نسخة الفيديو النصية
أوجد الحد التالي في المتتابعة: ستة، تلاتين، مية وخمسين، سبعمية وخمسين، ونقط.
مُعطى في السؤال المتتابعة، ومطلوب نجيب الحد اللي ناقص فيها. لمّا هنبصّ على الأعداد في المتتابعة، هنلاحظ إن المتتابعة تزايدية؛ لأن الأرقام بتزيد. بدأنا بستة، وبعد كده تلاتين، وبعد كده مية وخمسين، وبعد كده سبعمية وخمسين. لمّا هنيجي نفكر، هنلاحظ إنه الزيادة سريعة. فلو جرّبنا عملية الجمع، هنلاقي عشان نوصل من ستة لتلاتين، هنجمع أربعة وعشرين. وعشان نوصل من تلاتين لمية وخمسين، هنجمع مية وعشرين. يعني عملية الجمع مش هتنفع هنا؛ لأننا مش هنجمع نفس العدد. وبالتالي هنجرب عملية الضرب.
هنفكّر، ستة في كام هيساوي تلاتين. هنلاحظ إنه ستة في خمسة هيساوي تلاتين. وهنفكّر، تلاتين في كام يساوي مية وخمسين. هنلاحظ إنه تلاتين في خمسة هيساوي برضو مية وخمسين. وبعدين هنفكّر، مية وخمسين في كام هيساوي سبعمية وخمسين. هنلاقي إنه مية وخمسين في خمسة هيساوي سبعمية وخمسين. يعني هنضرب برضو في خمسة. إيه ده؟! كل مرة هنضرب في خمسة. يعني عشان أجيب العدد اللي بعد سبعمية وخمسين، هضرب في خمسة.
هحسب سبعمية وخمسين في خمسة. خمسة في صفر بصفر. خمسة في خمسة بخمسة وعشرين. وبعدين خمسة في سبعة، خمسة وتلاتين، زائد اتنين يعني سبعة وتلاتين. يعني سبعمية وخمسين في خمسة هيساوي تلات آلاف سبعمية وخمسين. وبكده أقدر أقول إنه الحد التالي في المتتابعة هو تلات آلاف سبعمية وخمسين.
وبما إننا استعملنا عملية الضرب في المتتابعة دي، يعني أقدر أقول إنه المتتابعة دي متتابعة هندسية. وهي المتتابعة اللي كل حدّ من حدودها بينتج عن ضرب الحد اللي قبله، في عدد ثابت. وبكده، زيّ ما قلنا، الحد التالي في المتتابعة هو تلات آلاف سبعمية وخمسين.
