فيديو: تصنيف الزوايا

يوضح الفيديو أنواع الزوايا، وكيفية تصنيفها حسب قياسها، مع أمثلة توضيحية.

٠٥:٠٥

‏نسخة الفيديو النصية

تصنيف الزوايا. في الفيديو ده هنعرف إزاي نصنف الزوايا على حسب قياسها، وهنحل بعض الأمثلة المختلفة.

أولًا هنتعرّف على أنواع الزوايا، والزوايا عندنا بتتصنّف على حسب قياسها. وعندنا أربع أنواع من الزوايا. أول نوع عندنا هو الزاوية القايمة، والزاوية القايمة هي الزاوية اللي قياسها تسعين درجة، وبنلاحظ إننا لما بنرسم الزاوية القايمة بنرسم الرمز ده، والرمز ده بيمثل الزاوية القايمة. طيب خلينا نشوف النوع التاني من الزوايا، النوع التاني من الزوايا عندنا هو الزاوية الحادة، والزاوية الحادة هي الزاوية اللي قياسها أقل من تسعين درجة. وأما النوع التالت عندنا فهو الزاوية المنفرجة، والزاوية المنفرجة هي الزاوية اللي قياسها بين تسعين درجة ومية وتمانين درجة؛ يعني قياسها أكبر من تسعين وأقل من مية وتمانين، ودي بنسميها الزاوية المنفرجة. وخلينا نشوف النوع الأخير اللي عندنا، وهو الزاوية المستقيمة، والزاوية المستقيمة هي الزاوية اللي بيبقى قياسها مية وتمانين درجة، وهنلاحظ من شكل الزاوية المستقيمة إن ضلعَي الزاوية بيبقوا على نفس الاستقامة، وعلشان كده هي زاوية مستقيمة؛ أي هي زاوية قياسها مية وتمانين درجة.

وهي دي أنواع الزوايا اللي عندنا، واللي بنصنّفها على حسب قياس الزاوية. وخلينا نشوف بعض الأمثلة، أول مثال عندنا صنّف كلًّا من الزاويتين الآتيتين إلى حادة أو منفرجة أو قائمة أو مستقيمة، ومعطى عندنا في الشكل زاويتين مختلفتين، وعايزين نصنّفهم.

طيب خلينا نشوف أول زاوية عندنا، هنلاحظ إن قياس الزاوية لو جينا قسناها هنلاقيها تسعين درجة. وبما إن قياس الزاوية تسعين درجة، إذن هي زاوية قايمة. ولو بصينا على الشكل هنلاحظ إن الزاوية فيها الرمز ده، وزي ما قلنا إن الرمز ده بيعبّر عن الزاوية القايمة. بعد كده هنشوف الشكل اللي بعده، اللي هي الزاوية دي، لو بصينا على الزاوية هنلاحظ إن هي أكبر من تسعين درجة، وأقل من مية وتمانين درجة؛ معنى كده إن الزاوية أكبر من الزاوية القايمة، لكن في نفس الوقت هي أصغر من أو أقل من الزاوية المستقيمة؛ إذن قياس الزاوية هيبقى بين تسعين درجة ومية وتمانين درجة، يعني أكبر من تسعين وأقل من مية وتمانين؛ فبالتالى هيبقى نوع الزاوية زاوية منفرجة. خلينا نشوف مثال آخر.

صنف كلًّا من الزاويتين الآتيتين إلى حادة أو منفرجة أو قائمة أو مستقيمة. وعندنا الزاويتين اللي في الشكل قدامنا، فخلينا نشوف أول زاوية عندنا، في الزاوية دي هنلاحظ إن ضلعي الزاوية على نفس الاستقامة؛ فمعنى كده إن قياس الزاوية هو مية وتمانين درجة. وبما إن قياس الزاوية مية وتمانين درجة؛ فبالتالي هيبقى نوع الزاوية اللي عندنا هي زاوية مستقيمة، وزي ما قلنا إن الزاوية المستقيمة هي الزاوية اللي قياسها مية وتمانين درجة.

نشوف الزاوية اللي بعد كده، اللي عندنا هنا، لو جينا نقيس الزاوية اللي عندنا هنلاحظ إن قياسها أقل من تسعين درجة، وزي ما قلنا إن الزاوية اللي بيبقى قياسها أقل من تسعين درجة هي زاوية حادة؛ فبالتالي نوع الزاوية اللي عندنا هي زاوية حادة، وهي الزاوية اللي قياسها أقل من تسعين درجة.

وبكده نكون عرفنا نصنف الزوايا على حسب قياسها، واتعرّفنا على أنواع الزوايا، وأول نوع عندنا هو الزاوية القايمة، والزاوية القايمة هي الزاوية اللي قياسها تسعين درجة، وبنرمز للزاوية القايمة بالرمز ده، واللي هو بيعبّر عن الزاوية القايمة. بعد كده النوع التاني هو الزاوية الحادة، والزاوية الحادة قلنا هى الزاوية اللي قياسها أقل من تسعين درجة. وعرفنا بعد كده الزاوية المنفرجة، والزاوية المنفرجة هي الزاوية اللي بين تسعين ومية وتمانين؛ يعني قياسها أكبر من تسعين درجة وأقل من مية وتمانين درجة؛ يعني نقدر نقول الزاوية المنفرجة هي الزاوية اللي أكبر من الزاوية القايمة وأقل من الزاوية المستقيمة. وأما النوع الأخير عندنا فهو الزاوية المستقيمة، والزاوية المستقيمة هي الزاوية اللي قياسها مية وتمانين درجة، وبيبقى ضلعين الزاوية على نفس الاستقامة.

وبكده نكون اتعرّفنا على أنواع الزوايا، وحلينا بعض الأمثلة المختلفة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.