡 بتساوي مية وستين فولت sin مية وعشرين 𝜋 𝑡. ولو وصّلنا أي ملف بمصدر تيار متغيّر، هنلاقي إن الملف ده بيعارض أي تغير بيحصل للتيار فيه. وبنعبّر عن معارضة الملف لتغير التيار دي بالمفاعلة الحثية، واللي بنرمز لها بِـ 𝑋 𝐿. وبنقدر نضيف قيمتها عن طريق القانون اللي بيقول إن المفاعلة الحثية بتساوي اتنين 𝜋، مضروبة في التردد، مضروب في معامل حث الملف.

فإحنا هنا علشان نعرف نجيب المفاعلة الحثية محتاجين الأول نعرف التردد. فلو رجعنا للمعادلة العامة اللي بتوصف أي مصدر متردِّد، اللي بتقول إن 𝑉 𝑡 بتساوي 𝑉 max، اللي هي أقصي قيمة للمصدر. مضروبة في sin اتنين 𝜋 𝑓، اللي هو التردد. مضروب في 𝑡 اللي هو الزمن.

فلو قارنّا ما بين المعادلة العامة لمصدر متردد وما بين العلاقة اللي بتوصف المصدر المُعطى عندنا. نقدر نقول إن اللي جوّهـ الـ sin في العلاقة بتاعة المصدر المعطى عندنا. بيساوي اللي جوّهـ الـ sin في العلاقة العامة لأي مصدر متردد. يعني اتنين 𝜋 𝑓 𝑡 بتساوي مية وعشرين 𝜋 𝑡. نقدر نختصر الـ 𝑡 مع الـ 𝑡، والـ 𝜋 مع الـ 𝜋، ونقسم الطرفين على اتنين. فنلاقي إن التردد بيساوي مية وعشرين على اتنين هرتز، يعني بيساوي ستين هرتز.

فنقدر دلوقتي نعوّض بقيمة التردد اللي جبناه في قانون المفاعلة الحثية. فالمفاعلة الحثية هتبقى بتساوي اتنين 𝜋 في ستين هرتز في مية مللي هنري. وعلشان نعرف نختصر الواحدات هنحوّل المللي هنري على مرحلتين. الأولى إن المللي هنري بتساوي عشرة أُس سالب تلاتة هنري. والتانية إن الهنري بتساوي Ω في ثانية. فكده نقدر نشيل المللي هنري ونحط مكانه عشرة أُس سالب تلاتة Ω ثانية. والهرتز نفسها نفس وحدة الواحد على الثانية. فنقدر نشيل الهرتز ونحط واحد على الثانية. فكده نقدر نختصر الثانية مع الثانية، ونطلع إن المفاعلة الحثية بتساوي تمنية وتلاتين Ω.

وبكده نبقى عرفنا نجيب المفاعلة الحثية لملف متوصّل بمصدر متردد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.