فيديو: حساب العجلة الخطية

يتسارع حجم من الدم في عملية ضخ الدم من القلب ويتحرَّك مسافة 1.80cm في خط مستقيم على طول الشريان. يتسارع الدم من السكون حتى سرعة 30cm/s أثناء تدفُّقه عبر الشريان. ما المدَّة الزمنية التي تسارع خلالها الدم؟

٠٢:٣٤

‏نسخة الفيديو النصية

يتسارع حجم من الدم في عملية ضخّ الدم من القلب. ويتحرك مسافة واحد وتمانين من المية سنتيمتر، في خط مستقيم على طول الشريان. يتسارع الدم من السكون، حتى سرعة تلاتين سنتيمتر على الثانية، أثناء تدفُّقه عبْر الشريان. ما المدة الزمنية التي تسارَع خلالها الدم؟

ففي عملية ضخّ الدم، القلب بيخلّي حجم معيّن من الدم يتسارع بعد ما كان في سكون. ويوصل لسرعة تلاتين سنتيمتر على الثانية، بعد ما يمشي مسافة واحد وتمنية من العشرة سنتيمتر. والمطلوب منّنا، إن إحنا نعرف الزمن المطلوب، علشان الدم يمشي المسافة دي. فإحنا في الأول هنبصّ على قوانين الحركة التلاتة.

أول واحد بيقول: إن السرعة النهائية بتساوي السرعة الابتدائية، زائد العجلة في الزمن. وتاني واحد بيقول: إن المسافة بتساوي السرعة الابتدائية في الزمن، زائد نص في العجلة في الزمن تربيع. أمّا التالت والأخير بيقول: إن السرعة النهائية تربيع بتساوي السرعة الابتدائية تربيع، زائد اتنين في العجلة في المسافة.

فلو بصّينا على أول قانون للحركة، هنلاقي إن مجهول فيه العجلة والزمن. ونفس الكلام في القانون التاني. أمّا القانون التالت، فالمجهول الوحيد فيه، هي العجلة. فإحنا كده ممكن نجيب العجلة من القانون التالت، ونعوّض بيها. سواء في القانون الأول، أو في القانون التاني؛ عشان نجيب الزمن. ففي حالتنا دي، هنستخدم القانون الأول؛ لأنه أسهل رياضيًّا.

فعلشان نجيب العجلة من القانون التالت، هنلاقي إن السرعة الابتدائية بصفر. فلو قسمنا طرفين المعادلة على اتنين في المسافة. هنقدر نطلّع إن العجلة بتساوي السرعة النهائية تربيع، مقسومة على اتنين في المسافة. فلمّا نعوّض بالمعطيات بتاعتنا. هنلاقي إن العجلة بتساوي تلاتين سنتيمتر على الثانية تربيع، على اتنين في واحد وتمنية من العشرة سنتيمتر.

فكده نبقى طلّعنا إن العجلة بتساوي ميتين وخمسين سنتيمتر على الثانية تربيع. فنقدر دلوقتي نستخدم القانون الأول؛ لأن بقى المجهول الوحيد فيه هو الزمن. وبرضو بما إن الجسم بيتحرك من سكون، فهنلاقي السرعة الابتدائية بتساوي صفر. وعلشان نعرف نجيب الزمن، هنقسم طرفين المعادلة على العجلة. فهنلاقي إن الزمن بيساوي السرعة النهائية، مقسوم على العجلة. فهنلاقي الزمن بيساوي تلاتين سنتيمتر على الثانية، مقسوم على ميتين وخمسين سنتيمتر على الثانية تربيع.

نقدر نختصر السنتيمتر مع السنتيمتر. والواحد على ثانية مع التربيع بتاع الواحد على الثانية. ونطلّع إن الزمن بيساوي اتناشر من المية ثانية. وبكده نبقى عرفنا نطلّع الزمن المطلوب، عشان الدم يتحرك مسافة معينة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.