تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحويل الأعداد العشرية إلى كسور

أحمد مدحت

يوضح الفيديو كيفية تحويل العدد العشري إلى كسر، والأعداد العشرية الشائعة (المشهورة) والكسور المكافئة لها، مع أمثلة توضيحية.

٠٥:٢٥

‏نسخة الفيديو النصية

هنتكلم عن تحويل الأعداد العشرية إلى كسور. هدفنا من الفيديو إن إحنا نعرف نكتب العدد العشري في صورة كسر؛ فمثلًا الأعداد العشرية اللي زي تسعتاشر من مية، وخمسة وعشرين من مية، وواحد وتلاتين من مية، وتسعة وعشرين من مية، ممكن نكتبها في صورة كسور مقاماتها عشرة أو مية أو ألف وهكذا. وأي عدد بنقدر نكتبه في صورة كسر بيعتبر عدد نسبي، وعلشان نكتب العدد العشري في صورة كسر عندنا خطوتين: أول خطوة هنحدد القيمة المكانية لآخر رقم عشري، والخطوة التانية هنكتب العدد العشري في صورة كسر مقامه هيبقى عبارة عن القيمة المكانية اللي إحنا حددناها، واللي هي بتاعة آخر رقم عشري، وبعد كده هنبسَّط الكسر لو احتجنا لكده.

بعد كده هنشوف مثال نوضح بيه إزاي نكتب العدد العشري في صورة كسر. عندنا في المثال عايزين نكتب كل عدد عشري في ما يأتي في صورة كسر في أبسط صورة، وعندنا تلات أعداد عشرية: العدد الأول هو ستة من عشرة، والتاني هو خمسة وأربعين من مية، و التالت هو تلتمية خمسة وسبعين من ألف.

هنبدأ بالعدد الأول واللي هو ستة من عشرة. أول حاجة هنعملها إننا هنحدد القيمة المكانية لآخر رقم عشري واللي هو ستة، وبالتالي هنستخدم جدول القيمة المكانية؛ فهيظهر لنا الجدول بتاع القيمة المكانية، ولما هنستخدم الجدول هنلاقي آخر رقم عشري واللي هو ستة موجود في خانة الأجزاء من عشرة؛ معنى كده إن ستة من عشرة معناها ستة أجزاء من عشرة؛ بالتالي العدد العشري ستة من عشرة يساوي الكسر ستة على عشرة، واللي معناه ستة أجزاء من عشرة، بالنسبة للكسر ستة على عشرة فهو مش في أبسط صورة فهنبسّطه، وده هيكون من خلال إن إحنا هنقسم كل من البسط والمقام بتاع الكسر على العامل المشترك الأكبر ليهم واللي هو اتنين، فبالنسبة للبسط هيبقى عبارة عن ستة على اتنين يعني يساوي تلاتة، أما المقام فهيبقى عبارة عن عشرة على اتنين يعني يساوي خمسة، معنى كده إن العدد العشري ستة من عشرة يساوي الكسر تلاتة على خمسة، وهو ده المطلوب الأول. بعد كده هنشوف المطلوب التاني: في المطلوب التاني عندنا العدد العشري خمسة وأربعين من مية وعايزين نكتبه في صورة كسر، أول حاجة هنستخدم جدول القيمة المكانية علشان نحدد القيمة المكانية لآخر رقم عشري واللي هو الخمسة، هنلاقي إن آخر رقم عشري وهو خمسة موجود في خانة الأجزاء من مية؛ بالتالي العدد العشري خمسة وأربعين من مية معناه خمسة وأربعين جزء من مية، يعني العدد العشري خمسة وأربعين من مية يساوي الكسر خمسة وأربعين على مية، بالنسبة للكسر خمسة وأربعين على مية فهو مش في أبسط صورة فهنبسّطه، وده هيكون من خلال إن إحنا هنقسم كل من البسط والمقام عَ العامل المشترك الأكبر ليهم واللي هو خمسة؛ فبالنسبة للبسط هيبقى عبارة عن خمسة وأربعين على خمسة يعني هيساوي تسعة، أما المقام فهيبقى عبارة عن مية على خمسة يعني يساوي عشرين، معنى كده إن العدد العشري خمسة وأربعين من مية يساوي الكسر تسعة على عشرين، وهو ده المطلوب التاني. بعد كده هنشوف المطلوب التالت: في المطلوب التالت عايزين نكتب العدد العشري تلتمية خمسة وسبعين من ألف في صورة كسر، أول حاجة هنستخدم جدول القيمة المكانية علشان نحدد القيمة المكانية لآخر رقم عشري، فهنلاقي آخر رقم عشري واللي هو خمسة موجود في خانة الأجزاء من ألف؛ بكده العدد العشري تلتمية خمسة وسبعين من ألف معناه تلتمية خمسة وسبعين جزء من ألف، فبالتالي العدد العشري تلتمية خمسة وسبعين من ألف يساوي الكسر تلتمية خمسة وسبعين على ألف، بالنسبة للكسر تلتمية خمسة وسبعين على ألف فهو مش في أبسط صورة، فهنبسّطه من خلال قسمة كل من البسط والمقام على العامل المشترك الأكبر ليهم واللي هو مية خمسة وعشرين؛ فبالنسبة للبسط هيبقى عبارة عن تلتمية خمسة وسبعين على مية خمسة وعشرين يعني هيساوي تلاتة، أما المقام فهيساوي ألف على مية خمسة وعشرين يعني هيساوي تمنية، معنى كده إن العدد العشري تلتمية خمسة وسبعين من ألف يساوي الكسر تلاتة على تمنية، وهو ده المطلوب.

بعد كده هنشوف بعض الأعداد العشرية المشهورة والكسور المكافئة ليها، فمن ضمن الأعداد العشرية الشائعة أو المشهورة، فمن ضمن الأعداد العشرية المشهورة أو الشائعة: العدد العشري واحد من عشرة واللي بيساوي الكسر واحد على عشرة، وكمان العدد العشري اتنين من عشرة واللي بيساوي الكسر واحد على خمسة، وبرضو العدد العشري خمسة وعشرين من مية واللي بيساوي الكسر واحد على أربعة أو رُبع، وكمان العدد العشري خمسة من عشرة واللي بيساوي الكسر واحد على اتنين أو نص، وكمان العدد العشري خمسة وسبعين من مية واللي بيساوي الكسر تلاتة على أربعة.

بكده يبقى إحنا في الفيديو ده عرفنا إزاي نحول الأعداد العشرية لكسور وكان عندنا خطوتين: في الخطوة الأولى كنا بنحدد القيمة المكانية لآخر رقم عشري، وفي الخطوة التانية كنا بنكتب العدد العشري في صورة كسر بحيث يكون مقامه هو القيمة المكانية اللي إحنا حددناها واللي هي بتاعة آخر رقم عشري، بعد كده كنا بنبسّط الكسر لو احتجنا لكده. وكمان عرفنا بعض الأعداد العشرية الشائعة أو المشهورة والكسور المكافئة ليها.