فيديو: العوامل والمضاعفات

يوضح الفيديو ما العوامل، وما المضاعفات، وكيفية إيجادها للأعداد الطبيعية، وأمثلةً عليها.

٠٣:٠٣

‏نسخة الفيديو النصية

العوامل والمضاعفات.

في الفيديو ده هنتعرّف على العوامل والمضاعفات، وعلى طريقة إيجادهم للأعداد الطبيعية.

العوامل هي عددين أو أكتر مضروبين في بعض، عشان يكون الناتج عدد محدّد. وعشان نوصل لعوامل أيّ عدد، بنحلّله. يعني مثلًا لو فصل مكوّن من أربعة وعشرين طالب، فكم طريقة لتوزيع الطلاب داخل الفصل؟

يبقى كده إحنا عاوزين عوامل أربعة وعشرين. فهنشوف إيه الأعداد اللي لو ضربنها في بعضها، هيكون الناتج أربعة وعشرين.

أول حاجة فيه واحد في أربعة وعشرين. يعني كل الطلاب هيجلسوا في صف واحد، وأربعة وعشرين عمود بالشكل ده. برضو اتنين في اتناشر بيساوي أربعة وعشرين. يعني الطلاب هيجلسوا صفين، واتناشر عمود بالشكل ده. برضو ممكن نقول تلاتة في تمنية بأربعة وعشرين. يعني الطلاب هيجلسوا في تلات صفوف، وتمن أعمدة بالشكل ده. وممكن برضو أربعة في ستة، برضو بأربعة وعشرين. يعني الطلاب هيجلسوا في أربع صفوف، وست أعمدة بالشكل ده. وكل طريقة من الطرق دي ممكن عكس العملية فيها، بتبديل عدد الأعمدة والصفوف.

يبقى عوامل أربعة وعشرين هي: واحد، واتنين، وتلاتة، وأربعة، وستة، وتمنية، واتناشر، وأربعة وعشرين. وعدد الطرق لتوزيع الطلاب داخل الفصل تمن طرق.

نتنقل لصفحة تانية. المضاعفات هي حاصل ضرب العدد مع أيّ عدد طبيعي آخر. يعني مثلًا خمستاشر مضاعف من مضاعفات خمسة؛ لأنه مكوّن من تلات مجموعات من خمسة.

نحلّ مثال. عايزين أول خمس مضاعفات للعدد سبعة. في جدول الضرب اللي هيظهر، في الأعمدة، هنشوف العمود اللي تحت السبعة. وفي الصفوف، هنشوف الصف اللي على شمال السبعة. كل الأعداد اللي مكتوبة في الصف أو العمود دي، هي مضاعفات للسبعة. نلاحظ إن أول مضاعف لأيّ عدد هو صفر؛ لأن حاصل ضرب أيّ عدد في صفر هو صفر. يبقى أول خمس مضاعفات للعدد سبعة هي: صفر، سبعة، أربعتاشر، واحد وعشرين، تمنية وعشرين.

وبكده نبقى خلّصنا الفيديو ده، اللي اتعرّفنا فيه على العوامل والمضاعفات، وطريقة إيجادهم للأعداد الطبيعية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.