تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الأعداد حتى ١٠٠٠

نهال عصمت

يتناول الفيديو كيفية المقارنة بين الأعداد حتى ١٠٠٠، والعلامات المستخدمة للتعبير عن ذلك.

٠٧:٤٨

‏نسخة الفيديو النصية

مقارنة الأعداد حتى ألف.

هنتعلم إزاي نقارن بين الأعداد حتى ألف، باستخدام علامة أكبر من، أو علامة أصغر من، أو علامة يساوي.

عشان نقدر نقارن بين عددين، أول حاجة هنبدأ نبص على أكبر قيمة مكانية وهي خانة المئات. لو كانت الأعداد اللي موجودة في خانة المئات متساوية، هنبدأ نبص على الخانة الأصغر منها وهي خانة العشرات. لو كانت الأعداد اللي موجودة في خانة العشرات متساوية، هنبدأ نبص على الخانة الأصغر وهي خانة الآحاد.

هنبدأ نجيب صفحة جديدة ونشوف أمثلة، نعرف إزاي نقارن بين الأعداد باستخدام علامة أكبر من، أو علامة أصغر من، أو علامة يساوي.

مُعطى مجموعة النماذج الآتية. عايزين نقارن بين كل نموذجين لهما نفس اللون.

أول حاجة النموذج اللي باللون الأزرق. النموذج الأول يمثّل العدد مية اتنين وتلاتين. والنموذج التاني يمثّل العدد مية وأربعتاشر. عايزين نقارن بين العددين مية اتنين وتلاتين، ومية وأربعتاشر.

هنبدأ نبص على الخانة اللي ليها أكبر قيمة مكانية، وهي خانة المئات. في العدد الأول خانة المئات فيها واحد. والعدد التاني خانة المئات هي كمان فيها واحد. يبقى كده خانة المئات متساوية.

يبقى هنبدأ نبص على الخانة اللي أصغر منها، وهي خانة العشرات. في العدد الأول خانة العشرات فيها تلاتة. وفي العدد التاني خانة العشرات فيها واحد. التلاتة أكبر من الواحد. وبالتالي نقدر نقول إن مية اتنين وتلاتين أكبر من مية وأربعتاشر. نقدر نكتبها بطريقة تانية، وهي مية اتنين وتلاتين أكبر من مية وأربعتاشر.

بعد كده هنبدأ نبص على النموذج التاني. أول نموذج يمثل العدد مية خمسة وعشرين. والنموذج التاني يمثل العدد مية اتنين وخمسين. عايزين نقارن بين العددين مية خمسة وعشرين، ومية اتنين وخمسين.

هنبدأ نبص على الخانة اللي ليها أكبر قيمة مكانية، وهي خانة المئات. في العدد الأول خانة المئات فيها واحد. والعدد التاني خانة المئات هي كمان فيها واحد. يبقى كده خانة المئات متساوية.

يبقى هنبدأ نبص على الخانة اللي أصغر منها وهي خانة العشرات. في العدد الأول خانة العشرات فيها اتنين. والعدد التاني خانة العشرات فيها خمسة. والاتنين أصغر من الخمسة. وبالتالي نقدر نقول إن مية خمسة وعشرين أصغر من مية اتنين وخمسين. ونقدر نكتبها بطريقة ثانية وهي مية خمسة وعشرين أصغر من مية اتنين وخمسين.

آخر نموذجين عندنا اللي باللون الأخضر. النموذج الأول يمثّل العدد مية خمسة وتلاتين. والنموذج التاني يمثّل العدد مية خمسة وتلاتين. عايزين نقارن بين العددين.

هنبدأ نبص على الخانة اللي ليها أكبر قيمة مكانية، وهي خانة المئات. في العدد الأول خانة المئات فيها واحد. والعدد التاني خانة المئات هي كمان فيها واحد. يبقى كده خانة المئات متساوية.

يبقى هنبص على الخانة اللي أصغر منها وهي خانة العشرات. في العدد الأول خانة العشرات فيها تلاتة. وفي العدد التاني خانة العشرات هي كمان فيها تلاتة. يبقى كده خانة العشرات متساوية في العددين.

هنبدأ نبص على الخانة الأصغر وهي خانة الآحاد. في العدد الأول خانة الآحاد فيها خمسة. وفي العدد التاني خانة الآحاد هي كمان فيها خمسة.

وبالتالي نقدر نقول إن العدد الأول بيساوي العدد التاني؛ عشان خانة المئات متساوية، وخانة العشرات متساوية، وخانة الآحاد هي كمان متساوية. ونقدر نكتبها بطريقة تانية، وهي مية خمسة وتلاتين، تساوي مية خمسة وتلاتين.

يبقى كده قدرنا نقارن بين النماذج المختلفة باستخدام علامة أكبر من، أو أصغر من، أو يساوي. هنبدأ نجيب صفحة جديدة، ونشوف أمثلة أخرى.

مطلوب: قارن بين العددين مية اتنين وأربعين، ومية أربعة وعشرين.

عشان نقارن بين العددين، هنبدأ نبص على الخانة اللي ليها أكبر قيمة مكانية وهي خانة المئات. خانة المئات في العدد الأول فيها واحد. وخانة المئات في العدد التاني فيها واحد. يبقى كده خانة المئات متساوية في العددين.

وبالتالي هنبص على الخانة اللي أصغر منها، وهي خانة العشرات. في العدد الأول خانة العشرات فيها أربعة. وفي العدد التاني خانة العشرات فيها اتنين. والأربعة أكبر من الاتنين. يبقى نقدر نقول إن مية اتنين وأربعين أكبر من مية أربعة وعشرين.

تاني عددين عايزين نقارن بينهم ستمية أربعة وتسعين وستمية أربعة وتسعين.

هنبدأ نبص على الخانة اللي ليها أكبر قيمة مكانية، وهي خانة المئات. في العدد الأول خانة المئات فيها ستة. وفي العدد التاني خانة المئات هي كمان فيها ستة. يبقى كده خانة المئات متساوية.

هنبص على الخانة الأصغر، وهي خانة العشرات. في العدد الأول خانة العشرات فيها تسعة. وفي العدد التاني هو كمان خانة العشرات فيها تسعة. يبقى كده برضو خانة العشرات متساوية.

وبالتالي هنبص على الخانة اللي أصغر، وهي خانة الآحاد. في العدد الأول خانة الآحاد فيها أربعة. والعدد التاني خانة المئات … عفوًا خانة الآحاد هي كمان فيها أربعة.

يبقى كده نقدر نقول إن العدد الأول ستمية أربعة وتسعين، يساوي العدد التاني اللي هو ستمية أربعة وتسعين.

آخر عددين عايزين نقارن بينهم مية وألف.

هنلاحظ إن العدد الأول مكوّن من تلات خانات، لكن العدد التاني مكون من أربع خانات. أكبر خانة ليها قيمة مكانية في العدد الأول هي خانة المئات. لكن في العدد التاني أكبر خانة ليها قيمة مكانية هي خانة الآلاف. وبالتالي نقدر نقول إن المية اللي هي متكونة من تلات خانات، أصغر من الألف اللي متكونة من أربع خانات. يبقى المية أصغر من الألف.

وبكده عرفنا إزاي نقارن بين الأعداد حتى ألف، باستخدام علامة أكبر من، أو علامة أصغر من، أو علامة يساوي.