فيديو: إيجاد الوسط الحسابي لمجموعة من البيانات

يوضح الفيديو البيانات، والوسط الحسابي؛ وهو مجموع البيانات مقسومًا على عددها، وكيفية إيجاد الوسط الحسابي لمجموعة من البيانات.

٠٢:٥٨

‏نسخة الفيديو النصية

إيجاد الوسط الحسابي لمجموعة من البيانات.

في الفيديو ده هنعرف إيه هو الوسط الحسابي. وإزاي بنوجده.

البيانات هي مجموعة من المعلومات العددية، اللي ليها علاقة بموضوع معيّن. وفيه أكتر من طريقة لوصف المعلومات دي. ومنها الوسط الحسابي. الوسط الحسابي لمجموعة من البيانات هو مجموع البيانات مقسوم على عددها. يعني لو مثلًا مجموعة من البيانات بالشكل ده. فبنحسب الوسط الحسابي ليها بإننا هنجمع البيانات دي ونقسمها على عددهم اللي هو سبعة. فده هيساوي واحد وعشرين على سبعة. هيساوي تلاتة. يبقى الوسط الحسابي لمجموعة البيانات دي هو تلاتة.

مجموعة من الأشجار أطوالها بالأمتار: تلاتة وأربعة من عشرة، ستة واتنين من عشرة، ستة، خمسة وأربعة من عشرة، اتنين. أوجد الوسط الحسابي لأطوال الأشجار.

الوسط الحسابي هو مجموع البيانات على عددها. يعني هيساوي تلاتة وأربعة من عشرة، زائد ستة واتنين من عشرة، زائد ستة، زائد خمسة وأربعة من عشرة، زائد اتنين. على عدد الأشجار اللي هو خمسة. فده هيساوي خمسة وعشرين على خمسة. وخمسة وعشرين على خمسة بيساوي خمسة. يبقى الوسط الحسابي لأطوال الأشجار هو خمس أمتار.

يبيّن الجدول المجاور الدرجات التي حصل عليها أفضل عشرة طلاب في مسابقة للعلوم. أوجد الوسط الحسابي، ثم صف البيانات.

بنفس الطريقة هنوجد الوسط الحسابي بإننا هنجمع البيانات ونقسمها على عددهم. يبقى الوسط الحسابي هيساوي سبعين، زائد اتنين وسبعين، زائد تمنية وستين، زائد اتنين وسبعين، زائد خمسة وتمانين، زائد تلاتة وتمانين، زائد واحد وسبعين، زائد أربعة وسبعين، زائد سبعة وسبعين، زائد اتنين وسبعين. بعدين نقسم على عدد الطلاب اللي هو عشر طلاب. فده هيساوي سبعمية وأربعة وأربعين على عشرة. يعني هيساوي أربعة وسبعين وأربعة من عشرة. يعني الوسط الحسابي لدرجات الطلاب هو أربعة وسبعين وأربعة من عشرة.

وعشان نوصف البيانات، هنشوف أكبر درجة وأقل درجة. فبالنظر للجدول هنلاقي إن أقل درجة هي تمنية وستين، وأكبر درجة هي خمسة وتمانين.

يبقى في الفيديو ده اتكلمنا عن البيانات. وعرفنا إيه هو الوسط الحسابي، وهو مجموع البيانات على عددها. وعرفنا إزاي بنوجده لمجموعة من البيانات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.