فيديو: خواص الزاويتين المتتامتين

أيٌّ من العبارات التالية توضح الزوايتين المتتامتين بصورة صحيحة؟ [أ] الزاويتان المتتامتان متساويتان في القياس. [ب] مجموع الزاويتين المتتامتين يساوي ٩٠°. [ج] مجموع الزاويتين المتتامتين يساوي ١٨٠°. [د] مجموع الزاويتين المتتامتين يساوي ٢٧٠°. [ﻫ] مجموع الزاويتين المتتامتين يساوي ٣٦٠°. ‎

٠٢:٢٩

‏نسخة الفيديو النصية

أيّ من العبارات التالية توضّح الزاويتين المتتامتين بصورة صحيحة؟ ومُعطى عندنا الاختيارات أ: الزاويتان المتتامتان متساويتان في القياس. ب: مجموع الزاويتين المتتامتين يساوي تسعين درجة. ج: مجموع الزاويتين المتتامتين يساوي مية وتمانين درجة. د: مجموع الزاويتين المتتامتين يساوي ميتين وسبعين درجة. ﻫ: مجموع الزاويتين المتتامتين يساوي تلتمية وستين درجة.

وفي الأول خلينا نفتكر إن الزاويتين المتتامتين هما اللي بيكوّنوا زاوية قائمة، فيبقى زي الشكل اللي قدامنا ده، هيبقى عندنا الزاوية دي والزاوية دي بيكوّنوا زاوية قايمة اللي هي الزاوية دي، وزي ما إحنا عارفين إن الزاوية القايمة هي الزاوية اللي قياسها تسعين درجة؛ فمعنى كده إن هيبقى مجموع الزاويتين دول بيساوي تسعين درجة.

فبعد كده لمّا نيجي نشوف الاختيارات اللي عندنا؛ الاختيار أ: الزاويتان المتتامتان متساويتان في القياس، فمن الشكل هنا هنلاحظ إن الزاويتين اللي عندنا دول مش متساويين في القياس، لكن ممكن نرسم زاويتين متتامتين متساويين في القياس، فمثلًا لو رسمنا كل زاوية قياسها خمسة وأربعين درجة هيبقى مجموعهم تسعين درجة، فبالتالي هيبقوا زاويتين متتامتين لكن مش شرط يكونوا متساويين؛ لأن ممكن يكون مثلًا زاوية قياسها ستين درجة والزاوية التانية قياسها تلاتين درجة، فبرضو هيبقى هم اللي اتنين زاويتين متتامتين؛ لأنهم بيكوّنوا زاوية قايمة، يعني زاوية قياسها تسعين درجة. فبالتالي هيبقى الاختيار أ اختيار خاطئ؛ لأن الزاويتين المتتامتين مش لازم يكونوا متساويين في القياس.

بعد كده هنلاحظ الاختيار ب: مجموع الزاويتين المتتامتين يساوي تسعين درجة، وده هيبقى اختيار صحيح؛ لأن زي ما قلنا إن الزاويتين المتتامتين هم اللي بيكوّنوا زاوية قايمة، يعني زاوية قياسها تسعين درجة؛ فبالتالي مجموعهم يساوي تسعين درجة هو اختيار صحيح.

وأما الاختيار ج فهيبقى اختيار خاطئ؛ لأن الزاويتين اللي مجموعهم مية وتمانين درجة هم الزاويتين المتكاملتين مش المتتامتين؛ فبالتالي هيبقى اختيار خاطئ، وبنفس الطريقة الاختيار د خاطئ والاختيار ﻫ خاطئ.

فبالتالي هتبقى الإجابة الصحيحة هي الاختيار ب: مجموع الزاويتين المتتامتين يساوي تسعين درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.