فيديو: تحويل وحدات السعة

يوضِّح الجدول كمية السوائل التي تشربها عبير يوميًّا. ما عدد لترات السوائل التي تشربها يوميًّا

٠٣:١٤

‏نسخة الفيديو النصية

يوضح الجدول كمية السوائل التي تشربها عبير يوميًّا. ما عدد لترات السوائل التي تشربها يوميًّا؟

والجدول بيوضّح لنا إنها بتشرب ميتين تلاتة وتسعين ملليلتر عصير، وربعمية أربعة وخمسين ملليلتر لبن، وواحد وواحد من عشرة لتر مَيّة. خلينا نعمل مراجعة سريعة على وحدات اللتر والملليلتر.

إحنا عارفين إن دي قياسات للحجم موجودة في النظام المتري، بنلاحظ إن كلمة لتر ظهرت في القياسين اللي في المسألة، وبرضو شُفنا مللي في بداية ملليلتر، والمللي معناها جزء من ألف من شيء؛ يعني ملليلتر معناها جزء من ألف من اللتر، أو إن فيه ألف ملليلتر في اللتر الواحد. وخلينا نفكّر في ده، لو أنت معاك لتر واحد، دول يبقوا ألف ملليلتر.

وعاوزين نبصّ على أرقام الكميات اللي عندنا في المسألة، عشان نحوّل اللترات لملليلترات. بنحسب فيه كام ألف من الملليلترات في اللترات اللي موجودة في حجم معيّن. ولو إحنا عايزين نشوف الموضوع من الناحية التانية، يبقى هنحوّل كل ألف لواحد؛ يعني هنقسم على ألف.

دلوقتي مطلوب في السؤال إننا نوجد الحل باللترات، فهنزود عمود كمان في الجدول اللي عندنا، وهنحوّل كل الأحجام اللي فيه لِلِترات، وبكده نقدر نجمع كل الأحجام دي مع بعضها. فعندنا ميتين تلاتة وتسعين ملليلتر، عشان أحولهم لِلِترات يبقى أنا لازم أقسمهم على ألف، فهيساوى ميتين تلاتة وتسعين من ألف لتر. وربعمية أربعة وخمسين بالملليلترات، عشان نحوّلهم لِلِترات يبقى برضو هنِقسمهم على ألف، فهيساوي ربعمية أربعة وخمسين من ألف لتر. أما المَيّة فمُعطاة عندنا في المسألة بوحدة اللتر أصلًا، يعني هتبقى واحد وواحد من عشرة.

دلوقتي عشان نخلي عملية الجمع أسهل، وعشان نِفضل واخدين بالنا من الأرقام اللي هنجمعها مع بعض، لمّا نجمع عليهم حجم المَيّة هنقول عندنا صفر في خانة الجزء من مِية، وصفر في خانة الجزء من ألف، فهنجمعهم مع بعض؛ تلاتة زائد أربعة زائد صفر بيساوي سبعة، وتسعة زائد خمسة زائد صفر بتساوي أربعتاشر؛ فهيبقى كده معانا أربعة، والواحد هنكتبه في العمود اللي بعده. اتنين وأربعة بتساوي ستة، وواحد يبقى سبعة، زائد الواحد اللي معانا يبقى تمنية؛ يبقى الناتج تمنية وصفر وصفر وواحد بيساوي واحد؛ فهيبقى المجموع واحد وتمنمية سبعة وأربعين من ألف لتر.

يبقى الإجابة بتاعتنا عبير بتشرب واحد وتمنمية سبعة وأربعين من ألف لتر من السوائل بشكل إجمالي كل يوم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.