فيديو: معرفة أن ضعف عددٍ ما يكون عددًا زوجيًّا

حدِّد إذا كانت الإجابة التي توضّح المجموع عددًا زوجيًّا أم فرديًّا: ٧ + ٧.

٠٢:٥٦

‏نسخة الفيديو النصية

حدِّد إذا كانت الإجابة التي توضّح المجموع عددًا زوجيًّا أم فرديًّا. سبعة زائد سبعة. عاوزين نعرف إجابة المجموع ده، اللي هو سبعة زائد سبعة، عدد زوجي ولّا عدد فردي.

لو عندنا سبع برتقانات بالشكل ده. وحبِّينا نجمع عليهم كمان سبع برتقانات، ناتج جمعهم هيكون إيه؟ علشان نعرف ناتج جمعهم هنعدّهم كلهم. فنبدأ نعدّ: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر. ناتج جمعهم بيساوي أربعتاشر. يبقى سبعة زائد سبعة تساوي أربعتاشر.

طيب الأربعتاشر دي عدد زوجي ولّا عدد فردي؟ العدد الزوجي هو العدد اللي ممكن نقسّمه لأزواج من غير ما يتبقَّى لنا أيّ حاجة مفردة لوحدها. يعني إيه؟ يعني لو جِبنا الأربعتاشر برتقانة، وحطِّيناهم بالشكل ده. عندنا هنا دول سبعة، ودول سبعة. وإحنا قلنا: سبعة زائد سبعة بتساوي أربعتاشر.

وعاوزين نشوف بقى الأربعتاشر ده عدد زوجي ولّا فردي. فلو حطِّيناهم بالشكل ده، وقدرنا نقسِّمهم لأزواج. يعني كل برتقانتين يكونوا مع بعض وما يتبقالناش أيّ برتقانة فردية لوحدها، يبقى ده معناه إن الأربعتاشر عدد زوجي. لكن لو حاولنا نقسِّمه لأزواج، ولقينا في الآخر برتقانة لوحدها مش لاقيين لها زوج، أو مش عارفين نحطّها في زوج. فده معناه إن هي عدد فردي.

فتعالوا نقسّم البرتقان. لو جينا نقسِّمه هناخد مثلًا البرتقانتين دول كده مع بعض. أهو ده زوج. وده زوج. وده زوج. وده زوج. وده زوج. وده زوج. وده زوج. ما اتبقالناش أيّ برتقانة لوحدها مش عارفين نحطّها في زوج. فده معناه إن الأربعتاشر برتقانة اللي قدامنا دول عدد زوجي.

طيب نفهم من كده إيه بقى؟ لو عددين زيّ بعض؛ السبعة زيّ السبعة مثلًا، مجموعين على بعض، يبقى مجموعهم عدد زوجي. ولمّا بنيجي نجمع عددين زيّ بعض على بعض، ده معناه إننا بنجيب ضعف العدد. يعني اللي إحنا عملناه ده هو ضعف السبعة. ضعف العدد سبعة هو الأربعتاشر. واللي هو عدد زوجي.

فتبقى الإجابة هنا هي كلمة: زوجي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.