فيديو: إيجاد ارتفاع طول برج على مقياس رسم بمعلومية ارتفاعه الحقيقي ومقياس رسم النموذج

يصنع مهندس نموذجًا لبرج طوله ٦٠٠ متر على مقياس رسم ١∶٧٥٠. ما ارتفاع النموذج بالسنتيمترات؟

٠٢:٥٣

‏نسخة الفيديو النصية

يصنع مهندس نموذجًا لبرج طوله ستمائة متر على مقياس رسم واحد إلى سبعمية وخمسين. ما ارتفاع النموذج بالسنتيمترات؟

يعني مُعطى عندنا ارتفاع البرج الحقيقي، اللي هو ستمائة متر، ومُعطى عندنا مقياس الرسم، اللي هو واحد إلى سبعمية وخمسين، فعايزين نعرف ارتفاع النموذج.

وأول حاجة عندنا هي مقياس الرسم واحد إلى سبعمية وخمسين، وهنكتبها في صورة كسر بالشكل ده، فهتبقى واحد على سبعمية وخمسين.

وخلِّينا في الأول نفهم مقياس الرسم؛ فمعنى واحد على سبعمية وخمسين، إن لكل وحدة طول للنموذج بيقابلها سبعمية وخمسين وحدة طول من الارتفاع الحقيقي للبرج؛ فمعنى كده إن مقياس الرسم، اللي هو واحد على سبعمية وخمسين، هيساوي ارتفاع النموذج اللي إحنا عايزين نوجده، وهنرمز له بالرمز س، على الارتفاع الحقيقي للبرج اللي هو ستمية متر. وبما إن ارتفاع البرج الحقيقي مُعطى بالمتر، فهيبقى ارتفاع النموذج اللي إحنا عايزين نوجده برضو بالمتر، وهيبقى زي ما قلنا إن س هي ارتفاع النموذج، وستمية متر هو الارتفاع الحقيقي للبرج.

فعشان نوجد قيمة س، اللي هي ارتفاع النموذج، يبقى هنقوم بعمل ضرب تبادلي، فلمّا نعمل ضرب تبادلي، هيبقى س في سبعمية وخمسين بتساوي واحد في ستمية. فعشان نوجد قيمة س، يبقى هنقسِم طرفَي المعادلة على سبعمية وخمسين.

فهنيجي عند الطرف الأيمن للمعادلة، اللي هو س في سبعمية وخمسين على سبعمية وخمسين، وهنقسم البسط والمقام على سبعمية وخمسين. فلما نقسم، هتبقى س في واحد على واحد واللي بتساوي س.

بعد كده هنيجي عند الطرف الأيسر للمعادلة، اللي هو واحد في ستمية، على سبعمية وخمسين، فواحد في ستمية بستمية، ولمّا نقسم ستمية على سبعمية وخمسين، هتساوي تمنية من عشرة؛ فمعنى كده إن س هتساوي تمنية من عشرة، وهتبقى الوحدة بالمتر.

لكن المطلوب في السؤال إننا نوجد ارتفاع النموذج بالسنتيمترات؛ فمعنى كده إننا محتاجين نحوّل الوحدة من متر إلى سنتيمتر. وبما إن المتر الواحد بيساوي مية سنتيمتر؛ فمعنى كده علشان نحوّل من متر لسنتيمتر، هنضرب في مية. فلما نضرب تمنية من عشرة في مية، هتساوي تمانين، وهتبقى الوحدة عندنا بالسنتيمتر؛ فبالتالي هيبقى ارتفاع النموذج بالسنتيمترات هو تمانين سنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.