فيديو: إيجاد طول مسقط القطعة المستقيمة في مثلث متساوي الساقين

أوجد طول مسقط القطعة المستقيمة ﺃﺏ على القطعة المستقيمة ﺏﺟ.

٠٢:٤١

‏نسخة الفيديو النصية

أوجد طول مسقط القطعة المستقيمة أ ب على القطعة المستقيمة ب ﺟ. ومعطى عندنا المثلث اللي في الشكل. وعايزين نوجد طول مسقط القطعة المستقيمة أ ب على القطعة المستقيمة ب ﺟ. فهنيجي عند القطعة المستقيمة أ ب، وهنبدأ نسقط نقطة نقطة.

فأول حاجة عايزين نوجد مسقط النقطة أ. وخلينا في الأول نفتكر إن مسقط نقطة على قطعة مستقيمة هو موقع العمود المرسوم من النقطة دي على القطعة المستقيمة. فمعنى كده إن مسقط النقطة أ على القطعة المستقيمة ب ﺟ هتبقى على موقع العمود اللي مرسوم من النقطة على القطعة المستقيمة ب ﺟ. يعني هتبقى هنا هو مكان مسقط النقطة أ، واللي هي أ شرطة.

طيب بعد كده لمّا نيجي نشوف النقطة ب. فهنلاحظ إن النقطة ب بتقع على القطعة المستقيمة ب ﺟ. وخلينا نفتكر إن لو كانت النقطة بتقع على القطعة المستقيمة. فبيبقى مسقطها على القطعة المستقيمة هو نفس النقطة. فمعنى كده بما إن النقطة ب بتقع على القطعة المستقيمة ب ﺟ. فبالتالي هيبقى مسقط النقطة على القطعة المستقيمة ب ﺟ هو النقطة نفسها. يعني هتبقى دي ب شرطة.

بعد كده المطلوب مننا في السؤال إننا نوجد طول مسقط القطعة المستقيمة أ ب على القطعة المستقيمة ب ﺟ. يعني عايزين نوجد أ شرطة ب شرطة، اللي هو طول القطعة المستقيمة اللي عندنا باللون الأخضر. فمن الشكل هنلاحظ إن معطى عندنا إن المثلث ده متساوي الساقين.

وخلينا في الأول نفتكر نتيجة إن المستقيم المرسوم من رأس المثلث المتساوي الساقين وعموديًّا على القاعدة، بينصف كلًّا من القاعدة وزاوية الرأس. فمعنى كده إن العمود ده هينصّف القاعدة اللي هي ب ﺟ. فمعنى كده إن القطع المستقيمة أ شرطة ب شرطة هيبقى طولها بيساوي نصف طول القطعة المستقيمة ب ﺟ. يعني هيبقى أ شرطة ب شرطة بيساوي نص ب ﺟ.

وبما إن معطى عندنا في الشكل إن ب ﺟ يساوي تمنية وأربعين سنتيمتر. فبالتالي هيبقى أ شرطة ب شرطة بيساوي نص في تمنية وأربعين. فلمّا نحسبها هتبقى بتساوي أربعة وعشرين سنتيمتر. وبالتالي هيبقى طول مسقط القطعة المستقيمة أ ب على القطعة المستقيمة ب ﺟ هو أربعة وعشرين سنتيمتر. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.