نسخة الفيديو النصية
إذا كان حجم مكعَّب يساوي ألف سنتيمتر مكعَّب، فما مساحة قاعدته؟
دلوقتي إحنا معطى عندنا في السؤال حجم المكعَّب، اللي هو ألف سنتيمتر مكعَّب. والمطلوب مننا نحسب مساحة قاعدته. عشان نقدر نحسب مساحة قاعدته، اللي هي بتبقى على شكل مربَّع. محتاجين نوجد طول ضلع المكعَّب ده؛ عشان نقدر نحسب مساحة قاعدة المكعب.
العلاقة اللي بنحسب منها حجم أيّ مكعَّب هي إنه بيساوي طول الضلع تكعيب. وإحنا معطى عندنا حجم المكعَّب. يبقى ألف هيساوي طول الضلع تكعيب. بأخذ الجذر التكعيبي للطرفين، نقدر نقول: إن طول الضلع هيبقى بيساوي الجذر التكعيبي لألف. اللي هو هيبقى بيساوي عشرة. وإحنا بنتكلّم في أطوال، فتبقى وحدة القياس هتبقى هنا سنتيمتر؛ عشان الحجم كان بالسنتيمتر المكعَّب. فهيبقى الطول محسوب بالسنتيمتر.
بعد بقى ما أوجدنا طول ضلع المكعب، هنقدر بسهولة نحسب مساحة قاعدته، اللي هي هتبقى بتساوي مربع طول الضلع. فبالتعويض في العلاقة دي بطول الضلع، اللي هو عشرة سنتيمتر، هيطلع عندنا إن مساحة القاعدة هتبقى مية سنتيمتر مربع. دايمًا المساحة بتُحسب بالوحدات المربَّعة. هنا هتبقى سنتيمتر مربع؛ عشان وحدة الطول كانت سنتيمتر. فوحدة المساحة هتبقى سنتيمتر مربَّع. يبقى دي مساحة قاعدة المكعَّب، اللي هي على شكل مربَّع.
