تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تطبيقات على النسبة المئوية للتغير

أحمد مدحت

يتناول الفيديو مثالًا على ضريبة المبيعات كتطبيق على النسبة المئوية للزيادة، ومثالًا على الخصم كتطبيق على النسبة المئوية للنقصان.

٠٤:٤٢

‏نسخة الفيديو النصية

هنتكلم عن تطبيقات على النسبة المئوية للتغير.

النسبة المئوية للتغير هي عبارة عن النسبة اللي بتقارن مقدار التغير في كمية معينة، بالكمية الأصلية. بس بتكون في صورة نسبة مئوية. وكان فيه منها نوعين. الأول: هو النسبة المئوية للزيادة. وده لمّا تبقى الكمية الجديدة أكبر من الكمية الأصلية. أمّا التاني: هو النسبة المئوية للنقصان. وده لمّا تبقى الكمية الجديدة أقل من الكمية الأصلية. وإحنا في الفيديو ده هنتكلم عن التطبيقات بتاعة النسبة المئوية للتغير. ومنها ضريبة المبيعات، والخصم.

بالنسبة لضريبة المبيعات، فهي عبارة عن مثال أو تطبيق على النسبة المئوية للزيادة. أمّا الخصم فهو تطبيق أو مثال على النسبة المئوية للنقصان. هنبدأ أول حاجة بمثال على ضريبة المبيعات. بس هيكون في صفحة تانية. هنقلب الصفحة هيظهر لنا المثال.

عندنا في المثال إن فيه تاجر بيشتري بضايع. وكان سعر البضايع دي قبل الضريبة هو ألفين وتمنمية جنيه. فإذا كانت ضريبة المبيعات هي سبعة في المية من إجمالي المبيعات. عايزين نحسب التكلفة النهائية. في الأول هنبدأ نحسب الضريبة، واللي هي سبعة في المية من سعر البضايع قبل الضريبة. يعني سبعة في المية من ألفين وتمنمية جنيه. واللي هيساوي سبعة من مية في ألفين وتمنمية. وده لأن النسبة المئوية سبعة في المية بتساوي العدد العشري سبعة من مية. يعني يساوي مية ستة وتسعين جنيه. وهي دي الضريبة.

بعد كده هنجيب السعر النهائي، أو التكلفة النهائية، من خلال إن إحنا هنضيف الضريبة للسعر الأصلي. وده معناه إن التكلفة النهائية تساوي السعر الأصلي، وهو ألفين وتمنمية جنيه؛ زائد الضريبة، وهي مية ستة وتسعين جنيه. يعني التكلفة النهائية تساوي ألفين تسعمية ستة وتسعين جنيه. وبكده يبقى إحنا عرفنا التطبيق بتاع ضريبة المبيعات. هنقلب الصفحة، وهيظهر لنا مثال كتطبيق على الخصم.

في المثال اللي عندنا، عايزين نجيب تمن بيع درّاجة، سعرها الأصلي خمسمية جنيه، بعد خصم عشرين في المية من تمنها. أول حاجة، هنبدأ نحسب الخصم. والخصم ده كان عبارة عن عشرين في المية من السعر الأصلي. يعني عشرين في المية من خمسمية جنيه. يعني هيساوي اتنين من عشرة في خمسمية. يعني هنلاقي إن الخصم بيساوي مية جنيه.

بعد ما جِبنا الخصم، هنبدأ نجيب السعر النهائي للدراجة بعد الخصم. يعني هنطرح الخصم من السعر الأصلي للدراجة. معنى كده إن السعر النهائي بعد الخصم يساوي السعر الأصلي وهو خمسمية جنيه، ناقص الخصم اللي هو مية جنيه. يعني هيساوي ربعمية جنيه.

بكده في الفيديو ده عرفنا تطبيقات على النسبة المئوية للتغيّر. وكان عندنا تطبيقين. الأول: هو ضريبة المبيعات، وده كان تطبيق ومثال على النسبة المئوية للزيادة. أمّا التاني: هو الخصم، وده كان تطبيق على النسبة المئوية للنقصان.