فيديو: تقدير النسبة المئوية من عدد

يوضح الفيديو كيفية تقدير نسبة مئوية معينة من عددٍ ما، وبعض النسب المستخدمة بكثرة والكسور المكافئة لها.

٠٦:٠١

‏نسخة الفيديو النصية

تقدير النسبة المئوية من عدد. في الفيديو ده هنعرف إزاي بنقدّر نسبة مئوية معينة من عدد. تقدير النسبة المئوية من عددٍ ما من الأمور اللي بتساعدنا في حياتنا العملية بشكل كبير، زي تقدير جزء من كل؛ بإننا نقول إن عدد مثلًا بيمثل نصف عدد آخر تقريبًا، مثلًا بنقول إن خمس مربعات من عشرين مربع بتمثل رُبع المربعات.

هنتعرف على شوية نسب مئوية مستخدَمة بكثرة والكسور المكافئة ليها: عشرين في المية بيكافئ واحد على خمسة، وتلاتين في المية بيكافئ تلاتة على عشرة، وأربعين في المية بيكافئ اتنين على خمسة، وخمسين في المية بيكافئ واحد على اتنين، وستين في المية بيكافئ تلاتة على خمسة، وسبعين في المية بيكافئ سبعة على عشرة، وتمانين في المية بيكافئ أربعة على خمسة، وتسعين في المية بيكافئ تسعة على عشرة، ومية في المية بيكافئ واحد صحيح، وخمسة وعشرين في المية بيكافئ واحد على أربعة، وخمسة وسبعين في المية بيكافئ تلاتة على أربعة، وتلاتة وتلاتين وواحد على تلاتة في المية بيكافئ واحد على تلاتة، وستة وستين واتنين على تلاتة في المية بيكافئ اتنين على تلاتة.

نحل شوية أمثلة: قدّر اثنان وخمسون في المئة من مئتان وثمانية وتسعون. اتنين وخمسين في المية بتساوي تقريبًا خمسين في المية، اللي هي بتساوي واحد على اتنين، وميتين تمنية وتسعين ممكن نقربها لتلتمية، وواحد على اتنين من التلتمية بتساوي نص التلتمية؛ يعني هنقسم تلتمية على اتنين، فتلتمية على اتنين بتساوي مية وخمسين، فهنقول إن اتنين وخمسين في المية من ميتين تمنية وتسعين بيساوي تقريبًا مية وخمسين.

مثال تاني: قدّر ستون في المئة من سبعة وعشرون. ستين في المية بتساوي تلاتة على خمسة، فهنقرب سبعة وعشرين لأقرب عدد بيقبل القسمة عَ الخمسة، فهنقول إن سبعة وعشرين بتساوي تقريبًا خمسة وعشرين، بعدين نحسب واحد على خمسة من خمسة وعشرين، فده هيساوي خمسة وعشرين على خمسة اللي هو بيساوي خمسة، بعدين عشان نِوجد تلاتة على خمسة من خمسة وعشرين هنضرب الخمسة اللي هي واحد على خمسة من خمسة وعشرين في تلاتة؛ لأن المطلوب هو تلاتة على خمسة، فهيبقى خمسة في تلاتة بيساوي خمستاشر؛ يعني ستين في المية من سبعة وعشرين بيساوي تقريبًا خمستاشر.

نحل مثال من أرض الواقع: تستطيع الدببة القطبية أن تأكل ما يعادل عشرة في المئة من وزنها في أقل من ساعة، إذا كان وزن ذكر الدب القطبي البالغ حوالي تلتمية وخمستاشر كيلوجرام، فما مقدار ما يستطيع أكله خلال ساعة واحدة؟ عشان نعرف الدب القطبي يقدر ياكل قد إيه خلال ساعة واحدة فإحنا محتاجين نقدّر عشرة في المية من تلتمية وخمستاشر، عشرة في المية بتساوي واحد على عشرة، وهنقول إن تلتمية وخمستاشر تقريبًا بيساوي تلتمية؛ فممكن نحل من هنا بأكتر من طريقة: الطريقة الأولى باستخدام التناسب فهنكتب في الطرف الأيمن الكسر المعبّر عن النسبة اللي هو واحد على عشرة، وفي الطرف التاني هنكتب س على تلتمية؛ فالتناسب هيبقى واحد على عشرة بيساوي س على تلتمية، وبما إن عشرة في تلاتين بيساوي تلتمية فهنضرب البسط برضو في تلاتين عشان نِوجد قيمة س؛ فهتبقى س بتساوي واحد في تلاتين يعني بتساوي تلاتين.

الطريقة التانية هي الحل عقليًّا؛ يعني هنقول إن واحد على عشرة أو عُشر من التلتمية هيساوي تلاتين.

يعني من الطريقتين ممكن نقول إن ذكر الدب القطبي البالغ يقدر ياكل حوالي تلاتين كيلوجرام خلال ساعة واحدة.

يبقى في الفيديو ده عرفنا إزاي بنقدّر نسبة مئوية معينة من عدد، وعرفنا بعض النِّسب المستخدمة بكثرة والكسور المكافئة ليها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.