تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحديد الأشكال الثلاثية الأبعاد

سوزان فائق

يوضح الفيديو مفهوم الأشكال الثلاثية الأبعاد، والمجسمات المتعددة الأسطح، والمنشور، ومفاهيم الوجه والحرف والرأس، ويتناول صفات متوازي المستطيلات والمنشور الثلاثي والأسطوانة والمخروط، وكيفية تحديد الأشكال الثلاثية الأبعاد.

٠٧:٢٥

‏نسخة الفيديو النصية

في الفيديو ده هنتكلّم عن تحديد الأشكال الثلاثية الأبعاد. هنعرف إيه هي الأشكال الثلاثية الأبعاد، وإيه هي المجسّمات متعددة الأسطح. وهنتعرّف على متوازي المستطيلات، والمنشور الثلاثي، والأسطوانة، والمخروط. وهنعرف إيه الفروق ما بينهم. وهنشوف بعض الأمثلة من حياتنا اللي بنحدّد فيها الأشكال الثلاثية الأبعاد.

الأشكال الثلاثية الأبعاد هي أشكال لها طول، وعرض، وارتفاع. زيّ الشكل اللي قدّامنا ده؛ له طول، وعرض، وارتفاع. وبنقول عليها مجسّمات.

الأشكال دي بيبقى لها أوجه؛ يعني سطح مستوي كده. والسطح المستوي ده بيبقى متعدّد الأضلاع. يعني ممكن يبقى مثلث، أو مربع، أو مستطيل، أو شكل خماسي، أو شكل سداسي.

فيه تعريف كمان اللي هو المنشور. وهو مجسّم متعدّد الأسطح، له وجهين متوازيين متطابقين. ولمّا بيكون فيه وجهين متوازيين متطابقين بنسمّيهم قاعدة المنشور. يبقى المنشور فيه قاعدتين، والقاعدتين دول عبارة عن وجهين متوازيين متطابقين.

الأشكال الثلاثية الأبعاد بيبقى لها خواص تفرّقها عن بعضها؛ علشان نعرف نحدّدها. علشان نعرف نحدّد الشكل الثلاثي الأبعاد هنتعرّف على تعريفات الوجه، والحرف، والرأس.

الوجه اتكلّمنا عنه وقلنا هو سطح مستوي. فالشكل اللي قدّامنا ده لو عدّينا عدد الأسطح المستوية، هنلاقيها ستة. يبقى الشكل الثلاثي الأبعاد ده له ستة أوجه.

الحرف هو تقاطع وجهين. يعني لمّا بنلاقي الوجه اللي فوق ده مع اللي في الجنب، التقاطع ما بينهم ده هو الحرف. وبنقول عليه ضلع.

والشكل اللي قدّامنا ده لو عدّينا عدد الأحرف اللي هي تقاطع الوجهين. واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر. يبقى له اتناشر حرف.

باقي لنا نعرف إيه هي الرأس. الرأس هي نقطة تلاقي ثلاثة أحرف. يعني الحرف واحد، واتنين، وتلاتة بيتلاقوا في نقطة هنا دي بنسمّيها الرأس. عدد الرؤوس في الشكل اللي قدّامنا ده هي تمن رؤوس.

من خلال معرفتنا لعدد الأوجه، والأحرف، والرؤوس بنقدر نحدّد الشكل الثلاثي الأبعاد إيه اسمه. هنتعرّف على بعض الأشكال الثلاثية الأبعاد.

أول حاجة متوازي المستطيلات. ده عبارة عن منشور له ستة أوجه، وبيبقى له قاعدتين متوازيتين متطابقتين على شكل مستطيل.

المنشور الثلاثي عبارة عن منشور قاعدتيه على شكل مثلث.

المخروط عبارة عن مجسّم، وسطحه من عند الرأس إلى القاعدة بيبقى سطح منحني. لكن الأسطوانة هي عبارة عن مجسّم بيحتوي قاعدتين دائريتين متوازيتين متطابقتين.

كل شكل مِ الأشكال دي بيميّزه صفات خاصة بيه هو؛ من حيث عدد الرؤوس، أو عدد الأحرف، أو عدد الأوجه وشكل الأوجه. وهي دي اللي بنعرف نحدّد بيها الأشكال الثلاثية الأبعاد.

في الشكل اللي قدّامنا ده حدّد القاعدتين المتوازيتين المتطابقتين، ثم حدّد الشكل.

هنعدّ عدد أوجه الشكل، اللي هي الأسطح المستوية، هنلاقي هنا: واحدة فوق، وواحدة تحت؛ آدي اتنين. وواحدة في الجنب؛ تلاتة. وواحدة في الوشّ قدّام؛ تبقى أربعة. وخمسة في الجنب التاني. يبقى الشكل ده له خمس أوجه. منهم اتنين متطابقتين متوازيتين اللي هي فوق دي، واللي تحت دي على شكل مثلث.

علشان نحدّد الشكل هنتعرّف على باقي صفاته. عدد الأحرف: واحد، اتنين، تلاتة، اللي هي تقاطع الأسطح المستوية اللي هي الأوجه، أربعة، خمسة، ستة، سبعة، تمنية، تسعة.

كل حرف من الأحرف دي … الأحرف دي فيه منهم تلاتة؛ اللي هم رقم: أربعة، وخمسة، وستة … الأحرف دي فيه منها رقم: أربعة، وخمسة، وستة عبارة عن تقاطع الأوجه اللي على شكل متوازيات أضلاع دول متطابقين.

كمان هنتكلّم على عدد الرؤوس. هنعدّ عدد الرؤوس اللي هي تقاطع التلات أحرف. آدي: واحد، اتنين، تلاتة، أربعة، خمسة، ستة. يبقى الشكل بيحتوي على ست رؤوس.

يبقى الشكل ده اسمه منشور ثلاثي. لأن هو عبارة عن منشور اللي بيميّزه إن فيه قاعدتين متطابقتين متوازيتين، وكل قاعدة فيهم على شكل مثلث. عشان كده قلنا هو منشور ثلاثي. نشوف مثال من حياتنا العملية.

اوصف أجزاء العلبة المحتوية على كرات التنس المتعامدة والمتطابقة، ثم حدّد شكل العلبة.

الأجزاء اللي متطابقة في العلبة اللي قدّامنا دي هي القاعدتين اللي على شكل دائرة. والقاعدتين دول متعامدتين على السطح المنحني للعلبة. والشكل ده مالوش أحرف؛ لأن ما فيش أسطح مستوية فيه. يبقى العلبة دي على شكل أسطوانة. وبكده يبقى حدّدنا الشكل.

اتكلّمنا في الفيديو ده عن الأشكال الثلاثية الأبعاد. وعرفنا إيه هو المجسّم المتعدد الأسطح. وعرفنا الوجه، والرأس، والحرف. وعرفنا إزاي نحدّد الأشكال الثلاثية الأبعاد بناءً على وصفها. وكمان عرفنا إيه الفرق ما بين متوازي المستطيلات، والمنشور الثلاثي، والأسطوانة، والمخروط.