فيديو: نموذج تدريب امتحان الفيزياء • ٢٠١٩ • السؤال الثاني أ

نموذج تدريب امتحان الفيزياء • ٢٠١٩ • السؤال الثاني أ

٠١:٢٤

‏نسخة الفيديو النصية

لماذا تختفي بعض الأطوال الموجية من الطيف المستمرّ للضوء الأبيض عند مروره خلال أبخرة العناصر؟

طاقة جزيئات أبخرة العناصر لازم تكون بتساوي قيم معيَّنة. وما ينفعش طاقة الجزيئات تكون بتساوي أيّ قيمة غير القيم دي. وبنسمِّي قيم الطاقة المتاحة دي مستويات الطاقة. وأقل مستوى طاقة متاح بيبقى اسمه المستوى الأرضي. ولو سقط على الجزيئات فوتون طاقته بتساوي فرق الطاقة بين أيّ مستويين طاقة، الجزيء بيمتصّ طاقة الفوتون وبيُثار للمستوى الأعلى.

أمَّا لو الجزيء سقط عليه فوتون طاقته ما بتساويش الفرق بين أيّ مستوى طاقة أعلى من المستوى اللي هو فيه، الفوتون بيمُرّ والجزيء ما بيمتصوش. فلو سقط على الجزيء طيف مستمرّ للضوء الأبيض، يعني مكوَّن من جميع الأطوال الموجية الموجودة في الضوء المرئي. فالجزيء هيمتصّ الأطوال الموجية اللي طاقتها بتساوي الفرق بين أيّ مستوى طاقة أعلى من المستوى اللي هو فيه وطاقة المستوى اللي هو فيه. وباقي الأطوال الموجية هتمُرّ خلاله. والجزيء هيُثار لمستوى الطاقة الأعلى.

وعلشان كده بتختفي بعض الأطوال الموجية من الطيف المستمرّ للضوء الأبيض عند مروره خلال أبخرة العناصر. والأطوال الموجية اللي بتختفي بنسمِّيها خطوط الطيف المميِّز لبخار العنصر.

فنقدر كده نقول الإجابة: إنها نتيجة امتصاص بخار العنصر لخطوط الطيف المميِّزة له.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.