فيديو: قراءة البيانات من الجدول التكراري ذي المجموعات

يوضّح الجدول طول ١٠٠ طالبًا في المدرسة. ما عدد الطلاب الذين أطوالهم أكبر من أو تساوي ١٢٠ سم؟

٠٢:٢٣

‏نسخة الفيديو النصية

يوضّح الجدول طول مائة طالب في المدرسة. ما عدد الطلاب الذين أطوالهم أكبر من أو تساوي مية وعشرين سنتيمتر؟

هنلاحظ إن الجدول اللي قدامنا فيه الطول بالسنتيمتر متقسّم إلى فترات، وعدد الطلاب اللي بيقع طولهم في كل فترة من الفترات دي.

يعني عندنا الفترة الأولى متقسّمة من مية وخمستاشر سنتي لمية وتسعتاشر سنتي. وبيقع فيها عدد طلاب اتناشر طالب.

الفترة التانية هي اللي طولهم من مية وعشرين سنتي لمية أربعة وعشرين سنتي. ودول عددهم اتناشر طالب.

الفترة التالتة هي اللي أطوالهم من مية خمسة وعشرين لمية تسعة وعشرين سنتي. وعدد الطلاب اللي بتقع في الفترة دي هو عشرين طالب.

الفترة الرابعة هي اللي أطوالهم من مية وتلاتين سنتي لمية أربعة وتلاتين سنتي. وعدد الطلاب اللي بيقعوا فيها ستاشر طالب.

الفترة الخامسة هي الطول اللي بيقع من مية خمسة وتلاتين سنتي لمية تسعة وتلاتين سنتي. عدد الطلاب اللي في الفترة دي اتناشر طالب.

الفترة الساتّة هي الأطوال اللي بتقع ما بين مية وأربعين سنتي لمية أربعة وأربعين سنتي. وعدد الطلاب في الفترة هنا هو عشر طلاب.

أمّا آخر فترة عندنا، فهي الطلاب اللي طولهم من مية خمسة وأربعين سنتي فأكثر. دول عددهم تمنتاشر طالب.

هنلاقي إن مجموع عدد الطلاب اللي أُجرِيَت عليهم الدراسة كانوا مية طالب. إحنا مطلوب مننا عدد الطلاب اللي أطوالهم أكبر من أو تساوي مية وعشرين سنتي. يبقى بالرجوع للجدول هناخد عدد الطلاب اللي أطوالهم بتقع في الفترة التانية: من مية وعشرين لمية أربعة وعشرين، وكل الفترات اللي بعد كده؛ لأنه كلها هتبقى أكبر من مية وعشرين سنتي.

هنبتدي نجمّع كل أعداد الطلاب اللي في الفترات دي. ومجموعهم هو ده؛ هيبقى عدد الطلاب اللي أطوالهم أكبر من أو تساوي مية وعشرين سنتي. يبقى هنجمع اتناشر، زائد عشرين، زائد ستاشر، زائد اتناشر، زائد عشرة، زائد تمنتاشر؛ هيبقى المجموع تمنية وتمانين طالب.

يبقى عدد الطلاب المطلوب، اللي أطوالهم أكبر من أو تساوي مية وعشرين، هم: تمنية وتمانين طالب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.