فيديو: تقريب الكسور والأعداد الكسرية

يوضح الفيديو كيفية تقدير ناتج جمع وطرح وضرب وقسمة الكسور والأعداد الكسرية باستخدام التقريب، وأمثلةً عليها.

٠٩:٢٧

‏نسخة الفيديو النصية

دلوقتي هنتكلّم عن تقريب الكسور والأعداد الكسرية.

هنتعلّم إزّاي نقدّر جمع وطرح وضرب وقسمة الكسور والأعداد الكسرية. لتقدير جمع وطرح وضرب وقسمة الأعداد الكسرية، هنقرّب العدد الكسري إلى أقرب عدد صحيح.

هناخد مثال عَ الكلام ده. يعني مثلًا العدد الكسري تسعة وتلاتة على أربعة، هنلاحظ إنه تلاتة في البسط قريّبة جدًّا من أربعة في المقام. وبالتالي العدد الكسري تسعة وتلاتة على أربعة هيساوي تقريبًا عشرة. كمان على خطّ الأعداد هنلاحظ إنه تسعة وتلاتة على أربعة قريّبة جدًّا من عشرة. أمَّا العدد الكسري تسعة ونصّ، هنلاحظ إن واحد في البسط قريّبة جدًّا من اتنين في المقام. وبالتالي تسعة ونصّ هيساوي تقريبًا عشرة. أمَّا العدد الكسري تسعة وواحد على أربعة، هنلاحظ إنه واحد في البسط أقلّ بكتير من أربعة في المقام. وبالتالي تسعة وواحد على أربعة هيساوي تقريبًا تسعة. كمان على خطّ الأعداد هنلاحظ إنه تسعة وواحد على أربعة أقرب لتسعة.

هناخد مثال: قدّر ناتج. رقم واحد: تلاتة واتنين على تلاتة زائد خمسة وواحد على ستة.

فالعدد الكسري الأولاني، هنلاحظ إنه اتنين في البسط قريّبة جدًّا من تلاتة في المقام. وبالتالي أقدر أقول: إنه تلاتة واتنين على تلاتة هيساوي تقريبًا أربعة زائد … خمسة وواحد على ستة هنلاحظ إن واحد في البسط أقلّ بكتير من ستة في المقام. وبالتالي خمسة وواحد على ستة هيساوي تقريبًا خمسة. يعني الناتج هيساوي تقريبًا تسعة.

رقم اتنين: ستة واتنين على خمسة في واحد وسبعة على تمنية.

في العدد الكسري الأولاني، هنلاحظ إنه اتنين أقلّ بكتير من خمسة. وبكده أقدر أقول: إنه ستة واتنين على خمسة هيساوي تقريبًا ستة في واحد وسبعة على تمنية. في العدد الكسري التاني، هنلاحظ إنه سبعة في البسط قريّبة جدًّا من تمنية في المقام. وبالتالي واحد وسبعة على تمنية هيساوي تقريبًا اتنين. يعني الناتج هيساوي تقريبًا ستة في اتنين. يعني هيساوي تقريبًا اتناشر.

هنكمّل في الصفحة اللي جايّة. هنلاحظ إنه لتقدير جمع وطرح وضرب وقسمة الكسور، هنقرّب كل كسر إلى صفر أو نصّ أو واحد؛ أيّهما أقرب، زيّ ما هيظهر قدامي دلوقتي. عند التقريب لصفر، هنلاحظ إنه البسط أقلّ بكتير من المقام. وبالتالي هنقرّب لصفر. يعني مثلًا الكسر واحد على ستة، هنلاحظ إنه واحد أقلّ بكتير من ستة. وبالتالي الكسر واحد على ستة هنقرّبه إلى صفر. كمان الكسر واحد على سبعة هنلاحظ إنه واحد في البسط أقلّ بكتير من سبعة في المقام. وبالتالي الكسر واحد على سبعة هيساوي تقريبًا صفر.

عند التقريب لنصّ، هنلاحظ إنه البسط هيكون قريّب جدًّا من نصّ المقام. فهنقرّب لنصّ. يعني مثلًا الكسر خمسة على تمنية، هنلاحظ إنه خمسة في البسط قريّبة جدًّا من نصّ تمنية في المقام. وبالتالي الكسر خمسة على تمنية هيساوي تقريبًا نصّ. كمان الكسر أربعة على تسعة، هنلاحظ إنه أربعة في البسط قريّبة جدًّا من نصّ تسعة في المقام. وبالتالي أربعة على تسعة هيساوي تقريبًا نصّ.

عند التقريب لواحد صحيح، هنلاحظ إنه البسط قريّب جدًّا من المقام. وبالتالي هنقرّب لواحد. يعني مثلًا الكسر تسعة على عشرة، هنلاحظ إنه تسعة في البسط قريّبة جدًّا من عشرة في المقام. وبالتالي هنقرّب الكسر لواحد صحيح. كمان الكسر خمسة على ستة، هنلاحظ إنه خمسة في البسط قريّبة جدًّا من ستة في المقام. وبالتالي الكسر خمسة على ستة هيساوي تقريبًا واحد.

هنكمّل، وناخد أمثلة في الصفحة اللي جايّة. قدّر ناتج كلّ من: رقم واحد: واحد على تمنية زائد اتنين على تلاتة.

في الكسر الأولاني؛ واحد على تمنية، هنلاحظ إنه واحد في البسط أقلّ بكتير من تمنية في المقام. وبالتالي الكسر واحد على تمنية هيساوي تقريبًا صفر. تاني كسر؛ اتنين على تلاتة، هنلاحظ إنه اتنين في البسط قريّبة جدًّا من نصّ تلاتة في المقام. وبالتالي اتنين على تلاتة هيساوي تقريبًا نصّ. يعني أقدر أقول: إن واحد على تمنية زائد اتنين على تلاتة هيساوي تقريبًا صفر زائد نصّ. يعني الناتج هيساوي تقريبًا نصّ.

رقم اتنين: ستة على سبعة ناقص سبعة على عشرة.

الكسر الأولاني؛ ستة على سبعة، هنلاحظ إنه ستة في البسط قريّبة جدًّا من سبعة في المقام. وبالتالي الكسر ستة على سبعة هيكون أقرب لواحد. يعني هيساوي تقريبًا واحد. أمَّا الكسر سبعة على عشرة، هنلاحظ إنه سبعة في البسط قريّبة جدًّا من نصّ عشرة اللي موجودة في المقام. يعني هيكون أقرب لنصّ. وبكده أقدر أقول: إنه سبعة على عشرة هيساوي تقريبًا نصّ. يعني أقدر أقول: إنه رقم اتنين: ستة على سبعة ناقص سبعة على عشرة، هتساوي تقريبًا واحد ناقص نصّ. يعني الناتج هيساوي تقريبًا نصّ.

رقم تلاتة: تمنية على تسعة على خمسة على ستة هيساوي تقريبًا …

هنلاحظ إنه تمنية قريّبة جدًّا من تسعة. وبكده أقدر أقول: إنه تمنية على تسعة هيساوي تقريبًا واحد على … هنلاحظ كمان الكسر التاني، خمسة في البسط قريّبة جدًّا من ستة في المقام. يعني هيساوي تقريبًا واحد. وبكده هيساوي تقريبًا واحد على واحد. يعني الناتج هيساوي تقريبًا واحد.

هنكمّل في الصفحة اللي جايّة. هنلاحظ كمان إنه يمكن استعمال الأعداد المتناغمة، أو الأعداد اللي يمكن قسمتها ذهنيًّا كإحدى الطرق؛ عشان أقدّر نواتج قسمة الكسور أو ضرب الكسور.

هناخد مثال عَ الكلام ده: قدّر ناتج كل من: رقم واحد: واحد على تلاتة، في أربعتاشر.

في البداية، هنجيب مضاعف للعدد تلاتة قريّب جدًّا من العدد أربعتاشر، وهو خمستاشر. وهنلاحظ إنه العددان خمستاشر وتلاتة عددان متناغمان؛ لأنه خمستاشر يقبل القسمة على تلاتة. خمستاشر على تلاتة هتساوي خمسة. وبكده أقدر أقول: إنه واحد على تلاتة، في أربعتاشر هتساوي تقريبًا واحد على تلاتة، في خمستاشر. يعني الناتج هيساوي تقريبًا خمسة.

رقم اتنين: تسعة وسبعة على تمنية على أربعة وواحد على خمسة.

فالعدد الكسري الأولاني؛ تسعة وسبعة على تمنية، هيساوي تقريبًا عشرة؛ لأنه سبعة في البسط قريّبة جدًّا من تمنية في المقام. أمَّا العدد الكسري التاني؛ أربعة وواحد على خمسة، هنقرّبه لخمسة. يعني هيساوي تقريبًا خمسة؛ لأنه عشرة بتقبل القسمة على خمسة. والعددان عشرة وخمسة عددان متناغمان. يعني أقدر أقول: إنه تسعة وسبعة على تمنية على أربعة وواحد على خمسة هيساوي تقريبًا عشرة على خمسة. يعني الناتج هيساوي تقريبًا اتنين.

هناخد مثال تاني في الصفحة اللي جايّة: إذا كان ارتفاع عجلة شاحنة هيساوي اتنين على تلاتة من الارتفاع الكلّي للشاحنة. قدّر ارتفاع العجل، علمًا بأن ارتفاع الشاحنة هيساوي خمستاشر ونصّ قدم.

في البداية، هقدر أقول: إنه ارتفاع العجلة هيساوي اتنين على تلاتة في خمستاشر ونصّ. بما إنه فيه تلاتة موجودة في المقام، يبقى أفكّر إزّاي هقرّب خمستاشر ونصّ إلى خمستاشر؛ لأنه خمستاشر وتلاتة عددان متناغمان. وبكده أقدر أقول: إنه اتنين على تلاتة في خمستاشر ونصّ هتساوي تقريبًا اتنين على تلاتة في خمستاشر. وبما إنه واحد على تلاتة في خمستاشر تساوي خمسة. يعني أقدر أقول: إنه اتنين على تلاتة في خمستاشر ونصّ هتساوي تقريبًا اتنين على تلاتة في خمستاشر. يعني الناتج هيساوي تقريبًا اتنين في خمسة؛ لأنه خمستاشر على تلاتة هتساوي خمسة. يعني الناتج هيساوي تقريبًا عشرة قدم.

وبكده هنكون اتعلّمنا إزّاي نقدّر جمع وطرح وضرب وقسمة الكسور والأعداد الكسرية. وكمان اتعلّمنا إنه يمكن استعمال الأعداد المتناغمة أو الأعداد اللي يمكن قسمتها ذهنيًّا كطريقة؛ عشان أجيب بيها نواتج قسمة الكسور أو ضرب الكسور.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.