فيديو: إيجاد الوسط الحسابي والوسيط والمنوال لمجموعة من البيانات

يوضح الفيديو الوسط الحسابي الذي هو مجموع البيانات مقسومًا على عددها، وكيفية إيجاده. والوسيط الذي هو العدد الأوسط لمجموعة من البيانات بعد ترتيبها، وكيفية إيجاده لمجموعة من البيانات إذا كان عددها فرديًّا أو زوجيًّا. والمنوال الذي هو العدد أو الأعداد الأكثر تكرارًا في مجموعة من البيانات، وكيفية إيجاده.

٠٥:١١

‏نسخة الفيديو النصية

إيجاد الوسط الحسابي والوسيط والمنوال لمجموعة من البيانات.

في الفيديو ده هنتكلّم عن الوسط الحسابي، والوسيط، والمنوال، وإزاي بنوجدهم. البيانات هي مجموعة من المعلومات العددية، اللي ليها علاقة بموضوع معيّن. وفيه أكتر من طريقة لوصف المعلومات دي. ومنها الوسط الحسابي، والوسيط، والمنوال. نبدأ بالوسط الحسابي.

الوسط الحسابي لمجموعة من البيانات، هو مجموع البيانات، مقسوم على عددها. يعني لو مثلًا مجموعة من البيانات بالشكل ده. فالوسط الحسابي ليها هيساوي مجموعها … يعني تلاتة زائد اتنين، زائد اتنين، زائد واحد، زائد أربعة، زائد خمسة، زائد أربعة. مقسوم على عددها، اللي هو سبعة. وده هيساوي واحد وعشرين على سبعة، يعني هيساوي تلاتة.

الطريقة التانية لوصف البيانات، هي الوسيط. الوسيط هو العدد الأوسط لمجموعة من البيانات، بعد ما بنكتبها بالترتيب. وبتختلف طريقة إيجاده، إذا كان عدد البيانات فردي، أو زوجي. فإذا كان عدد البيانات فردي، فأول خطوة إننا هنرتّب البيانات. بعدين هنشوف أيّ قيمة اللي في النص. يعني القيمة اللي عدد البيانات على يمينها، بيساوي عدد البيانات على شمالها. اللي هي في الحالة دي تلاتة. يعني في حالة مجموعة البيانات دي، الوسيط هو تلاتة.

أمّا إذا كان عدد البيانات زوجي، فأول خطوة برضو هتبقى إننا نرتّب البيانات. بعدين هنشوف القيمتين اللي في النص. وفي الحالة دي هيبقوا اتنين وتلاتة. فساعتها الوسيط هيساوي الوسط الحسابي للقيمتين دول. يعني مجموعهم اتنين زائد تلاتة، مقسوم على عددهم اللي هو اتنين. وده هيساوي خمسة على اتنين. اللي هيساوي اتنين وخمسة من عشرة. يعني الوسيط في الحالة دي، هو اتنين وخمسة من عشرة.

الطريقة التالتة لوصف البيانات هي المنوال. المنوال هو العدد، أو الأعداد الأكثر تكرارًا لمجموعة من البيانات. يعني اللي بيكون عدد مرات تكرارها، أكتر من غيرها. والمنوال برضو بيكون ليه حالتين. إما إنه يكون عدد واحد، أو يكون أكتر من عدد.

فمثلًا لو مجموعة بيانات بالشكل ده. هنلاحظ منها إن كل الأعداد موجودة مرة واحدة. ما عدا الاتنين، موجود مرتين. وبالتالي المنوال لمجموعة البيانات دي، هو اتنين. أمّا لو قدامنا مجموعة بيانات بالشكل ده. فهنلاحظ إن الأعداد كلها ظهرت مرة واحدة. ما عدا الاتنين، والأربعة؛ هم الاتنين ظهروا مرتين. وبما إن ده أكبر عدد مرات تكرار، فهنا المنوال بيساوي اتنين وأربعة.

يبيّن الجدول عدد الأحذية التي تمّ بيعها في أحد المحلات، خلال ثلاثة أسابيع. أوجد الوسط الحسابي، والوسيط، والمنوال. ثم بيِّن القيمة التي يمكن استعمالها لتوقُّع عدد الأحذية التي تباع كل يوم.

أول حاجة نوجد الوسط الحسابي. الوسط الحسابي هيساوي مجموع القيم كلها، مقسوم على عددها. يعني هنجمع كل القيم اللي في الجدول، ونقسمها على عددها اللي هو واحد وعشرين. فلو جمعنا القيم دي، هنلاقي مجموعها بيساوي سبعمية وخمسة وتلاتين. فنقسمه على واحد وعشرين. فسبعمية خمسة وتلاتين على واحد وعشرين، بيساوي خمسة وتلاتين.

بعد كده نحسب الوسيط. الوسيط هيبقى القيمة الوسطى للأعداد بعد ترتيبها. فأول حاجة هنعملها، إننا نرتّب الأعداد. بعد ترتيب الأعداد، هنحدّد القيمة اللي في النص. وهي القيمة اللي عدد البيانات اللي على يمينها، بيساوي عدد البيانات اللي على شمالها. فبالنظر للبيانات، هنلاقي إن القيمة دي هي سبعة وتلاتين. يبقى الوسيط هيساوي سبعة وتلاتين.

بعد كده نوجد المنوال. المنوال هو أكتر قيمة اتكررت في مجموعة البيانات. فبالنظر للقيم، هنلاقي إن كل القيم ظهرت مرة واحدة. ما عدا العدد خمسة، ظهر مرتين. فبالتالي المنوال هيساوي خمسة. يبقى الوسط الحسابي لمجموعة البيانات دي، هو خمسة وتلاتين. والوسيط هو سبعة وتلاتين. والمنوال هو خمسة. أما القيمة اللي ممكن نستعملها، عشان نتوقّع عدد الأحذية اللي بتتباع كل يوم، هتبقى هي نفسها قيمة الوسط الحسابي.

يبقى في الفيديو ده عرفنا إيه هو الوسط الحسابي لمجموعة من البيانات. وهو مجموع البيانات، مقسوم على عددها. وإزاي بنوجده. وعرفنا إيه هو الوسيط. وهو العدد الأوسط لمجموعة من البيانات، لمّا بنكتبها بالترتيب. وعرفنا إزاي بنوجده إذا كان عدد البيانات زوجي، أو فردي. وعرفنا إيه هو المنوال. وهو العدد، أو الأعداد الأكثر تكرارًا لمجموعة من البيانات. يعني المنوال لمجموعة من البيانات، ممكن يكون أكتر من عدد. وعرفنا إزاي بنوجده.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.