فيديو: مقارنة القِيَم المطلقة للأعداد الصحيحة المحدَّدة على خط الأعداد

أي العبارات التالية صواب؟ [أ] |أ| >|ب| [ب] |أ|< |ب| [ج] أ >|ب| [د] |أ| = |ب| [ﻫ] أ = |ب|

٠٣:١٩

‏نسخة الفيديو النصية

أي العبارات التالية صواب؟

ومعطى عندنا الاختيارات: القيمة المطلقة لـ أ أكبر من القيمة المطلقة لـ ب، أو القيمة المطلقة لـ أ أقل من القيمة المطلقة لـ ب، أو أ أكبر من القيمة المطلقة لـ ب، أو القيمة المطلقة لـ أ تساوي القيمة المطلقة لـ ب، أو أ تساوي القيمة المطلقة لـ ب. ومعطى عندنا خط الأعداد اللي في الشكل ده، وعليه النقطة أ والنقطة ب.

فأول حاجة هنعملها إننا هنحدد قيم أ وَ ب، فهنيجي عند خط الأعداد، وهنلاحظ إن النقطة أ موجودة على خط الأعداد عند النقطة سالب ستة، وبالتالي أ هتساوي سالب ستة. بعد كده هنيجي عند نقطة ب على خط الأعداد، وهنلاحظ إنها بتقع عند نقطة خمسة على خط الأعداد، فبالتالي ب هتساوي خمسة.

بعد كده هنحسب القيمة المطلقة. والقيمة المطلقة هي عدد الوحدات بغضّ النظر عن الإشارة؛ يعني لو عايزين نوجد القيمة المطلقة للنقطة أ، فهنشوف على خط الأعداد النقطة أ بتبعد قد إيه عن الصفر، فهنلاحظ إنها بتبعد ست وحدات: واحد، اتنين، تلاتة، أربعة، خمسة، ستة؛ وبالتالي هتبقى القيمة المطلقة لـ أ بتساوي ستة. وبنفس الطريقة لو عايزين نحسب القيمة المطلقة لـ ب، فهنشوف ب بتبعد قد إيه عن صفر، فهنلاحظ إن ب بتبعد خمس وحدات: واحد، اتنين، تلاتة، أربعة، خمسة؛ فبالتالي هتبقى القيمة المطلقة لـ ب بتساوي خمسة، واللي هي عدد الوحدات بغضّ النظر عن الإشارة.

فكده حسبنا القيمة المطلقة لـ أ واللي طلعت بتساوي ستة، والقيمة المطلقة لـ ب بتساوي خمسة. بعد كده هنشوف الاختيارات اللي عندنا، فأول حاجة عندنا القيمة المطلقة لـ أ أكبر من القيمة المطلقة لـ ب، يعني ستة أكبر من خمسة؛ فبالتالي هي إجابة صحيحة. لكن القيمة المطلقة لـ أ أقل من القيمة المطلقة لـ ب إجابة خاطئة؛ لأن ستة مش أقل من خمسة. وبنفس الطريقة هنشوف الاختيار اللي بعد كده، أ أكبر من القيمة المطلقة لـ ب، فـ أ هنا قيمتها سالب ستة، والقيمة المطلقة لـ ب هي خمسة. وبما إن سالب ستة أقل من خمسة، فمعنى كده إن أ أكبر من القيمة المطلقة لـ ب هي إجابة خطأ.

وبعد كده الاختيار اللي بعده، القيمة المطلقة لـ أ تساوي القيمة المطلقة لـ ب، ودي طبعًا إجابة خطأ؛ لأن دي بتساوي ستة ودي بتساوي خمسة. وآخر اختيار أ تساوي القيمة المطلقة لـ ب برضو اختيار خطأ؛ فبالتالي هتبقى الإجابة الصحيحة هي القيمة المطلقة لـ أ أكبر من القيمة المطلقة لـ ب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.