تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد قيمة المقدار الجبري

أحمد مدحت

أوجد قيمة س/ص − ص/ع، إذا كان س = ٤/١، ص = ٢/١، ع = ٤.

٠٤:٢٥

‏نسخة الفيديو النصية

أوجد قيمة س على ص، ناقص ص على ع. إذا كان س تساوي ربع، وَ ص تساوي نُصّ، وَ ع تساوي أربعة.

علشان نوجد قيمة س على ص، ناقص ص على ع. فإحنا أول حاجة هنوجد س على ص. بعد كده هنوجد ص على ع. بعد كده هنعوّض عن قيمتَي س على ص، وَ ص على ع؛ علشان نوجد قيمة المقدار الأصلي.

فالأول هنوجد قيمة س على ص. بالنسبة لـ س على ص فهنقدر نكتبها بالشكل ده: س على ص. بعد كده علشان نوجد قيمة س على ص هنعوّض عن س بربع، وعن ص بنُصّ. فبكده هيبقى س على ص تساوي ربع على نُصّ.

كده إحنا عايزين نقسم ربع على نُصّ، يعني عايزين نقسم كسر على كسر. ولمّا بنقسم كسر على كسر بنحوّل الكسر التاني، اللي هو المقسوم عليه لمقلوبه، وبنحوّل عملية القسمة لعملية ضرب. أمّا الكسر الأول، واللي هو المقسوم، فبيفضل زيّ ما هو.

معنى كده إن إحنا في الخطوة الجايّة هنضرب المقسوم في مقلوب المقسوم عليه. والمقسوم عليه هو نُصّ، ومقلوب نُصّ هو اتنين على واحد. بكده س على ص تساوي ربع، في اتنين على واحد. يعني س على ص تساوي واحد في اتنين، على أربعة في واحد. يعني هيبقى س على ص يساوي اتنين على أربعة. واتنين على أربعة في أبسط صورة يساوي نُصّ. بكده هيبقى س على ص يساوي نُصّ.

بعد ما أوجدنا قيمة س على ص، هنوجد قيمة ص على ع. بالنسبة لـ ص على ع فإحنا نقدر نكتبها على الصورة: ص على ع. ومن المعطيات ص تساوي نُصّ، وَ ع تساوي أربعة. فهنعوّض عن ص بنُصّ، وعن ع بأربعة. فهيبقى عندنا ص على ع يساوي نُصّ على أربعة.

بالنسبة لأربعة فهي عبارة عن أربعة على واحد. يعني معنى كده إن ص على ع يساوي نُصّ، على؛ أربعة على واحد. كده إحنا بنقسم كسر على كسر، فهنضرب المقسوم، اللي هو نُصّ، في مقلوب المقسوم عليه. ومقلوب أربعة على واحد هو واحد على أربعة؛ يعني ربع.

بكده ص على ع يساوي نُصّ في ربع. ونُصّ في ربع يساوي واحد في واحد، على اتنين في أربعة. وواحد في واحد يساوي واحد، واتنين في أربعة يساوي تمنية. فهيبقى ص على ع يساوي واحد على تمنية. كده إحنا أوجدنا قيمة ص على ع، وهي: واحد على تمنية، أو تُمن.

وبعد ما أوجدنا قيمة س على ص، وقيمة ص على ع، هنوجد قيمة س على ص، ناقص ص على ع. بالنسبة للمقدار س على ص، ناقص ص على ع علشان نوجد قيمته هنعوّض عن قيمتَي س على ص، وَ ص على ع.

بالنسبة لـ س على ص فهو يساوي واحد على اتنين، أو نُصّ. أمّا ص على ع فهو يساوي واحد على تمنية، أو تُمن. ولمّا هنعوّض عن قيمتَي س على ص، وَ ص على ع. هيبقى س على ص، ناقص ص على ع يساوي نُصّ ناقص تُمن. وعلشان نطرح كسرين لازم الكسرين يكون ليهم نفس المقام. معنى كده إن إحنا عايزين نوحّد المقامين للكسرين اللي عندنا. والمقام المشترك للكسرين دول هو تمنية.

بالنسبة للكسر الأول، اللي هو نُصّ، فعلشان المقام يبقى تمنية فإحنا هنضرب اتنين في أربعة. لكن علشان نحافظ على الكسر زيّ ما هو، فزيّ ما ضربنا المقام في أربعة كمان هنضرب البسط في أربعة. بكده هيبقى س على ص، ناقص ص على ع يساوي أربعة على تمنية، ناقص واحد على تمنية. كده المقامين بتوع الكسرين بقوا زيّ بعض، يعني نقدر نطرح.

فلمّا هنطرح هيبقى س على ص، ناقص ص على ع يساوي أربعة ناقص واحد، على تمنية. وأربعة ناقص واحد يساوي تلاتة. معنى كده إن هيبقى س على ص، ناقص ص على ع يساوي تلاتة على تمنية.

بكده يبقى إحنا وصلنا إن قيمة س على ص، ناقص ص على ع، هي: تلاتة على تمنية.