فيديو: رسم القطاعات الدائرية وتحليلُها

يوضح الفيديو القطاعات الدائرية، وكيفية التعبير عن البيانات باستخدامها، وكيفية تحليل البيانات الممثَّلة باستخدام القطاعات الدائرية.

٠٤:٥٨

‏نسخة الفيديو النصية

رسم القطاعات الدائرية وتحليلها. في الفيديو ده هنعرف إيه هي القطاعات الدائرية، وإزاي بنعبر باستخدامها عن البيانات. فيه أكتر من شكل للتعبير عن البيانات المختلفة والمقارنة بينها، ومن الأشكال دي القطاعات الدائرية. القطاعات الدائرية هي تمثيل للبيانات لمقارنتها على شكل أجزاء من الكل في الدائرة، وده بشرط إن يكون مجموع الأجزاء مكافئ لمية في المية من الدائرة؛ يعني مثلًا الجدول ده بيعبر عن أنواع الخضراوات المفضلة لبعض الطلاب، فلو هنمثله باستخدام القطاعات الدائرية هيبقى بالشكل ده، نلاحظ إن أجزاء الدائرة بتمثل البيانات المختلفة حسب نسبتها، وإن مجموع النِّسَب المئوية بيساوي مية في المية.

ممكن برضو نستخدم التقدير في رسم القطاعات الدائرية، نحل مثال: سأل مدرس بعض الطلاب عن كيفية ذهابهم إلى المدرسة، ومثَّل نتائجهم في الجدول المجاور، مثِّل البيانات باستخدام القطاعات الدائرية. أول حاجة لازم نتأكد إن مجموع النِّسَب بيساوي مية في المية؛ يبقى مجموع النِّسَب هيساوي أربعة وخمسين، زائد سبعة وعشرين، زائد تسعة وخمسة من عشرة، زائد تسعة وخمسة من عشرة، هيساوي بجمع النسب مية، بعدين نستخدم التقدير عشان نقدّر الكسر المعبر عن كل نسبة؛ فمثلًا أربعة وخمسين في المية بتساوي تقريبًا خمسين في المية، وخمسين في المية بتساوي خمسين على مية؛ يعني بتساوي واحد على اتنين، وسبعة وعشرين في المية بتساوي تقريبًا خمسة وعشرين في المية؛ وبالتالي خمسة وعشرين في المية هتساوي خمسة وعشرين على مية، يعني هتساوي واحد على أربعة، وتسعة وخمسة من عشرة في المية بتساوي تقريبًا عشرة في المية، وعشرة في المية بتساوي عشرة على مية يعني هتساوي واحد على عشرة. فنرسم الدائرة وبعدين نمثل الكسور، بما إن أربعة وخمسين في المية أكبر بشوية من خمسين في المية أو واحد على اتنين، يبقى هنعبّر عنها بجزء أكبر بشوية من نص الدائرة؛ عشان نعبر عن الطلاب اللي بيستخدموا الحافلة المدرسية، وبما إن سبعة وعشرين في المية أكبر بشوية من خمسة وعشرين في المية أو واحد على أربعة، يبقى هنعبّر عنها في الدائرة بجزء أكبر بشوية من رُبع الدائرة؛ للتعبير عن الطلاب اللي بيمشوا للمدرسة، وبما إن الطلاب اللي بيستخدموا الدراجة والسيارة نسبتهم متساوية وبتساوي تسعة وخمسة من عشرة في المية، يبقى هنقسم الجزء الباقي من الدائرة لنصفين متساويين كل نص بيعبر عن نسبة منهم؛ وبكده نبقى مثّلنا نِسَب وسائل المواصلات اللي بيستخدمها الطلاب بشكل قطاعات دائرية.

ممكن برضو نحلل البيانات الممثّلة بشكل قطاعات دائرية، نحل مثال: قامت سلمى بعمل استطلاع رأي لطلاب فصلها لمعرفة أنواع البيتزا التي يفضلونها، ومثّلت النتائج باستخدام القطاعات الدائرية، واحد: أي نوع من أنواع البيتزا يفضله أكبر عدد من الطلاب؟ اتنين: أي نوع يفضله أقل عدد من الطلاب؟ تلاتة: أي ثلاثة قطاعات مجتمعة تساوي قطاع بيتزا الدجاج؟

بالنسبة للمطلوب الأول فمن شكل القطاعات الدائرية بيظهر إن أكتر عدد من الطلاب بيفضلوا بيتزا الدجاج. وبالنسبة للمطلوب التاني فبرضو من شكل القطاعات الدائرية فأقل نوع اختاره عدد من الطلبة هو بيتزا التونة. بالنسبة للمطلوب التالت فالقطاعات التلاتة المجتمعة اللي بتساوي قطاع بيتزا الدجاج هي بيتزا اللحم وبيتزا الجبنة وبيتزا الخضراوات؛ لأن قطاع بيتزا اللحم بيمثّل تلتاشر في المية من الطلاب، لو أضفنا عليه قطاع بيتزا الجبنة اللي بتمثل تسعتاشر في المية من الطلاب زائد النسبة المئوية للطلاب اللي اختاروا الخضراوات اللي هي خمستاشر في المية؛ فمجموعهم هيساوي سبعة وأربعين في المية، ودي نفس النسبة المئوية الممثّلة في قطاع بيتزا الدجاج. يبقى في الفيديو ده عرفنا إيه هي القطاعات الدائرية، وإزاي بنعبّر باستخدامهم عن البيانات، وإزاي بنحلل البيانات الممثّلة باستخدام القطاعات الدائرية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.