فيديو: استخدام حساب المثلثات للمثلث القائم الزاوية لحل مسائل كلامية

يستند سلم على جدار؛ حيث ارتفاع الطرف الأعلى للسلم ٤٫٥ م من الأرض. كانت زاوية ميل السلم على الأرض ٤١°. أوجد طول السلم لأقرب رقمين عشريين.

٠٢:٥٤

‏نسخة الفيديو النصية

يستند سلم على جدار. حيث ارتفاع الطرف الأعلى للسلم أربعة وخمسة من عشرة متر من الأرض. كانت زاوية ميل السلم على الأرض، واحد وأربعين درجة. اوجد طول السلم لأقرب رقمين عشريين.

عشان نقدر نحل السؤال ده، لازم نرسمه كالتالي. رسمنا السؤال زيّ ما إحنا شايفين. بنلاقي عندنا السلم. السلم بيميل على الأرض بزاوية مقدارها واحد وأربعين درجة. بنلاحظ إنّ … رسَمنا السؤال زي ما إحنا شايفين. بنلاقي السلم عندنا بيميل على الأرض بزاوية مقدارها واحد وأربعين درجة. وبنلاقي إن ارتفاع الطرف العلوي للسلم عن الأرض أربعة وخمسة من عشرة متر.

بنلاحظ كمان إن الحيطة بتكون عمودية على الأرض، يعني بتصنع زاوية مقدارها تسعين، زي ما إحنا شايفين كده. من الواضح إن السلم مع الحائط مع الأرض، بيكوّنوا شكل مثلث قائم الزاوية. وبما إن مطلوب في السؤال طول السلم، فإحنا ممكن نستخدم النسب المثلثية عشان نقدر نوجد طول السلم كالتالي.

فبنلاقي عندنا إن جا الزاوية واحد وأربعين بتكون عبارة عن المقابل على الوتر. ولأن المقابل عندنا هو عبارة عن ارتفاع الطرف العلوي للسلم عن الأرض، اللي هو عبارة عن أربعة وخمسة من عشرة متر. والوتر عندنا هو عبارة عن طول السلم؛ لأنه هو الضلع المقابل للزاوية تسعين القائمة. يبقى جا واحد وأربعين درجة هتساوي … المقابل عبارة عن أربعة وخمسة من عشرة. على … الوتر عبارة عن طول السلم.

وبما إن مقام الـ جا واحد وأربعين يساوي واحد. يبقى باستخدام الضرب التبادلي، بنلاقي إن طول السلم هيساوي واحد في أربعة وخمسة من عشرة، على جا واحد وأربعين درجة. باستخدام الآلة الحاسبة، وبالتقريب لأقرب رقمين عشريين، بنلاقي إن طول السلم تقريبًا هيساوي ستة وستة وتمانين من مية متر. وبكده يبقى قدرنا نجاوب على السؤال، وقدرنا نوجد طول السلم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.