فيديو: إيجاد زاوية الهدبة المضيئة الأولى باستخدام محزوز حيود

يحتوي محزوز حيود على 2000 شق لكل سنتيمتر. عند أي زاوية تقع الهدبة المضيئة الأولى لضوء أخضر طوله الموجي 520nm؟

٠٢:٢٥

‏نسخة الفيديو النصية

يحتوي محزوز حيود على ألفين شقّ لكل سنتيمتر. عند أيّ زاوية تقع الهدبة المضيئة الأولى لضوء أخضر طوله الموجي خمسمية وعشرين نانومتر.

فلو عندنا محزوز حيود داخل عليه ضوء أخضر، هنلاقيه عمل نمط حيود بعده بالشكل ده. فالهدبة اللي في النصّ دي بنسمّيها الهدبة المركزية. وأول هدبة بعد الهدبة المركزية بنسمّيها الهدبة الأولى. فإحنا المطلوب منّنا إن إحنا نعرف الزاوية بتاعة الهدبة الأولى. وهنسمّي الزاوية دي 𝜃. فممكن نجيب الزاوية 𝜃 دي عن طريق إننا نستخدم معادلة محزوز الحيود. اللي بتقول: إن المسافة ما بين شقّين مضروبة في sin الزاوية 𝜃 بتساوي 𝑚، اللي هو رقم الهدبة، مضروبة في الطول الموجي 𝜆.

ورقم الهدبة ده يعني لو أنا عايز أجيب الهدبة الأولى هعوّض بواحد. لو عايز أجيب الهدبة التانية هعوّض باتنين، وهكذا. فبما إننا عايزين نعرف الزاوية بتاعة الهدبة الأولى، نقدر نعوّض مكان 𝑚 بواحد. وعلشان نجيب الزاوية، هنضرب طرفين المعادلة في واحد على 𝑑. فهنلاقي إن sin 𝜃 بيساوي الطول الموجي مقسوم على المسافة بين الشقّين. فلو أخدنا الدالة العكسية لـ sin للطرفين. فنقدر كده نطلّع إن الزاوية 𝜃 بتساوي الدالة العكسية لـ sin للطول الموجي، مقسوم على المسافة بين الشقّين.

وعلشان نجيب المسافة بين الشقّين دي، هنبصّ للمُعطى اللي بيقول: إن إحنا عندنا ألفين شقّ لكل سنتيمتر. فده معناه إن السنتيمتر الواحد فيه ألفين شقّ. فعلشان أجيب المسافة ما بين شقّين بس، هقسم الواحد سنتيمتر على ألفين. وده لأن، زيّ ما قلنا، السنتيمتر الواحد فيه ألفين شقّ. ونقدر نحوّل السنتيمتر لعشرة أُس سالب اتنين متر. فنقدر من هنا نقول: إن المسافة ما بين شقّين بتساوي خمسة في عشرة أُس سالب ستة متر.

ونقدر دلوقتي نعوّض بيها في القانون بتاع الزاوية. فهنلاقي إن الزاوية بتساوي الدالة العكسية للـ sin لخمسمية وعشرين نانومتر. اللي هو الطول الموجي للضوء الأخضر، مقسوم على خمسة في عشرة أُس سالب ستة متر. ونقدر نحوّل النانومتر لعشرة أُس سالب تسعة متر. فنقدر كده نطلّع إن الزاوية بتساوي خمسة وسبعة وتسعين من المية درجة.

وبكده نبقى عرفنا نطلّع الزاوية اللي بتعملها الهدبة الأولى في نمط حيودي بسبب محزوز حيود.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.